Ni pawimawh kan hlut lo

India hian ni pawimawh bika puan ‘National Day’ chi thum a nei a, chungte chu Republic day (January 26), Independence day (August 15) leh Gandhi Jayanti (October 2) te an ni. Heng ni pawimawh pathum zingah hian Republic Day leh Independence Day te hi sawrkar chuan a hlut zual deuh a, a lawmna hun pawh urhsun takin a buatsaih thin a ni.

 

Republic Day-ah chuan President-in hnam puanzar a pawtparh thin a, state-ah chuan Governor-in. Chutiang zelin Independence Day-ah chuan Prime Minister leh Chief Minister ten hnam puanzar pawtparhin thu an sawi thin a ni. Mizoramah pawh heng ni pawimawh pahnihte hi hman thin an ni a, a pawimawhna leh a hlutna hi mipuite hian kan hrethiam tawk lo nge ni, a lawmna hunah hian kan tel tlem thin hle mai hi chu ngun zawka ngaihtuahna kan hman a tha hle mai.

 

Tun kar maia kan hman zawh tak Independence day lawmna pui ber Aizawl Lammuala neih pawh kha mipui tel an tlem hle a. School naupangte kha tel ta lo se chuan mipui ringawt phei chu sawi zahthlak khawpin an tlem ang. Sawrkar chuan tha taka hman a nih theih nan pisa chawlh ‘holiday’-ah hial a puang a; mahse, sawrkar hnathawk tam berte erawh chuan mahni hna tul leh duh zawng tihna atan he ni hi kan hmang ta mai ni hialin a lang. Zirlaite zingah pawh zir tur kan la ngah em em mai chu awm dan mawi a ni. Hnam hla ‘Jana gana mana’ sak lai hi chuan zah entir nan din thin tur a ni a; mahse, zirlai thahnem tak din tur a ni tih pawh hre lo an la awm niin a lang a, zirtirtu leh zirlaiten tan lak a ngai hle mai.

 

Mi dang thuhnuaia kun hi a hrehawm a, midang kut atanga kan talchhuahna ni leh mahnia ro inrelna ni han hmante hi a hlu a, hlut zel pawh a pawimawh. Zalenna ni kan neih te hi keinin kan hlut loh chuan ram dangin min hlutpui dawn lo a ni tih hriain a lawmna hunah pawh mi tam zawk kal/tel tura tan kan lak a pawimawh hle.

 

Hetih rual hian Republic Day a ni emaw Independence Day a ni emaw lawmnaah hian a huaihawttute pawhin mipui tam zawk hipkhawm theihna tur programme an buatsaih thiam a tul hle a. Tuna programme pangngai hi chuan mipui hi a kokhawm zo tawh lo niin a lang a, ruahmanna thar engemaw chhawp chhuak tura ngaihtuah an sen a pawimawh hle mai. Kan hunpui neihte hi a hlutzia hre thara chhawmnung zel tura tan kan lak thar a pawimawh hle. Kan hunpui neihte hi a hlutzia hre thara chhawmnung zel tura tan kan lak thar a pawimawh hle.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?