Zirtawp zan khan Mizo Idol star hlui Rachel Lalnunkimi chuan a single music video pahnih chu a release ta.

 

Chanmari YMA Hall-a Mizoram Premier League (MPL) season 7 kick-off neihnaah hian, Rachel hian kumina a music video hmasa ber ni bawk chu, a perform hmain a release a. A hla thar title chu ‘Mai A Lum E’ tih a ni.

 

Kum hmasa lamah a debut music video ‘Ka Phur Zo Lo’ a release hnuah TV lamah kan hmu chhunzawm tam lem lo a. Chutih laiin, zai tura sawmna dawng tam ber pawl a nihna chuan track thar release tur buaipuina hun a neih tlem phah tih chu phat rual a ni lo. Mahse, hun eng emaw chen music video thar nei loa a tawmim hnuah, ‘Mai A Lum E’ tih chu a rawn release ta a ni.

 

A debut single leh tuna a track thar — Mai A Lum E — tih chu a indanglam hleih viau. A hma kha chu hla muang leh lungkuai tak mai a nih laiin, a pahnihnaah chuan a ze danglam tak mai chu a rawn thawhchhuahpui a, music video-a zahawm hmel taka kawr fual nena a inlan tawhna chu rawn thai chhiain, singer satliah mai ni lo a, performer a nihna chu a takin a rawn pho chhuak ta a tih theih awm e.

 

‘Mai A Lum E’ tih hla hi kumin tir lam atang daih tawhin Rachel hian a buaipui tan a, mahse, a khawrpum hleihtheih loh avangin release loin kumin hi a tawp pui leh mai dawn emaw tih hnuah, Mizo designer, Escape Engmawia, nen intawngin, an thawhdunna hnuaiah ‘Ber’ thla tira an tichhuak thei ta hram a ni.

 

Rachel chuan, “Ni e, kumin tir khan ka buaipui a. Mahse, programme neuh neuhte vanneihthlak takin ka neih ve thin a. Hei vang hian hma pawh ka la chak hleithei lo,” tia sawiin, “Ka tichhuak thei dawn lo takngial dawna a lan laiin, Mawitea (Escape Engmawia) nen thawhdunna tha tak kan nei thei a. A ni hi awm lo se release lohin ka la dah reng hial mai thei,” a ti a.

 

“Ka music video, keima single ang chuan pahnihna tur a ni a. Kan tang ve khawp mai. A pakhatna aia tha zawka tihchhuah kan tum avangin hah pawh kan hahpui hle,” tiin Rachel chuan a sawi bawk.

 

Rachel hla thar hi Mystic Sailo phuah a ni a. A track hi Nunzemawia siam a ni a, recording hi Foster (Valtea) leh Thangbawiha te kutchhuak a ni a. A music video hi mawi tak maiin ROAR! Media Production chuan an siamsak a, a video-a a thawmhnaw vel chu Escape Engmawia kuthnu a ni thung.

 

Music Domain Mizoram (MDM) library hnuaiah ‘Mai A Lum E’ music video hi ziah luh a ni a. Chuvangin, YouTube lamah chuan pho chhuah lawk a nih hmel loh.

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.