OBPAS tur hiOBPAS tur hi (Editorial – June 3, 2018)

Aizawl Municipal Corporation (AMC) chuan ni 1.6.2018 atanga hman tan turin online hmanga in sak dilna leh pekchhuah ‘online building permission approval system’ hna chu a kalpui tan ta a. OBPAS hi AMC Mayor chuan hawngin India ram khawpui changkang zawkte kalphung ang Aizawl khawpui chuan a zawh ve tan dawn tihna a ni a, mipui tan a that zawk leh zawk loh chu thuhran nise a pawimawh zawk ta ber chu AMC pawh tunlai thiamna hmang tangkaiin thil a ti a, hmasawnna chhinchhiahtlak tak chu a ni.

AMC dan dinglaiah chuan in sa duh reng rengten dilna form siamsa hmanga an dil hnuah chauh AMC-in rem a tih chuan an sa thei thin a. Office dawr nan ni eng emaw zat te hun hman a tul chang a awm thin a; mahse, tuna kalphung thar ‘Online hmanga in sak dilna leh pekchhuahna tur’-ah erawh chuan internet a that chuan hun reilo zawk a duh dawn bakah mahni in lum atang pawhin Officer ten an file an khawih thei dawn tihna a ni a. Mipui tan chuan chak zawka hnathawh a nih theih dawn avangin leh hun sen pawh a tlem zawk dawn avangin a hma ai chuan tha zawk tura beisei a ni.

Aizawl khawpui hi ruahmanna fel nei lova din a ni a, chuvang chuan in sak chungchang leh kawngpuiah pawh duhthu a sam lo hle mai a. Siam that pawh tum ila a harsa hle ang tih a hriat a ni. Mahse, nakin hun zel thlirin ruahmanna felfai a awm loh chuan khawpui chenna tlak lovah kan chhuah dawn avangin sawrkarin ADA (Aizawl Development Authority) atanga bul tanin thuneihna sang zawk nei AMC ten an chhunzawm leh a. Tun dinhmunah duhthusamin hmalak chak theih ni chiah lo mah se khawpui cheina leh thil dang dangah AMC hnathawh hmuh tur a tam ta hle mai a, thil lawmawm tak a ni.

AMC hian rualkhai leh mumal zawka in sak a nih theih nan building regulation te a siam a, he dan hi a tha tawk chiah lo nge sawiselna leh bawhchhiatna a awm tam niin a lang a. Aizawl hi tlangrama awm a nih avangin plan leh drawing ang diak diakin sak a harsa thin a; chuvangin, AMC pawh hian tuna building regulation an neih mek hi tlema an her danglam deuh a ngai niin a lang. Chutih rual chuan AMC building regulation hi mi hausa leh thiltithei deuhte chuan an palzut thin nia ngaihna a awm a. Mi hausa thenkhat phei chu AMC-in a ngam lo ni hiala ngaihna pawh a awm bawk a; chuvangin, AMC hi tun aia khauh leh huai lehzuala a kal a ngai a. Chuti a nih loh chuan mipui rilruah thil tha lo a tuh palh ang tih a hlauhawm hle.

June 1, 2018 atanga AMC-in an kalpui tan OBPAS hian mipuiah awlsamna a thlen beisei ila. AMC thawktute pawhinnasa lehzuala tan lak nan hmang se, online hmanga kalphung thar hian hmasawnna mai bakah mipuite tan awlsamna a thlen ngei i beisei ang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?