Natnain kan ram a bawm, Far khat tal i ni thei em? – J.H.Lalngilneia Pu

pa lam ni tawh mah ila, tunlaia kan ram damlohna leh natna hi ka vei ve a. A damna tak tak tura beitu leh veitu political party-te awm dan leh chet dan te ka thlir kual ve thin a. Political party chu sawi loh, kohhran pawl hrang hrangte pawh hian, an chenna ram leh hnam dinhmun leh natna dik tak hi an hmu fiah lo emaw chu aw, ka ti vawng vawng thin.

 

Doctor-te pawh hian mihringte natna leh an hrisel lohna chhan dik tak an hriat loh chuan a tihdamna damdawi an chawh fuh thei lo ang bawk hian, kan ram leh hnam dam lohna dik tak kan hriat fuh loh chuan, a damna tur kan tifuh thei ngai lo vang. Chuvangin, kan ram leh hnam hian tunah hian natna khirh tak tak a vei a, tihdam a nih loh chuan mi fingten an sawi fo tawh angin, hnam a ral chuan tawng a ral tel a, sakhuanna a ral telh telh a, Kristiannate a dal tawlh tawlh thin an tih thin chu, tunah hian kan hmaah a inhung reng a.

Chung kan ram leh hnam natna te chu:

 

1. Ramri venhim ngaihsak tawk lohna

 

2. Kan mikhual cham rei Chakma

3. Kan mikhual cham rei Tuikuk

4. Zu vanga natna

 

5. Drugs leh a kaihhnawih avanga natna

 

Miin a chenna ramri a him tawk leh tawk loh a ngaihsak that loh chuan, a ram leh hnam hmangaihna tak tak a nei lo a ni ang a, a hnam nihna pawh a phatsan tihna hial pawh a ni thei ang. Lal reina leh thuneihna chan reina te hian kan khawthlir a tifiah lo thei pawh a ni mai thei bawk. Dik tak chuan, kei mi mal ngaihdan chuan, ramri venhim leh enkawl uluk hi hnam hmangaihtute rilru putzia tur niin ka hria.

 

A dawt lehah chuan, kan mikhual Chakma tan, kan ram chhungah, 1972-a Autonomouse District Council kan pe mai leh, an than duan chhoh zelna tur dal duh lo party leh sorkar nei anga lang hi a pawi tih hian a hrilhfiah zawh loh hun a thleng ang tih hlauhthawnawm tak niin ka hria.

 

Hetiang bawkin kan ram natna lian takah Tuikuk a rawn tang belh zel bawk nen, min tihbuai dan an thiamin an peih em em mai si a. Kan political party liante pahnih, MPCC leh MNF hian thangtharte hmakhaw ngaiin, thinlung taka hnam hmangaihna neiin, tawng chhuak ngam sela chuan, hnara hlir awm paih chhuah ang huai a nih ka ring. Party lian pahnihte hi heng hnam pahnihte lakah hian an aw hi a Hrangchala aw duai mai ni a lang hian upate min timangang a ni.

 

MKHC leh kohhran lian hote pawh hian, “Inthlan felfai kan neih theihna ringawt ni lo, Pathian min pek ram kan ni, Chanchintha zawnchhuah ram kan ni,” tia sawia sawi mai duh tawk lova ram, Lalpan min pek anga humhalh leh duat tulnate hi an thinlungah a thawk pha tawk lo emaw tih rum rum chang a awm thin. Ram leh hnam a dam nan theihtawp chhuah tlan hun a nih hria sela a tha hle mai. Zu zawrh sawisel ringawt a tawk lo, hnam dam lohna hnuk hriat hmasak a tul. Kohhran pawh a thanharh a ngai.

 

A dawt lehah chuan, kan ram natna 4-na leh 5-na te hi chu kan ram chhunga a mi chengte natna a ni a, a vei awm em em tho mai. Pathian min pek ram leh hnam thuthlungah chiang hmasa ila chuan, a chhunga mi chengte natna, zu vanga natna te, drugs vanga, natna te tana damdawi tha ber ‘Lal Isua’ chu a takin kan hmang thei ang.

