Aizawl: Mizo Zirlai Pawl (MZP) chuan The Citizenship (Amendment) Bill, 2016 chu Mizoram sawrkar chuan a vei tawk loah an ngai tih sawiin sawrkarin tun thlenga sawihona a la nei miah lo chu mak an ti hle tih an sawi.
Nimin khan an pisaah chanchinbumite kawmin MZP President L.Ramdinliana Renthlei chuan, “CAB pass a nih loh nana Republic Day boycott vek tum a nih tum khan, Chief Minister chuan tanho a ngaih thu leh ballboot buntir ve phawt turin min ngen a. CAB hi Feb. 12, 2019 hian Rajya Sabha-ah pharh tum niin kan lo hria a, mahse heti chunga sawrkar atanga sawihona emaw dodalna lian tham awm miah lo hi a pawi kan ti hle a, hetiang a nih chuan ballboot buntir hian awmzia a nei dawn lo niin kan ngai a ni,” a ti.
CAB chungchangah NGO ang chuan an tih tur ang ang an ti zo thawhkhat tawh nia an hriat thu sawiin sawrkar chet a hun ve tawhah an ngai niin a sawi a, MZP chuan hmalak chhunzawm zel a tum thu leh Mizo mipui zawng zawngte thlawpna leh tawngtaipuina an ngen tih a sawi bawk.
North East Students Organisation Finance Secretary Ricky Lalbiakmawia chuan CAB chungchangah hian tun hnaiah mi pawimawh hrang hrangte an dawr tih a sawi a. “JDU, BJD, Shiv Sena, TMC leh Congress President Rahul Gandhi te kan dawr a. Parliament a vote lak hunah awm ngei tur leh CAB dodal zawnga vote turin kan ngen a, min chhan danah kan lawm hle a. Central mi pawimawhte kan hmuhnaah hian Mizote thinlung a nat thu leh lungawi loh lantirna ah pawh ‘Hello China, bye bye India’ tih thuziak ken a nih thu kan sawi a, hei hi an ngai pawimawh hle ni,” a ti.
NESO Finance Secretary chuan CAB chu February 12 hian pass an tum leh dawn nia an hriat thu sawiin, “BJP hian sum hmangin MP-te lei an tum niin kan hria a, he indona hi a la tawp loh avangin hmala chhunzawm zel turin ni 10.2.2019 hian Delhi pan leh kan tum a ni,” a ti a.
&&&&

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.