Ram hmangaihtu tehna atan Ramri, Tuikuk, Chakma hmang ila a dik em? – JH Lalngilneia Pu

Khawvela hnam finga an lo chhiar hmasak Grik hnam, Socrates-a chuan, “Politic kan khel a nih chuan, ram leh hnam leh sakhua a him dam tur a ni,” a ti an ti thin a, heihi thudik a pawm a ni.

 

Hetiang rilru pu hian rilru fim tak puin kan ram politic hi kan kalpui a tul hmel hle. Siam that harsa lutuka kan ram a luh hma hian thanharh a va tha em! Ram leh hnam leh sakhua a dam theih nan, keimahni mi mal hamthatna, thlemna te chân phal huama tan lak a ngaih hun lai tak a ni. Sum leh thil dang nena nena duhsakna langah te, hetiang hmathlirtu politician or party lakah rilru fim neih a hun hle.

 

Ram roreltute thlanna, General Election kan hma lawkah a awm dawn ni awm tak a ni. Mizoram hian thinlung taka hmangaihtu a mamawh. India khua leh tui ni chungin kan ram hi thinlung takin a hmangaih theih. Central thluak suk loh leader, ram tana huaisen, Arunachal CM, Nagland CM te aia huaisen, Mizopa, a ngaihna hria, huaisen kan mamawhna, ramri buaiah te, kan mikhual cham rei tate huangtau leh an finzia, anmahni hnama an chianzia thlirin, Pathianin kan chenna tur ram min pek humhalh ngam kan mamawh hle.

 

Development lam hi chu eng party pawhin sorkarna chang se, nachang an hriain ka ring a. Thlai tharte pawh a market tha tur leh kuthnathawktute tidawng lo zawnga hmalak dan tur an ngaihtuah thei turah i ngai chhin phawt teh ang. A pawimawh ber chu, kan sakhua leh kan hnam damna tur mi huaisen, Pathianin ram min pek chhan hrethiam, kan Mizo Lalten nunna leh thisen senga an lo humhalh tawh, venghim zel theitu leader tha ram leh hnam hian a mamawh zual ta niin a hriat theih.

 

Ram leh hnam himna tur leh ram tana hmasawnna tur, NGO-ten thlan tla bata an hrilh leh an nawr an nawr ngai lo, sorkar leader tha Mizoram mamawh chu a ni. Kan hmaa inthlan lo awm tur hi, Mizoram tan nunna nge thihna? Malsawmna leh anchhiain min hmuak reng a. “Thlemna turu tak sum, tangka, i inah a lo leng a nih pawhin i ram leh i Pathian phat lo turin inralring turin Pathianin min duh,” pawh ti ila kan sawi sual tam lo vang chu !!

 

Kan mikhual cham rei, kan vulh len takte bum leh tihbuaiin kan awm mek a; kan sorkar hnathawkte thlengin a thlawnin an va buai tam ta em! Mi state-a an duh thu ngeia awmte a thlawnin a va luangral tam tawh em! Kan leader-te hi central leh Bru hote hnenah thu dik sawiin huai takin tawng chhuak se chuan he buaina hi a reh daih tawh ka ring.

 

Tuikuk leh Chakmate heti em ema an pun chak dan an rawn ziah chhuah khan, ramri venna leh anmahni enkawlnaah kan thawh that tawk lohna a lang nasa hlein a hriat theih. Heng hnam pahnihte hi keimahni leh keimahni inkarah remna tichhetu a la ni ang tih hlauhthawnnain a chang chuan kei putar pawh hi ka mangang fo thin.

 

Assam state chhunga khua leh tui nihna (citizenship) nei lo, mi nuai 40 chuang awm mek lakah pawh, kan rama lo lut lo tura venghimtu sipai, police dah chungchangah pawh NGO-ten nasa taka an nawrnaah thuneituten, “Kan dah daih tawh,” an tihte kha a dik turah ngai ila. Tuikuk e-roll revision neih tur chungchanga NGO leh mi dang dang ngaihdan sorkarin a rawn emaw tih laiin, revision-tu turte chuan a hmun an thlen tawh thu hriatzui a ni maite kha min va tiphu nasa tehreng em!! Mipui min hmuh dan a mak ka ti.

