Raltlante kan enkawl zel: Lawngtlai DC

Aizawl: Lawngtlai Deputy Commissioner Dr. Arun T chuan Myanmar Army leh hel pawl, Arakan Army te inkahna avanga himna zawnga lo lut raltlante chu an enkawl zel niin Zalen a hrilh a, lo lut an awm belh thu hriat an la nei leh lo niin a sawi bawk.

Lawgtlai DC chuan raltlante chu sawrkarin a enkawl zel tih sawiin tunah hian an hriselna endik turin District Administration lam tirh doctor 2 leh Assam Rifles doctor 1-in an vil reng niin a sawi. Doctor pathumte bakah hian hriselna endik turin health worker 2, Laboratory Technician 2 leh ASHA lam thawktute’n an vil reng niin Zalen a hrilh bawk.

Dr. Arun raltlante hriselna uluk a nih thu sawiin an tlan luhna khaw mipuite hriselna leh chhawmdawlna hna thawktute hriselna khawih pawi thei an rawn thlen loh nan uluk taka enkawl zel an nih thu a sawi a. Awareness campaign pawh raltlante zingah neih char char a nih thu a sawi.

Thosi len te semin ekin pawh siam sak an nih tawh thu sawiin malaria pf vei hmuhchhuah te pawh an neih zel thu a sawi bawk. Raltlante chu ration leh thil dang pekna turin DC Office lam atangin registration tih a nih thu DC chuan a sawi a, silpaulin te pawh sem a niin an mamawh tur ang chu ngaihtuah zel a nih thu a sawi bawk.

Raltlante venhim hna thawk turin Mizoram police atangin armed police 8 dah an nih thu leh Assam Rifles sipai eng emaw zat dah an nih thu DC chuan a sawi a. DC Office-in raltlante chhiarna an neih hnuhnung berah chuan mi 1157 an awm a, Zochachhuahah mi 250, Hmawngbuchhuahah mi 224, Dumzautlangah mi 240 leh Laitlangah mi 443 te an ni a, Myanmar-a Satanguah, Phaleuah, Pakauah leh Varang khua atanga lo lut an ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?