November 28-ah Mizoram MLA inthlanpui neih a ni dawn

Aizawl: Mizoram Legislative Assembly inthlanpui chu November 28, 2018 (Nilaini) hian neih a ni dawn a, vote tla te hi December 11, 2018 (Thawhlehni)-ah chhiar a ni ang.

Nimin khan Election Commission of India chuan New Delhi ah press conference neiin Mizoram bakah state dang 4- Madhya Pradesh, Rajasthan, Telangana leh Chhattisgarh state Assembly inthlan hun tur hi a puang a. ECI-in ruahmanna a siam dan chuan inthlan hriattirna hi November 2, 2018-ah chhuah a ni ang a, chuh tumte tan November 9, 2018-ah nomination thehluh theih a ni dawn a, nomination thehluhte chu November 12, 2018-ah endikin inhnukdawk duhte tan November 14, 2018 thleng hun hawn a ni ang.
Mizoram inthlanpui neih tur chungchangah hian nimin tlai khan Chief Electoral Officer SB Shashank chuan press mite a kawm a, inthlan hun puan a nih tak avangin Model Code of Conduct hman nghal a ni tih sawiin hei hi political party hrang hrang leh official-te chu zawm tura ngen an ni tih a sawi a. Inthlang turin Mizoram chu a inpeih tih sawiin ruahmanna engkim peih a nih thu leh MLA bial tinah hmeichhe vote thlakna tur bik leh hmeichhe duty-na tur bik (women polling station) pakhat theuh dah a ni dawn niin a sawi bawk.

Mizoram inthlanpui lo awm turah hian vote nei thei mi 768181 awmin polling station 1164 a awm a, polling station 125-te chu an vote thlak che vel lai en theih (webcasting) a ni ang. Inthlanna atan hian Mizoram police company 48 leh central armed police company 40 rawih an ni dawn a, EVM Ballot Unit 1859 leh Control Unit 1841 hman a ni dawn a, VVPAT, 1751 hman a ni bawk ang. MLA inthlan hnuhnung ber 2013 khan vote tla zat hi 83% a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?