Puanven i sawi chhing ang: Tawngthuchhelovah chuan kumthar tih vel chu tlem a upa lam deuh tawh chuan ngaiah kan nei tawh mai thei, thalai lam tan erawh a hlimawm dangdai hle mai. Kum kalta lama che tha vak lo, kan hnathawhna/zirnaah te emaw kan awm nual in ka ring. Tuarna phena malsawmna an tih ang deuh, indawmkun mai lovin, hma lam hun beiseina nen thlir tum zawk ta ila, kawng awm theih dan tur zawk pawh a ni mah mah a ni. Hetih lai hian lusun khawharte tan pawh phurawm vak loh mai thei, tawngtaina nen hma lam thlir tum ta mai ila a fuh ber awm e. Han sawi leh ta ila, kum upa lam tawh te tan pawh ngaia nei mai lovin hmachhawp (New year resolution) te han nei ve ta ila, mi a tiphur phian mai thei asin. Pathian rawngbawlna lama tlema buaina, harsatna neite pawhin hmelmapan min thik,huphurh a ni, tih hria in, tan ila sauh sauh zawk ang. NGO hrang hranga thawktute, engmah hlep leh hmuh nei lo mah ila, mi dangte tana kan thawh hnual chuang lovin hmalam i pan sauh sauh zawk ang. Mi tinte, a bik takin harsatna, buaina, tawk mek te, taima takin i thawk zel ang, puan ven i sawi chhing sauh sauh zawk ang.

 

I support ang: Sawrkar thar tha tak kan nei leh ta. An rorel danin a zir chuan Mizoram chu ram nuam takah a chang ang a, zir loh erawh chuan ram rethei kan ni reng mai dawn a ni. Opposition lamte kan tan a ngai, an tih dik loh lai leh hmuh fuh loh laite kan thur chhuah zat zat a pawimawh, tih dik loh chan hrim hrim lam erawh thil tha ber a ni ang em aw? Sawrkar hnathawkte kan pawimawh hle, hmalakna hrang hrangte rinawm tak leh taima taka kan thawh a ngai. Corruption, sum insiam, etc. tih velte hi chu tlanbosan ngam ila, mahni hlawh bak hi chu, ti deuh tlat thei ila a duhawm ngawt ang. Contract, supply hnathawk thinte pawh hlep hnem tum lutuk lo thin ila, a mawi tawk hlawh theih chuan duh tawk mai ila a va tha awm ve. Party mi leh sate pawh hi sawi kan kai ve thin a nia, i intithu lutuk lo vang u. Mizote chu sum kan duh,hmuh theihna tur a nih phawt chuan ringtu tha tak emaw kan tih pawh hi rin aiin a khaw hawi a zim riau zel. Kan sorkar hotute kan chim nasa lutuk thin te, insum deuh ila; tichuan, heti zawng zawk hian sawrkar support i tum ang.

 

I uar zel ang: Krismas vel bawr lai hi chuan thilpek kan uar hle mai, veng tinah, khaw tinah, a ropui hle mai. Tanpui ngaihote tan chuan a lawmawm thin ngawt ang. Pathian zarah kum bul kan han hmang chho leh tan dawn a, chanhai, riangvai, etc. te tan chuan a huphurhawm viauin ka ring. Lehlamah chuan China thufingin, “I thenawm sangha hmehtir i duh chuan sangha pe suh, a man dan zirtir zawk rawh,” a lo ti ve bawk a. Ni e, tanpuina pek reng ringawt hi a fuh ber lohna lai pawh a tam ve hle ang. Hetiang hi ni mah se, loh theih loh hi a tam ve khawp a, entirnan, Synod hospital ang te, Aizawl civil hospital ang te pawh, damlo harsa tak tak hi rin aiin an lo tam thei hle a ni. Thilpek hi tam lua awm lo tlem lua awm lo a ni a, a nuaih tela pe chi te, sing/sang, tel ang chi a pekte a ni hlawm. Home leh center kan neihhote pawh hi donation ang chi hmanga kalpui an ni hlawm. Pathian lakah hian thil tha tih kan chak hlawm in ka ring; mahse, han tih vak ngaihna pawh a awm chuang leh si lo. Bible-in a sawi dan chuan, “Heng mi tê berte chunga in tih hian ka chunga ti in ni e,” a ti. Heng tanpui ngaihote hi Pathian aiawh an lo ni reng a nih chu.

 

I chiang ang: Nikum sunde sikul zirlai (Presbyterian) tir lamah khan kan zir nualin ka ring. Rin aiin Israel fate kha an lo inchhui nasa, a tul a ni ang, hnamah an chiang hle a ni. Vai kan tihhote pawh hi an tia lawm, “Khawi hmunah pawh awm se, an vai ngan mai a ni,” an ti. Israel fate pawh kha an inzirtir ngun em em, “Aw, Jerusalem, nang ka theihnghilh ai che chuan, ka lei hi ka dangah bet rawh se,” te an ti hial a ni. Keini hi han sawi ve ta ila, kan pi leh pute chu sawi loh, tun hma deuhte phei kha chuan fate hming pawh hre kim mang lo kan awm awm asin. Kan thlahtute hi kan hre tlem awm asin maw le, fing, fel, changkang, inti viau si hian. Kan tawngte pawh hi a thamral mek niin a hriat, i inchhung khur thil hmingte kha han chik mah teh. Kan tawnga awm ve reng si; mahse, tawngdang hminga awm tlat kha a tam riau a nia. Kan hriat loh kar hian chimralin kan awm mek reng a ni. Kan tu leh fate hming kan han phuah te pawh hi hnam dang hming kan uar mah mah lo maw aw, a thente phei hi chu hai mai palh awlte pawh a awm, an ti. Eng pawh nise, hnama chian hi hmasawn nan, ringtu nun atan, etc. tul leh pawimawh tak a ni. Thu tlanglawn tete kan han sawi lang leh ta teuh mai, kumthar atana ngaihtuahna thar min pe thei tu ni thei se a lawmawm ngawt ang. Han chik deuh ta ila kumthar kan han thlen tak pawh hi nakin lawkah chuan a hlui a lo ni leh mai dawn a. Kan thlah liam tak pawh kha hman lawk a a thar kan tih tho kha a ni. Tichuan, kumthar kan lo tih thin tho khan kumthar dang a lo thleng leh tawh a, a tawi zawngin kumtharte kumthar emaw, New New Year, te ti ta ila a fuh ber awm e, awle, new year chibai vek ule.

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.