Pu Thenphunga Sailo thlah nan

Ram leh hnam hmangaihtu, mi huaisen leh tumruh, hruaitu ropui, hun thim lai bera Mizote thlamuantu, ngaihtuahna fim tak nena ram hruaitu, Zofate insuihkhawmna tura hmalatu langsar, mi rinawm, ngaihdan leh tum dan nghet tak nei, ram tana hmathlir thui tak nei…chutiang miropui Brig. T.Sailo chu zirtawpni khan Zofaten kan chan ta. A pamhmai teh e. Ram hruaitu theuh theuh hi an inang lo khawp mai, an zingah hian mipui hmakhawngai tak tak, dik leh tha ni a hriatah chuan huai taka thutlukna siam ngam, ram hmasawnna tura a ngaihna hria, ngaihdan nghet nei..saphoin ‘statesman’ an tih ang chi tlemte an awm a. Pu Thena hi chutiang mi bik chu a ni.

Sipai lal nia hmingtha taka a ban hnu khan politics-ah lut loin, a lo tum lawk angin tanpui ngaite puiin a hun kha hmang chho ta se, an nupain pharho zingahte khan rawngbawlin hun hmang ta pawh nise mi ropui tak a ni thoin a rinawm. Politician a nihna hian thil danga a ropuina tam tak hi a hliah mai pawh a, sipai huaisen a nihna te, harsatna hrang hrang hnehtu mi tumruh a nihna te, lehkhathiam filawr a nihna te kha theihnghilh chi a ni lo ang. Ngaihnawm taka ama chanchin sap tawnga a ziah ‘A Soldier’s Story’ atang mai pawh khan thu leh hla lama hlawh-tling thei khawp a thuziak thiam a ni tih a lang reng. Mi bik tlemte chauhin an neih hruaitu ropuizia (leadership qualities) a nei ngawt pawh hi a chungnun bik zia tichiangtu a ni, a hnung zuitu leh a vanglaia atchilhtuten an thlah thei tawh lo a tih ngam, politics thila ngaihdan inan loh vanga party danga awm tawhte pawhin an la pu reng a, an zah ngaiin an la zah reng a ni.

Sipai atanga a chawlh khan rambuai lai a la ni a, Zoramah lo chuang chhuakin India vai sipaiho vanga mipui tawrhna rapthlak zia a mit ngeiin a hmu a, hmun hrang hranga a zin kualnaah mipuiin vai sipai sual tak tak laka chhantu an mamawh zia a hria a. Amah avang hian mihringin dikna/chanvo (Human rights) kan nei tih Mizoten kan hriat phah a, prime minister hnenah Mizoram a human rights bawhchhiatna a nasatzia leh mipui tawrhna rapthlak tak chu a thlen a. Pu Thena kha kan ram mamawh chhanna a ni tih loh rual a ni lo. Politics leh thil danga a hmingthatna piahlamah mipui thlamuantu leh an dikna chanvo humhim saktu a nih vang chauh pawh hian he hnam hian a hre reng ang.
Mipui nawrna avangin politics-ah a lut zui a, a tum loh zawngin a kal zel a, mahse, chief minister a nih hnuah pawh mi rinawm leh mi dik a nih thu hi phat rual a ni lo. Politician dangte ang bawkin sawisel leh beih a tawk nasa a, ram hruaitu lu ber a nih avangin tih dik loh pawh a nei nual, phat rual a ni lo. Mahse, chief minister kan neih tawh zingah chuan sulhnu nei tha ber, hmathlir nei thui, taimak leh huaisen thuah pawh langsar ber, dikna leh rinawmna lama chungnung ber, ngaihdan tumtlang ber a ni, te pawh ti ila kan sawi sual lo ang. Kum 2001 a MZP buatsaiha mipui ngaihdan laknaah Mizoram politician zinga corruption-a fihlim ber a thlan a ni a, politician za tel fe zingah he chawimawina ropui tak hi ani aia phu an awm lo. Chumi hnu kum sawmah 2011 khan tualchhung chanchinbu lian ber Vanglaini buatsaih Mizo Award hmasa ber pawh a dawng bawk a. A lal tawh loh hnuah pawh a ropui zia kan hre deuh deuh tihna pawh a ni thei ang.

