PUC Grand Celebration hmang; Ei bara intodelh hi hnam zahawmna: Hawla

Aizawl: Nimin chawhnu dar 1:30 khan Pachhunga University College chuan an college campus chhunga PUC Multi Complex Auditorium ah PUC Grand Celebration an hmang a, Chief Minister, Lal Thanhawla chuan khuallian niin a hmanpui.

Khuallian Chief Minister, Lal Thanhawla chuan thu sawiin Pachhunga University College chu premier college a ni tiin mi ropui tak tak a chherchhuak tawh tih a sawi a, chu college zirlaia an ni thei chu a lawmpui thu zirlaite hnenah a sawi. CM chuan zirlai te tan nu leh pa te zah a tul thu sawiin nu leh pa leh aia upa te zahna chang hriat chu Mizo ze mawi lan chhuahtirna a nih thu a sawi a, Mizo ze mawi chawi nungtu ni turin zirlai kalkhawmte a chah bawk.

Lal Thanhawla chuan tun dinhmuna Mizoramin a mamawh ber chu moral reformation a ni tih a sawi a, chumi tur chuan zirlaite chu innghahna an nih thu a sawi a. CM chuan amah pawh Pachhunga College ah a kal ve thin tih sawiin, “A tirah chuan Aijal Club ah te, Theatre Hall ah te kan kal thin a, vawiina an campus hi ka hmu a, ka lawm hle a ni,” tiin a sawi.

Chief Minister chuan ei leh bara intodelh chu hnam zahawmna a ni tih sawiin Mizoram chu thlai chi tinreng that duhna a nih thu a sawi a. Ei leh bar leh sum leh pai leh kawng kawng hrang hranga intodelhin khawvela inphochhuah tum a nih thu a sawi bawk. Zirlaite chu ram nghahfak an ni tih inhriaa chhunglam leh pawn lam nun uluk turin khuallian chuan a chah bawk.

PUC Principal Dr. Tawnenga pawhin thu sawiin college tana sulsutu zawng zawngte thawh rah an seng tih a sawi a, zirtirtu leh zirlai thahnemngai an neih avanga a par an tlan mek thu a sawi bawk. Dr. Tawnenga chuan state sokar in central college nimahse an college chu a ngaihsak thu a sawi bawk.

PUC hian NAAC Accreditation A+ Grade, Indira Gandhi National Award leh 15th MZU Annual Sports, 2017 a overall Champion an nih te chu a hlawmin PUC Grand Celebration tiin he lawmna hun hi an hmang a. Tlaiah chaw hlui an kil ho nghal a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?