Ram hruaitu atan tunge kan thlan ang?

MLA inthlan a hnai zel a, politics inlumlet a ngaihnawm tan hle mai. Party lian pahnih congress party lehMNF ten bial hrang hranga candidate tur an thlang fel nual tawh a. Chutihlaiin, ZPM leh PRISM pawhin tan an la nasa hle a, bial thenkhat a candidate turte pawh an ruat fel chho mek a. BJP pawh hian bial thenkhatah chuan candidate tur an tifel tawhin a lang bawk. Heng party party-te behchhan lem lo vei neih vanga MLA chuh ve ngei tum pawh an awm maithei bawk.

Politics ngaihven ve tho si, party a inhmang lem lo, mahni phak tawka ram leh hnam vei ve tak te, ram hruaitu kan neih mekte duh khawp lo te eng emaw zat an awm a. A nihna takah chuan party ruih chilh lo leh party-a telna nei lo ‘neutral’ kan tih te hi sorkar siamtu ber zawk an ni a; bial tinah hian anni hi tanrualtir a, an vote hui khawm thei an awm chuan an tling maiin a rinawm. Chutianga party-a telna nei lem lo, ram leh hnam siamthat tak tak duh, sorkar tha neih duhte hian tu hi nge kan vote tak ang le? Kan lo thlan tlin tawh te hian tuna kan dinhmun hi min hruai thleng a ni a, tun dinhmunah hian kan lungawi em? Kan vote hmangin sorkar tha hi kan siam thei tak tak ang em? Zawhna a tam hle mai.

U.T. hun tawp lam kum 1984 khan remna leh muanna campaign auhlaa hmang congress party a vawi khatna atan Mizoramah an sorkar a. Chuta tang chuan party lian pahnih – MNF leh Congress hruai sorkar kan la hrawn chhawk chho char char a. State kan nih hnuah chief minister pathum – Pu Denga, Pu Hawla leh Pu Zorama te kan nei tawh a. A bikin Pu Lalthanhawla leh Pu Zoramthanga phei hi chuan mi tam tak hne khawpa rei ram an hruai tawh a; ram hmelhmang nasa taka tihdanglam theihna hun tha pawh an nei bawk. An lakah hian mipui beiseina pawh a sang thin viau a; mahse, kan ram an hruai thlen theih chin chu tuna kan dinhmun hi a ni, kan hre vek a, zep thu a awm lo.

Mi thar, kalphung thar kan beisei fo a, mahse, anni pahnih aia lawk hi an party chhungah an la awm si lo a. Sorkarna siam thei khawpa lian party dang an vang si a, chief minister ni thei tur khawpa huhang nei lian dang an awm meuh si lo. Kan ramah hian kohhran hi a pawimawh hle a, Chanchin Tha zar kan zo nasatzia ngaihtuah hian Kristianna laimu hi vawng nung reng tur kan ni. Chuvangin, court-a thubuai nei mek ni lo, kohhran pawisa tak leh Pathian tih tak hruaitu nei tur hi chu kan ni maw le. Chutiang a nih lai chuan tun tumah hian eng rilru puin nge vote kan thlak tak ang le?

Mizoram political history kan thlir chuan party hrang hrang ding a tam tawh hle a. Tam tak chu rei daih lo a zuih ral ta te, party danga inchhung leh party dang nena inzawm ta te an ni hlawm. Tunhma atangin party lian tak, inkhing tawk deuh hi pahnih aia tam hi an awm theih meuh lo a ni ber. District Council hun tawp lamah Mizo Union kha Congress party-ah an inchhung lut a, national party lian tak a lo ni ta a. Chumi hnuah P.C. party a lo ding chhuak a, congress nen an inbei tawk chho hle a. Mahse, state kan nih hnuah P.C. party an tlahniam tial tial a, MNF an lian tial tial thung. Tun thlengin Congress leh MNF hi khaw tin leh veng tinah inbei tawk ber an ni ta reng a ni. Kan ramah hian, sawi tawh angin, national party lian pakhat leh state party lian pakhat aia tam an awm thei lo a ni ber awm e. Chuvangin, MLA inthlanah pawh heng party lian pahnihah hian duh kan thlang leh mai dawn tihna a ni mai ang em? Nge, anni thlak dan tur kawng kan zawng dawn?

Mipui zingah hruaitu thar leh kalphung thar duh an tam hle a. Thil tha duh, hlemhletna leh induhsakna uchuak ning hluah hluah te, hmasawnna rualkhai lo lutuk vanga tuar mek te, retheihna hreng atanga tal chhuak hlei thei lo te, bumtu ngaiin an bum nawn leh thin avanga beidawng ru em em te hian tunge an vote tak ang? Vote thlak loh aiah tiin NOTA ah an chhu mai dawna mi? Dik tak chuan party tan bur nei lo, duh duh thlang thei ‘neutral’ kan tih mai te hi sorkar siamtu ber an ni. Bial tinah hian MLA a dingte hian an hriat chian em em chu an party mite vote chauhin a tlin theih loh tih hi a ni, neutral vote hmu hnem apiang an tling zel a, chutiang mite hmin tum chuan an bei thin. Anni hi inthurual ta se chu MNF leh Congress ni lo sorkar a piang thei mai awm asin.