Zozam (weekly) kan enkawl lai khan vawi hnih lai Brig T.Sailo hi kan kawm ve a. Ni 24.7.2010 khan ka thawhpui Lalhruaitluanga Chawngte nen a chenna inah kan kawm tum chuan zalen takin, tuma chim buai lohin kan titipui thei a, a beng tha tawh lo mahse a rilru erawh a la fim hle a. Kum 88 mi, tual lim peih tawh lo a inchhunga inkhung reng a ni chungin ram tan, Mizo mipuite tan hian a ngaihtuahna a la seng nasa hle a ni. Chumi tum chuan politics-a a luh dan kan zawt a. Human rights bawhchhiatna hluar zia a hmuh vanga prime minister hnena lehkha a thawn hnuah a tih tur zo fel a inngaiin Shillong a chhuk leh a tum a. “Mahse, thian thenkhat thahnemngaiten Mizoram a awm turin min ngen a, ‘party din ila, min hruai teh’ an ti a. Mahse, chu chu ka tum a ni miah lo a, engtia tih tur nge pawh ka hre lo a.. 1978 khan mipui kan kokhawm ta a, political party din kha an rawt ta a. Hruaitu turin min duh a, ka inngaihtuah viau a; mahse, Zoram hmun hrang hrang atanga lo kal mipui khan min nawr nasa a….inthlan a lo awm a, kan tling nasa ta em em mai a, sorkarna kan siam ta a, chief minister-ah min ruat a..ka tum ni loin, ka duh vang pawh ni loin, mipui nawrna vangin party a ding a. Inthlanah kan tling a, chief minister-ah khan min nawr a ni ber mai,” a ti.

CM a nih chhung hian ram tan theihtawp a chhuah a, rambuai lai a ni a, UT kan nih lai a ni bawk a. Chuti chung chuan a vei em em ram hmasawnna ruhrel din turin a bei chiam a. Lengpui Airport te, Silchar-Aizawl-Lunglei-Saiha kawngpuite hi a hmalakna kal zel lo puitling ta a nih thu a sawi a. Lui dung kawngte, kawlphetha siam chhuahna hrang hrangte pawh hi a bul tantu a ni bawk. Khatih hun laia mithiamten ram hmasawnna atan hmalak dan tur an sawi thin ‘Basic need approach’ pawh a tuipui hle a, a party pawhin vawiin thleng hian thupui berah ‘six basic needs’ an la nei a nih hi. Ram hmasawnna a tuipui rualin, “Ka ngaih pawimawh ber puitling ta lo chu kum khata buh vawi hnih thar hi a ni. Hemi atan hian theihtawp ka chhuah a, mahse a puitling ta lo a nih hi,” a ti.

Ram hmasawnna atchilhtu ni mah se chu ai chuan hnam himna ngai pawimawhtu a ni tih hi thangtharten kan hriat a tha khawp mai. Sairang thlenga rel kawng sial a duh loh chhan pawh hnam dang lo lut tur dan a har anga, min chimral mai ang tih a hlauh vang a ni. Zofate insuihkhawm lehna tuipuitu a nihna pawh hi theihnghilh phal chi a ni lo ang, chumi atana hmalatu pawl ZORO pawh hi a ho a din a ni nghe nghe.

A chanchin hi sawi tur tam tak la awm mah se MLA a nih tawp lam July 24, 2013-a Assembly House-a thlahna thuchah a sawi tum a a ngaihpawimawh ber ber pathum hian tlangkawm ta ila.

“Pakhatna chu, Zoram mipuite aiawh tura thlan tlin MLA-te hi eng party mi pawh ni ula, Mizoram Hmasawnna hi atchilh berah lo nei thin ang che u. Pahnihna chu, Kan ram hmasawnna daltu ber chu Hlemhletna (Corruption) hi a ni a, chuvangin, he House hi hlemhletna dona hmunpui berah lo nei thin ang che u. Pathumna chu, Rinawmna, Dikna, Taimakna leh Tlawmngaihna te vawn nun zelna kawngah he House-a member ni tawh phawtte chu hmahruaituah lo tang thin ang che u.”

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?