Naupang humhalhnaa hmalak tum

Aizawl; Mizoram Baptist Kohhran Hmeichhe Pawl (MBKHP) chuan Ningani khan Rorel Vawi 69-na an nei a, an rorela thu an pass zingah naupang humhalhna kawnga hmalak an tum.
MBKHP Rorel Inkhawm hi Mizoram Baptist Kohhran Biak In, Lamthuamthum, Haulawng-ah neih a ni a, rorel palai 502 an kal.
Rorel Inkhawm hi F.Lalrochami, President-in a kaihruai a, palaite chibai bukna hun a hman zawhah member thite sunna hun an hmang a, MBKHP organiser P.S.Lalhmingthangi’n kum 2018-2019 chhunga BKHP rawngbawlna hrang hrang report a pe.
Organiser report-in a tarlan danin Pastor bial 85-ah BKHP unit 449 a awm a, member 31,013 an ni a. Kum 2018-2019 chhunga opening balance nen veka sum hmuh chu nen vek Rs. 10,414,334 niin Rs. 9,306,260/- an hmang ral thung.
Rorela thu an pass zingah hian ‘MBKHP hian naupang humhalh (child protection) chungchangah chak takin hma lak ni rawh se’ tih a tel bakah Mizorama cancer natna a lo tlema a vei mekten thlarau damna an chan theih nana tawngtai te, Missionary pual bakah subject hrang hrang hmangin chaw nghei tawngtai ram pum huapin neih ni se, ei ai keng khawmin missionary tanpui ngaite tanpui nan hman ni se an ti bawk a. Hei hi kum tin rel thar ngai lova thu leh awm hma chu hman zel ni se an ti bawk.
Kum 2020 MBKHP Rorel Inkhawm chu Thenzawl Bialah neih a ni dawn a, kum 2021 MBKHP Inkhawmpui chu South Vanlaiphai Bialah nghah a ni thung ang.
MBKHP-ah Organise thar ruat a ni tawh a, Mizoram Baptist Kohhran Administrative Committee Meeting chuan Lalhmingmawii Chawngthu a ruat a, ani hi kum 2019-2022 chhung tur niin Asst. Professor, AICS-a thawk lai a ni a, April thla atang hian MBKHP Organiser a ni tan ang.

MBKHP ROREL 2019 THU PASS-TE

  1. Kristian chhungkua dintharlehna Seminar leh Buhfatham Campaign neih.
  2. Kan ramah Cancer natna a lo tlem a, a vei mek ten thlarau damna an chan theih nana tawngtai.
  3. MBKHP hian Naupang humhalh (Child Protection) chungchangah chak takin hma lak.
  4. Chhawmdawlna In Melte Boys Hostel sak na leh Zemabawk Cancer Hospital Poor Patient Fund tan unit tinin MBKHP kaltlangin theih ang anga tanpuina pek.
  5. MBKHP hian Christian Hospital, Lawngtlai tanpui.
  6. AICS pualin Unit tin vawikhat fehchhuah.
  7. BKHP inkhawm zan apiangin Mizoram chhunga Jail hrang hrangah Thlarau Thianghlim harhna a thlen theih nana tawngtai.
  8. Missionary pual bakah Subject hrang hrang hmangin Chawnghei tawngtai ram pum huapin neih ni se. Ei ai keng khawmin chumi chu Missionary tanpui ngaite tnpui nan hman ni se., hei hi kum tin rel thar ngai lova, thu leh awm hma chu hman zel ni se an ti bawk.
  9. Kum 2019-20 Budget atan Rs 10,00,000/- Assembly (FOD)-in ceiling a pek angin siam a ni.
Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.

Login

Lost your password?