Patling than kin tawhin tukthuan vawi khat a ei duh loh chhan hi a ril tlat!
&&&&&

“KA PA’N A PHAL LO”
Mizoram pa lar, pa ropuite zinga mi Pu L. Malsawma Colney, Malsawm Kawlni-a tia mi tinin kan hriat lar kha tum khat chu kan inah a lo leng a. Mission Vengthlanga kan awm lai a ni. Tukthuan ei lai takin a rawn lut a. Mizo chhungkaw hawihhawm tihdan pangngaiin ka nu chuan, “Pu Sawm, ei ve nghal rawh aw,” tih pahin thleng lak kep nghal tumin a tho uaih a. Chuta a chhanna chu :
“Aih, ka pa’n a phal lo!”
Patling than kin zet tawh, a pa avanga hriat hlawh pawh ni lo, “Tu fa nge?” tih zawh pawh ngai lo, amaha Malsawm Kawlni-a ve thei ngat khan a pa phal loh chu zuk ti duh hauh lo a. Mission Vengthlang-ah daih, mi satliah inah, chanchinbu mi leh tuman an umzui hauh lohna hmunah khan chaw kha ei se a pa pawh khan a hre teuh lo ang maw le. Ei ta se tuman kan dem lo ang, keini chhung tak phei chu kan intithei hle tur zawk hi a ni. Mahse a pa’n a phal miau lo a, zuk ei duh hauh lo a! A sawi zuinaah phei chuan, a pa khan, “Mi chaw ei lai i nang fuh a an sawm che a nih pawhin ei suh. An ngaihpawimawh tak tak vang che a ni lo. An ngaihpawimawh tak tak che chuan a hranpain an sawm ang che,” a ti a ni awm e.
Mi ropui hi chuan miin an hmuh leh hmuh loh emaw, an mualpho dawn leh dawn loh emaw, mi an tihlawm dawn leh dawn loh emaw lam an lo ngaihtuah lem lo. An nuna ‘dik leh dik lo’ an neih sa, nu leh pa atangte leh Pathian thu atanga an hriat tawh chu an nunpui reng mai a lo ni.
Chhungkaw ropui tak tak hi an lo tam khawp. Pe berin ro a rel a, nun dan tur fel fai tak a sawi a, chhungkaw zawm tur ‘principle’ a zam a. Chu chu chhungkuain an lo zawm mai thin a nih dawn hi.
Thalaite hian, “Ka pa’n a phal lo,” ti ve thin ila chu kan nun hi a buai nep deuh hian ka ring thin. Nu leh pa thu loa awm, mangang leh si ka hmu hnem tlat! Nu leh pa thuawih hi Pathian thu a ni tih kan by-heart na a rei tawh hlawm nen! Zu ngawl vei, drugs ngawl vei, ruih tur chi hrang hrang dap mekte hi an pate phal loh an tih luih vang chu a ni phawt mai. Kan ramah HIV a tam thu an sawi. Mipui nawlpuiah a darh nasa an ti. Sex atanga inkai kan tam an ti. A hun takah khan, “Aih, ka pa’n a phal lo!” ti ve thin ta se an kai lo mai thei asin! Sawnte hi kan pai lo mai tur! An paten rui lo tur leh dik lo taka sex hmang lo tur an zirtir thin an nih ve ngai chuan!
Harsatna chi hrang hrangin kan thalaite a tihbuai mekna ram, depression kan intihhriatsiak vel tak mai maina hun hlimawm lo, zu zawrh leh zawrh loh mai mai kan politics thu inchuh lian bera kan la hmanna ram siam that nan leh hnam dam nan thuril leh thu thar ropui tak kan mamawh lo. Political party thar te, Ram hruaitu thar leh CM danglam tak pawh a pawimawh ber lo. Pathian thuah let ila, “I nu leh pa thu zawm rawh,” tih hi kan nun kaihruaitu atan hmang ila a tawk viau asin!
Kan ram hian an thu zawm tlak ‘pa’ kan neih ve thung erawh chu a ngai ang. “Kan sawi alawm, an zawm si lo a,” ti mai thin nu leh pa kan awm fur mai. Thuawihna hi a awihtu lam chan chauh a lo ni lo. A thupetu lam hi an lo pawimawh khawp. “A ni thu a nih chuan zawm mai a ngai” tih chi mihring hi an awm tlat. Kan faten kan thu an awih loh hian mahni lam inenfiah a ngai ve lo maw? Ka thusawi hi miin awih tlaka an ruat loh a, an zawm loh chuan a thupetu lam hian zir tur ka nei ve a ni lo’ng maw? Pathian thu zawm tlat nu leh pain Pathian atanga chhuak thu an pek hi zawm a nuam.
“Ka pa’n a phal lo,” tih hi Pathian thu ril a ni e.
Salute to Pu Malsawm Kawlni-a.

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.