Tunhnai lawk khan Branch KTP pakhatin Political Awareness Campaign hun min hmantir a. ‘Tute nge kan vote ang?’ tih chungchanga ka ngaihdan ka sawi a – Mi tak tak, mi rinawm leh rintlak, taima leh huaisen (Moral values nei sang tak) leh Kristian nun dan tha vawng nung, kohhran bel mi (Christian values ngai pawimawh) hi vote ila. Ram hruaitu tha, dik leh rinawm kan nei mai ang. Chutiang mi chu candidate zingah an awm theihna turin hmalak a ngai. Bial chhung thalaite hian kan bial MLA a ding tur chuan mi tak tak, rinawm leh rintlak, vua’vang leh party mi leh sa sawi lo a puih ngaite duhsak tur, hlemhletna laka fihlim tur chauh kan duh tiin kan nawr a ngai ang. Tun inthlanah hian mi tak tak, ram leh hnam vei tak tak, mi dik leh rinawm, taima leh huaisen MLA 10 tal thlan tur awm se, thlang tling ngei bawk ila, kan ram hmel a danglam awk thei ang.

Dik tak chuan mi thenkhatin inthlannaa tlin tuma an beih dan te hi chu a Mizo loin, a Kristian lo thin ngawt mai. Bial vil kan tih te hi an tlin theihna tura sum ren lo lutuk te, vote beisei vanga mi dang tanpui thin te, damlo kan thin te, mitthi ral thin te, chawei khawm buatsaih thin te, etc., an nia. Inthlan hma hauha sum an sen hnem avangin an tlin hnuah a tam thei ang bera inhaivur an tum ngei dawn ania. Tlin duh vang ngawt a, ram pum huap ngaihtuah chang lo a, mahni bial hamthatna chauh ngaihtuah thin (District sawi hmuh a, nawrpui chiam te, etc.) te hi kan politician-te phak tawk a ni rih si a. Heng hi kan hnawl ngam ang em? Tun tum chu politics tui nu a la cheng ve lo thalai rualte tal hian candidate tha leh rintlak chauh vote turin rilru siam ila, an tlin hlauh phei chuan kan ram rorelna hian awmzia tlem tal chu a nei ngei ang.

Zo pa kan tih hian mi inngaitlawm, mi rinawm leh rintlak, ngamthlemna nei lo, mi huaisen, mi dik tihna tluk a ni a. Mi dangte harsatna siamtu ni loa theihtawp chhuaha tanpui thin, mi taima, chapo lo leh duham lo, hautak lo leh nuntlang tak ni turah a ngaih theih a. Kan rilruah chutiang mi chu mi tak tak, an hmel en ngawt aia zahawmna nei ru tlat, tawngkam dengkhawng taka mi dangte bei pung pung ngai lo, Zonun ze mawi vawng tlattu… Zo Pa dik tak vote tur i zawng ang u. Chutiang mi chu party-te pawh hian vawrh chhuak rawh se. Party lianin an vawrh chhuak duh lo a nih pawhin party tenau zawk emaw independent a ding emaw pawh ni se thlan mai turah ka ngai.

Kum 2004-a U.S. president an thlan tum khan president ni lai mek, George W.Bush kha a tlak ngei a rinawm a. Opinion poll hrang hrangah pawh Democrats candidate Senator John Kerry aiin a hniam zawk a. Irag indona avangin American-ho an lungawi lo a, an economy a tlakhniam avangin sawisel a tawk nasa a, a foreign policy duh khawp lotu an tam a, chutiang chuan thil (issue) dang dangah pawh G.Bush duh lotu an tam viau. Hollywood milar hoin John Kerry an zui dul dul a, na takin George Bush an sawisel luai luai a. Mahse, an inthlang a, mainstream media ho leh political analyst-ho rin loh deuhin George Bush kha a tling leh nawlh mai a. A tlin nawn lehna chhan ber chu American-ho hian an ram hruaitu lu ber atan hian thil dang zawng zawng aiin an ‘Moral Values’ an ngai pawimawh zawk a lo ni. Economy an dah pawimawh viau laiin Moral Values an dah pawimawh zawk daih a lo ni a, chumi hmang chuan an teh a, John Kerry aiin George Bush chu an dah sang zawk a lo ni. Chumi awmzia chu mi tak tak, mi rinawm leh rintlak, thutlukan siam tura huaisen thil tha a nih chuan kalpui pawp ngam tur chi an duh ber a ni.

Kan ram hruaitu nih tumte hi eng angin nge kan teh ve hlawm le, an sum lak luhna kan thlir ngai em? An hausakna hi kan en ber em? Sum an ren loh vangin kan duh mai a ni em? An zara hna hmuh theih inbeiseina avangin kan vote dawn em? Chhungkhat laina leh thian an nih vang ngawtin kan vote dawn em? Heng hi tehfung atana kan hmang zel a nih chuan kan ramin harsatna namen lo kan tawk thuai ang. Chutiang ni loa Pathian tih mi, mi tak tak, rinawm leh rintlak, huaisen leh dik, kohhran bel tlat, hausakna aia hmingthatna ngai pawimawh zawk, ram leh hnam hmangaih tak tak tlemte pawh kan thlang tling a nih chuan kan hmabak a êng viau ang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?