 

Zu addict tawh te, drugs addict tawhte hi hauh leh vuaka sim thei an ni lo, an damdawi tur chuan kawng hmang tê a neiin, ngilneihna leh dawhtheihna nena enkawl chi an niin, zu leh drugs ngawl veitirtu chu Setana a ni tih kan hrilh thiama an hrehawmna nasa tak, mihringin tih theih rual lova a ngaih Pathian Lal Isua hmangaihna chuan an harsatna ata a chhan chhuak thei tih hmangaihna nena kan enkawl chuan engvangin nge he sual bawih ata Lal Isuan a chhan chhuah loh vang? Lal Isuan, a zirtirte, “In rinna khawiah nge?” tia a zawt ang mai kha kan ni ta em ni ?

 

Awle, a tawp berah chuan kan ram dam lohna pawh a hnuk kan hriat chuan a hnuk atanga tihdam hmasak a nih theih nan, Zoram siamna hun a lo thleng a nih pawhin, Zoram dam nan far khat tal nih i tum ang u. Kan ram leh hnam hi tumahin a damna tur min tihpui lo vang; keimahni Mizote ngei hi kan hnam damna leh thihna, malsawmna leh anchhia nangmah atanga chhuak thei chu Mizoram hian a nghak reng che a, Zoram dam nan far khat tal nih i tum ang u.

 

Zoram, i ram tana thinlung, rilru dik tak i put theihna turin, i ram tana far khat tal i nih theih nan political party engah mah ruihchilhin awm lo la, rilru fim takin i ram dinhmun i thlir thei chauhin a rinawm.

 

Political party hrang hrangin kan ram tan tih tur tha neih an tumnate chuan i rilru tihbuaitir lo la, i ram dam lohna leh natna, hnam leh tawng ral theihna, sakhuana dal tial tialna ven ngai kan nihna hi a pawimawh ber tih i hriat hi Siamtu pawhin i laka a beisei tlat che chu a ni. Tun huna kan kal sual vaih chuan kan ram leh hnamin harsatna a tawh a hlauhthawnawm hle.

 

Hnam hi a dam tur anga a dam phawt chuan tu party pawh lo sorkar se development chu automatic-a lo thleng zel tur a nih i hriat thiam turah dah tur a ni. No. 1-ah hnam damna dah nachang i hre theuh ang u.

 

Hei hi i hre thar ang u. Kumina India Vice President M.Venkaiah Naidu, May 24, 2018-ah a lokal a, MZU-ah Academic & Seminar Complex a rawn hawn khan, zirlaite chu mahni tawng leh hnam humhim turin a chah a. Mahni chawrchhuahna ngainep lo tur leh hnam ziarang leh tawngte humhalh tlat turin a fuih a. Mahni hnam culture leh tradition humhalh tlat turin a fuiha chahte kha Pathian tirh a nih ka ring a. Kan ram hruaitu tam takte aiin a sawi tha zawk mai awm mang e, a tih theih rum rum mai. Harh phah nan hmang ila a hlawk hle ang.

 

Kan Governor kal chhuak ta Lt. Gen. Nirbhay Sharma pawh khan, a chhuah dawna Mizote tan a thu min chah, min hnutchhiah kha, “Autonomouse District Council te lo en ngun rawh u,” a ti tih chanchinbuah kan hmu a nih kha.

Vai thaho, mi puitling chin leh chhuanawm, India Vice President thusawi te, kan Govenor kal chhuak ta thusawite hi Mizoten thinlung taka ngaihtuah nachang kan hriata fin phah nan hmang thei ila chuan kan ram natna hi a dam ngei ang.

Kan politician thenkhatten lalna leh thuneihna an chan theih nan ni awm taka hnam dangte phun ngheh tum ang mai a, an nawr na ngam lo anga lang hi a hahthlak lai leh a pawi lai ni tain a lang. Keimahni leh keimahni inkarah pawh hem an thlak lek lek niin a hriat theih. An finna leh anmahni hnama an chianna hian min lehkhalh tan mai dawn, Mizote u, harh fimin i tang deuh deuh teh ang u.
I RAM LEH HNAM DAM NAN FAR KHAT TAL I NI ANG AW!

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?