 

Kan politician-te hian mipui hi min va bawl nasa em! Thlantlin an niha pawisa an sem theih zat tur nen lam min thlem hlawm chu a ni ta ber a. Party thenkhat phei chuan, sual sim tur ngah inti em em chungin, min thlang tling ula kan sim ang, an ti emaw ni? Lu tihai tak an ni. Democracy pawh lal rei lutuk chuan democracy ni reng siin, dictator system-in hriat loh karah kan kal duai thei dawn a tih theih rum rum mai. Thuneihna leh lalna chang reite hi chu kan inhlauhtlawnsiak mai ang tih hlauhthawn theih tak a ni.

 

Pastor Chhawna inlarnain, “Kan ram chu nu tak, pa tak zawngin an lo vei huai huai mai a,” a tih hun kha kan tawh mek hun hi a ni ang em? tih pawh ngaihtuah chang a awm thin. ‘RAM LIM’ a hmuh dan kha, “Milim lianpui mai hi a ding uaih mai a. Kan ram chuan ropui châkna leh fin châkna a melh kuau mai a, a ke pen dan tur erawh chu a hre lo va. A rilru then vel chuan sual a fu ngei dawn hian a lang a. Mi intodelhte a hria a, a la intodelh si lo va, mi fing nungchang a awt a, a fing si lo va; mi nuamsate khawsak dan a hmuin a hria a, a la nuamsa si lo va. A ke a pen apiang hian a kalkawi chhur mai a, a hnung lam sam chu a hmalamah a theh chhuak a, a hmai a hliah zo va, a mit naute a hliah ta a. Kal ngil rual a ni ta lo. A rilru chu thutak nen a inpersan huh mai a. Chu chu kan ram hi a lo ni,” a ti a. Kan tun dinhmun nen ‘ram lim’ a hmuh hi a ni thei em?

 

Kan thupui, a head-a kan tar lan tak, “Ram hmangaihtu tehna atan ramri, Tuikuk leh Chakma te hmang ta ila a dik thei em?” tih a ni a. Kan mikhual cham reite hnawksak dan tur chuan bul a tan chauh a ang, a zualzawpui vaihlenhlo, a thlen hmain politic a thanharh deuh a that hmel. Kum 1972-ah tul lo puiah Chakma Autonomouse District Council kan lo pe tawh bawk nen. Tuna an pun chak lutuk dan hian hnam pawi a khawih tan a. Tuikuk relief camp-a awmte lah kum 4 chhungin sing thumin an pung thei a. Kan ram leh hnam damna tur tak tak ngaihtuahtu atan NGO-te chauh an tawk lo, sorkar leh mipuite mawhphurhna a ni tih hriat thar leh a hun hle. A siam thatu ni turin hawi zau deuh ang u.

 

Kan zirlai pawl (MZP)-ten kan ramri venhim a tulna NRC avanga theihtawpa nawr reng lai leh, political party thenkhat-te pawhin sorkar beng hriata an nawr laiin sorkar chuan, hetianga an rawn sawi hmain ramri venghim turte chu dah fel vek leh thuneitu hnenah pawh lehkha nen umzuia a sawi laiin, zirlaite chuan engmah a tak hmuh tur awm lo anga sorkarin, anmahni ram venhim hna chu an theih anga, kalpui an tum thu an sawi khan, thudik hi hriat kan va duh em!!

 

Sorkar thuvawn, “Rorelna dik chu lui angin luang sela, Dikna chu luipui angin luang rawh se,” tihte kha a taka hman a ni ta lo em ni? Pastor Chhawna inlarnain, “Thu dik chu hriat theih loh khawpin dawt a tam,” a tih hun kha ramin a tawk mek em ni zawk? Mipuite u, ramka luak eitu nge in nih dawn a, Mupui luak eitu? Thinlung taka kan ram dinhmun hi ngaihtuah a tul ta niin a lang.

 

Sorkar tih tur niawm tak tih vat a nih thin loh avangin MZP-te hian hnam dang kan rama khawsa thin dap chhuah hna an thawk thin hi, missionary hna ropui tak an thawk thin hi, an hlutzia hi mipuiin hre reng thei ila. Election chungchangah, mipuiten, party hotute thu aiin, kohhrana hruaitute duh dan zawm theih nise, ram hian malsawmna a dawn ngei a rinawm.

 

Tuikukin kan sorkar leh mipui zah loh dan leh nuthlawi zuama min zuam dan hi, kan state head hian huaisen takin hma la thei se, tih kan ram mamawh niin a lang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?