Aizawl; Women Centre, Phunchawnga puanthui (5th Batch) leh puantah (3rd Batch) hawnna hun chu Thawhtanni khan hman a ni a, Rev. B.Sangthanga, Executive Secretary i/c Kohhran Hmeichhiain a hmanpui.

 

Hawnna hun hi K.Lalliantluangi, Inkhawmpui Lian Chairman-in a kaihruai a, Lalpianthangi Hrahsel, General Secretary-in inhmelhriattirna hun hmangin R.Lalrinpuii, Superintendent-in hostel dan leh hrai a sawi a. Rev. B.Sangthangan thu sawiin a duh apiang tan thusawina hun hawn a ni bawk.

 

Kumin 2019 hian puan thui zir tur mi 40 leh puan tah zir tur mi 6 lak an ni.

 

Mizoram Presbyterian Kohhran Hmeichhiate enkawl, Women Centre hi kum 2015 khan Rs. Nuai 500 chuang senga sak zawh a ni a, July 2016 atangin puan thui zirna hi kalpui tan a ni a. A tirah chuan thla ruk (6) course a ni a, tha zawka hriatna avangin kum 2018 atang khan kum khat course a ni ta a ni. Tum khatah mi 40 zel zirlai lak thin an ni.

 

Women Centre hi hlawk zawka hman tangkai tum zel a nih angin July, 2017 atangin puan tah zirna kalpui belh leh a ni a. Zirlai hi tum khatah mi 10 lak tur a nih laiin mi 6/7 vel chauh zirlai hmuh thin a ni a. Kohhran Hmeichhia pawhin seat luah khat kim thei tura hmeichhiate zir duh pung zel tura an duh thu an sawi a ni.

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.