Aizawl; Mizoram Baptist Kohhran hnuaia thalai pawl, Mizoram Thalai Kristian Pawl (MTKP) Inkhawmpui Vawi 47-na chu Ningani zan atang hian tan a ni dawn a, Pathianni thleng awh tur a ni a, a inkhawmpui nei tur hian a thlengtu lam leh MTKP pawh a inpeih tawh.
Kumin inkhawmpui hi Tlabung Pastor Bial-in a thleng dawn a. A thlengtu tur bakah hian MTKP Office lam leh Bial leh Unit hrang hrang atanga palai leh chhimtu turte pawh an inpeih tawh a ni.
He inkhawmpui hi Tlabung Pastor Bial hian inkhawmpui neihna tur atana pandal an sak, ‘Sap Upa leh Pu Buanga Rûn’ tih hming vuaha Licheng Field-a an sakah nghah a ni dawn a, inkhawmpui thupui hi ‘Pathian Hmangaihna’ tih a ni ang.
Inkhawmpuiah hian thupui sawitu tur an awm dawn lo va, Pathian Biak Inkhawm (Vantlang Inkhawm) bikah thuchah sawitu tur mi hrang hrang 6 ruat an ni a, inkhawmpui thupui hi then sawm niin thupui pakhat hnuaiah thupui chhawng hrang vek an sawi dawn a ni.
Ningani zan, thlen kim zanah inkhawmpui hawnna neih a ni ang a. Zirtawpniah Tlabung Biak Inah MTKP Rorel a awmin rorel palai ni ve lote tan Sap Upa leh Pu Buanga Rûnah Pathian Biak Inkhawm buatsaih a ni ang a, chawhnuah Inpawlhona (Fellowship) a awm ang.
Zirtawpni zan, Inrinni zan, Pathianni zing leh Pathianni zanah te Pathian Biak Inkhawm neih thin a ni ang a, Inrinni chawhma lamah thupui (topic) then hrang hmangin hmun 5-ah workshop buatsaih a ni ang a, chawhnuah pandal-ah Mission Pual Inkhawm buatsaih a ni thung ang.
&&&&

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.