Politics Virvel – I

Ber thla kan thleng a, politics boruakin min chiah chho tan ta. Tuna congress hruai sorkar hian harsatna a tawk a nih loh chuan nakum kum tawp lam (December 15,2018) thleng hun a la nei a. Kum khat erh awrh a la awm tihna a nih chu. Party politics inchirhthehna mak tak tak leh nawi tak tak kan hre chho leh zut dawn a, nakum inthlan thlir ranin party tinin hma an la chho tan mek bawk. Tun tum chu, inthlan la hla viau mahse politics chungchang titi nan hmang mai mai ila a tha awm e.
India ram lamah chuan 2014 general election atang khan BJP an lian chho zel a, mahse nikuma state panga MLA inthlannaah kha chuan Assam-ah chiah an chak a, a vawi khatna atan Assam-a BJP chak hian hmarchhak politics pawh a nghawng viau a ni. Puducherry-ah congress an chak thung a, a bakah chuan tualto party-ten hnehna an chang a. West Bengal-ah hneh takin Trinamool Congress an chak a, Tamil Nadu-ah AIADMK an chak chiang hle a, Kerela-ah pawh UDF an chak bawk. Kumin a state thenkhat inthlanah kha chuan BJP in hma an sawn zual hle, state lian ber (MP ngah ber) Uttar Pradesh-ah hneh takin an tling a, India ram politics-ah huhang an nei lian tih a lang chiang hle. Uttarakhand leh Goa-ah pawh an chak a, Punjab-ah congress-in sorkarna an siam a, Manipur-ah seat la tam ber congress ni mahse BJP kaihhruai sorkar a ding thung.
Mizoramah pawh 2013 a MLA inthlan hnuah khan MP inthlan te, VC/Local Council inthlan te, AMC inthlan te, ADC inthlan te a awm tawh a. Heng inthlan hrang hrangah hian mipui vote thlak dan a inthlak nasa hle a ni. A bikin Aizawl khawpuiah hian party-te inbei thawm na viau thin mahse inthlan dawn velah hi chuan vote kal dan tur rin hleihtheih loh khawpin politics thawm tak hi a reh duk thin a. Inthlan result-ah erawh mipui nawlpui (party mi ni lo, ‘neutral’ kan tih te) hian bawh bik party an nei tih erawh a hriat leh thin. Thawm na apiang hi Aizawlah hian an chak thin kher lo.
Tunhma atangin MLA inthlan hma kum hnih vel atang hian party awm sa a tel lem lo an insehmur tuau tuau thin a. Kuminah pawh hian inthlan a chuh tum, registered party ni lem lo pawl hrang hrang an lo lang leh ta. Chung zingah chuan eirukna dotu pawl PRISM hi a lang hma viau a, mahse, an fimkhur vang nge an thawm a la lian tawk lo viau thung. Kum chanve hnu lam atang Zoram Exodus Movement an lo lang leh a, anni hi chu an che chak nghal viau a. Rei lo te chhungin an zin kual nasa hman viau a, mi rin loh zawng takin party an hnim hnai nghal a, party awm sa ZNP leh MPC te leh pawl dangte nen tangrual pawl Zoram Peoples’ Movement (ZPM) nakum inthlan atan an din ta a ni.
ZNP leh MPC hi chu tualto party an ni a, an tan chuan tan rualpui leh thawhpui nei lo a inthlan hmachhawn a huphurhawm viau ang. Chutihlaiin, MNF hian mal din an tum thu an sawi chiang si a, congress lah hian MLA 32 an neih sa avangin thawhpui nei pawh nise seat han theh chhuah tur an nei tlem viau dawn tih a chiang a. Chutihlaia politics tui nu a la inchiah ve lo, ram veitu thahnemngai pawl ding tharte nena thawhhona kawng a inhawng hi chu a lawmawm viau maithei. A tirah khan PRISM pawh hi tel ve tura ngaih an ni a, mahse, an tel tak si loah chuan party lian ang tiat vela inngaiin MLA inthlanah hian thawhpui nei lo a din an tum a ni mai thei. Ti fuh tak ang maw?
Mahse, mipui sukthlek han thlir hian, party mi leh sa ni lote hi chuan MNF leh Congress hruai ni lo (Non-MNF, Non-Congress) sorkar neih ve an chak ni pawhin a lang a. ‘Pu Hawla leh Pu Zorama te hi chuan an tih theih ang zawng chu an ti zo tawh,’ an tih thin ang deuh hi a nihna lai a awm, kalphung thar duh hi an tam ta viau niin a lang. Chuvangin, politics kalphung thar siam duh a, party lian pahnih tel lo a sorkar siam tumte hi an la tangrual tho mai thei a, PRISM leh pawl dangte pawh hi thawhhona huangah hian an la tel lo ang tih a sawi theih loh.
Party lian pahnih INC leh MNF te hi Mizoramah na na na hi chuan an la lian khawp mai. Dik tak chuan ZPM leh pawl dangte hi chuan vote bank nei sa an nih loh avangin bial tin leh khaw tin, ven tinah bul an tan thar a ngai dawn. Khua/veng tam takah phei chuan ipte pui banna zawn chawpte pawh a ngai anga, voter pakhat pawh nei sa loin bial (zero) atanga bul tan an ngai dawn a, lo inthlung nghet sa MNF leh Congress lehthal tur chuan beih fe a ngai ngei ang le. MNF leh congress hi chu bial tinah an intiat sa deuh vek a, neutral vote hip zawk apiang an chak thin; chuvangin, MLA inthlan hunah pawh an langsar leh luah dawnin a lang. Anni pahnih paihthla rual tur khawp hian heng pawlte hian movement an chawk chhuak zo ang em? Mipui sukthlek her danglam thei khawpin huhang an nei ang em? Heng hi zawhna awm mek a ni.
Zirlai pawlten a hun taka hma an lak thin avangin kan hnam hi a la him zel ni pawhin a lang. Chakma chungchang hi tunlaiin kan sawi nasa a. Political party-te hian vote hmuhna hi an thupui ber a nih avangin Chakma foreigner chungchang pawh hi an sawi ngam ngai lo a, CADC thiah chungchang phei chu an sawi ngai tawh lo reng reng. Kan ram hian vengtu a mamawh a, kan hnam hian chhantu a mamawh.
Tun hnai lawk khan supreme court-in Arunachal Pradesh a Chakma leh Hajong refugee-te chu India khua leh tui nihna pe turin a ti a. An buai viau a, an MP chhuanvawr union minister of state (Home affairs) Kiren Rijiju chu an hnam tan a tawng chhuak nghal a, a tanna lam a chiang nghal viau. Mizo mipuite hian Chakma thlavang hauhtu, Mizo hnam aia duhsaktu, dan lo a lo lutte dap chhuak duh lotute hi kan hnawl duh tawh mai ang em? Chutiangin Tuikuk chungchangah pawh a ni tho..Mizo hnam hmangaihtu, kan hnam leh sakhaw himna dah pawimawhtu hi kan ram hruaitu atan kan thlang lo a nih chuan kan hmabak hi a thim mai thei.

— Lalthlamuana Ralte

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?