Press Tour-in Himachal-ah

— C.Lalhmachhuana
November ni 29 atanga December ni 4, 2017 inkar chhung khan Mizoram sawrkar Planning department leh I&PR Department tangkawp ten chanchinbumite tan India ram state danga an hmasawnna leh hnathawhte en tura min thlan ve angin Chandigarh leh Shimla (Himachal Pradesh) te ka tlawh ve zuai a. Hun kan neih tam loh avangin duh angin kan fang chipchiar thei lova, mahse ka zinna atanga ka thilhmuh tlemte han tarlan ve ka duh a ni.

1.Parking chungchang:  Tun lai Aizawl khawpuia kan buaina langsang tak leh chanchinbu lamah pawh hmun luahtu parking chungchanga an hmalakna te mahni phak ang tawk tawkin ka zir ve a. Chandigarh hi phaizawl a nih avang leh ‘plan city’ a nih avangin sawi tam ngai lovah dah ta ila. Tlangrama awm ve tho Shimla chungchang hi tlema zawng sawi ka chak a ni. Shimla-ah hian an kawngpui hi a lian lem lo hle mai a, kan Aizawl khawpui nen tehkhin chuan a te zawk hle a, an kawngpui pawimawh (Main road) ni lo, hmun thenkhat lai phei chu te ve tak a ni. Mahse, heti chung hian keini ai chuan traffic jam a tlem zawk hle niin a lang a, lirthei nise a tam em em a, chumai bakah khualzin (tourist) mi za telin an awmchilh reng mai bawk a. Heti chunga harsatna lian lutuk an neih loh chhan chu parking an neih that vang a ni. Sawi tawh angin hmunzawl zau nei lo mah se an building tam tak kha lirthei dahna ‘multi level parking’ atan an siam a, chhawng 5/6 te kha lirthei dahna atan an siam chuan lirthei thahnem tak an dah thei a, chu chuan an harsatna tam tak a sukiang a, hei hi a tam thei ang ber kan khawpui ah hian kalpui ni ve ta se tuna kan harsatna tam tak hi chu min chhawk ngei a rinawm.

Hei bakah tha em em a ka hriat chu kalkawnga in an sak reng reng kawngkual laiah kawng hnaih lutukin an sa lo va, lirthei khalhtuten hmun hla zawk an hmu thei dawn a. Hei hian lirthei te tan remchanna a siamin chetsualna lakah pawh nasa takin a veng dawn niin a lang a, a tha hlein ka hria.

2. Faina chungchang: State khawpui tam tak ngaihtuah chuan Mizoram mi chengte hi kan faiin kan Aizawl khawpui ngei pawhin hmasawnna tur eng emaw zat la nei mah se a fai thawkhat viau a ni. Chuti chung chuan kawnglaia bawlhhlawh paih chungchangah hmasawn kan la ngai nasa hle niin a lang. Shimla khawpui bawk hi sawi leh ta thin ila, khualzinmi za telin an chamchilh reng chung hian an fai em em mai a, hei hi an entawntlak hle mai. Kan awmchhung hun reilote ah hian zuk leh hmuam ti hmel ka hmu lo a, an Municipal Corporation chuan zuk leh hmuam tihlohna khawpui ah a puang a. Mizorama kan bawlhhlawh tam ber hi khawlaia kuhva eina paih leh meibung paih ni hian a lang a, hei pawh hi entawn a tha hle mai.

3. Khualzin hip- Shimla bik hi han sawi leh ta thin ila engvanga khualzin mite hip em em bik nge anih ka hrethiam chiah lo a, hmun hmingthang leh han chhuan em em tur hi a tam bik lo hle mai a. Kea kalna hmun ‘Mall,’ mipui lenvelna ‘The Ridge,’ sapho hunlaia an biak in sak Christ church, sap hovin nipui laia rorelna in atana an hman ‘Viceregal Lodge’ leh Jakhoo (Jakhu) temple a Lord Hanuman a lim an din te hi a langsar zualte ni maiin a lang a. A tlawh chhan ber nia lang chu an sik leh sa bakah ami cheng ten khualzinmite an lawmna hi niin a lang a, mi tam takin khawlum lutuk tlansanna atan an hmang a, a mi chengten hawihhawm takin mikhual an lo dawngsawng thiam bawk nen khualzin mite a hip ta viau mai niin a lang.

Ka ngaihtuahna a lo lang ta chu Mizoram hian khualzin mite hi kan hip/kolut ve thei a ni tih hi a ni. Kan ram sik leh sa nuam tak hi panchhan tlak a tling a, tuna kan neihsa bak khualzin mite hipna tur thil engemaw 2/1 han siam ta bawk ila, tun aia thahnem zawk hi kan kolut ngei ang tih ka beisei tlat a ni. Entirnan Aizawl khawpui hmun remchang laiah te hian Kristian ram kan nihna tilang turin Kraws lian tawk han hung ila, chutiang deuh bawk chuan engemaw khawvela a ber thil 2/1 kan neih a, a puanzarna lama theihtawp kan chhuah bawk chuan Shimla ang deuh hian Tourism hi eizawnna lian takah kan siam thei ang.

Tun tum kan zinnaah hian Chandigarh-a Rock garden te, Qutub Minar, India gate, Rastrapati Bhavan, Parliament house te a pawn lam atanga kan tlawh bakah kum 1884-a sak Viceragal Lodge (Shimla) te kan tlawh thei a, ka vannei hle. Rastrapati Bhavan leh Parliament House te hi a chhungah lut chiah lo mah ila keini News buaipui thin tan chuan a manhla hle a, chanchinthar kan buaipui zelna kawngah nasa takin min pui dawn a ni. Hei mai bakah India awptu British ten Shimla a nipui chawlhna atana an hman Viceragal Lodge kan tlawh thei kha vannei ka inti a, kan rama chanchintha luh hmain in tha tak mai an lo sa te kha an fin hmasak zia min hmuhchhuah tir a. Chumai ni lovin India independence neihna atana an inbiakna hmun ngei leh India hruaitu hmasate thlalak kan hmu thei te kha a ropuiin ka vannei a, ka tan chuan chhinchhiah reng tlak a ni kumkhua tawh dawn a ni.

Awle, kan zin chanchin hi ziah sen a ni dawn lo a, lawmthu sawina nena hnukhar ka duh a ni. Chanchinbumite hi buai ve tak tak, a chang chuan zing dar 2 ah te chhuah thut thut ngai, 24 hours duty thin te kan ni a. Kan chanchinthar buaipuina atana thil tangkai tak tak hmu thei tura ruahmanna min siamsaktu Mizoram sawrkar, Planning department leh Information & Public Relations department chungah te, MJA hruaitute chungah lawmthu ka sawi a. Tun tum kan zinna hian chanchinthar ka buaipui zelna kawngah nasa takin min pui dawn tih ka hriat avangin ka thawhpuite pawh hi a tam thei ang ber zinchhuak thei se ka ti hle a. Kum dang zelah pawh sawrkar hian ruahmanna min la siamsak zel ka beisei a, a hlawkna pawh kan hmu chho zel ang tih ka ring tlat a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?