Nov. 20 atangin PMJAY; huam zim vangin damloten harsatna tawk

Aizawl: Sawrkar laipuiin mi harsate damdawi inenkawlna tura ruahmanna thar a siam Pradhan Mantri Jan Arogya Yojana (PMJAY) chu November ni 20,2018 atangin Mizorama APL chhungkuaten an hmang thei dawn.

Mizoram State Health Care Society thawktute hnen atanga Zalen thudawn danin PMJAY hi RSBY hmang mekte leh Socio Economic Caste Census 2011 a tel chhungkua te chuan Civil Hospital atanga golden card lain an hmang thei tawh a. A chunga tarlan list-a tel lo APL (Above Poverty Line)-te tan erawh chuan November 20, 2018 atangin hman tan theih beisei a ni tih an sawi.

PMJAY-ah hian damdawi ina inenkawlna senso hi cheng nuai 5 thleng bill theih tur niin natna chi hrang hrang 1390 chuang a huam a; mahse, a zat bituk sa (package rate) a awm vek a. Sawrkar damdawi inah chuan hman theih ni mah se Mizoram chhunga sawrkar damdawi in ni ve lote chuan an zawm duh loh avangin damlo tam takin harsatna an tawk  mek  a ni.

Hei mai bakah Mizoram pawna inenkawl (refer case) neiten harsatna lian tak an tawk bawk a. Mizo mipuiten state pawn damdawi in an pan thin lar tak tak – Medica, Fortis, Birla, Apollo, AMRI te pawm an nih ve loh avangin harsatna tawk an tam hle a. Mizoram Health Care Scheme a tawp tawh bawk si avangin APL chhungkua, cancer leh natna benvawn tuar te an buai hle bawk. PMJAY hian natna inenkawlna ngawr ngawr chauh a huam a, kal velna (transportation) a huam loh avangin damlo tam takin sum lamah harsatna an tawk bawk.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?