Ram humhalh leh Kangmei

– Rin Sanga

Hman ni deuh mai khan CYMA chuan kumin atan an thupui ‘Ram leh Hnam Humhalh’ hawnna inkhawm ropui tak an buatsaih a. Kum tam tak chhung chu he thupui tihlawhtling tur hian hma nasa tak an la tawh thin a; ram pawhin a hlawkpui nangiang awm e. ‘Ram’ han tih hian a chhunga cheng mihring leh leilung bakah nungcha zawng zawng a huam tel vek a, tui leh boruaka cheng nungchate chenin. CYMA hian nungcha humhalh lam, nghafuan ven tihtawp tuma beihpui thlaka hmun tam taka an hlawhtlin mek laiin, nungcha dang – a bikin sava humhalh lamah hian hma an la tawk lo deuh emaw chu, a tih theih. ASEP hotupa chuan Air gun changkang tak tak, telescopic sight nena kan rama savate kan suat nasatzia te, sava species 600 vel neia kan inchhal laia ASEP-ho zir chian hnua 300 bawr vel chauh chhinchhiah theih a awm ta hian Zoram hmangaihtute rilru a tina ngei ang. Khamrang leh hmun danga Birdspots hrang hrang an tlawh tumin sava kap thiamten vawi khatah 40/50 an kahthlak thinzia te a sawi a, a va han rapthlak em! Kan thing leh mau leh nungcha kan suat zel chuan Mizoram hi ‘world’s geographical hotspot’-a chhiartlak loh a la ni thuai ang tih a rin theih.

Tun hma ang lovin, tuna Wildlife Protection dan hnuaiah chuan kumtluana ramsate hi pel/kah phal loh an ni tawh awm e. Chutih lai chuan, kumtluan titihin Airgun tha leh changkang hmanga sava kap thinte leh rifle leh ulhbun hmanga sa pel thinte hi thingtlang khaw tinah hmuh tur an awmin a lang. Zokhaw lama han zin chhuah ve zauh tum hian khawdai vela zing leh tlaia silai pu hmuh tur an tam hle reng mai. E&F Department hi Wildlife Protection-ah hian an fail chiang khawp mai. Kan hriat phak bak harsatna namen lo an nei a ni fahmiang. Kum 3/4 kal ta khan tum khat chu Khawhaia INTACH kan zin tumin, V/C leh YMA hruaitute pi/pu sulhnu leh kan ‘natural heritage’ venhim tulzia kan sawipui a; silai nena ramvah khap chungchang bikah, anniho chuan, “Hetiang thil hi RO hnena kan report pawha barah min khawnsak ngai loh avangin, kan report peih tawh lem lo,” an ti! Nikum chhunga E&F Dept. ten sapel case an man zat chu 126 an ti a; an sarep man zat lah quintal khat pawh a tling lovin ka hria. Zoram pum huapa statistics atan chuan a beitham lu deuhin a lang!

Ti hian ngaihtuah ta ila, YMA Branch tin hian an bial chhung theuha Airgun nei list siam ta sela. Chumi behchhan chuan a neitute hnenah sava kah nana hmang lo turin ngenna khawng tak siam sela, mu ar lak hmang leh choak nghal zual chu thuhran ni se. Chutiang bawkin elhbun leh .22 calibre chin rifle nei list nei bawk ta sela, sa kah nana hman lovah tiin tih tak taka ngenna siam bawk ta sela. Hei hi Forest Department hriatpuinaa tih ni bawk se. Buh seng huna nghal rual leh ar lak hmang sanghar/sihal chu thudang ni se. Hemi rual hian thalaiho tha za tihreh nan, ‘target shooting’ hi tihlar ni thung ta sela; Rifles Associations dinin?shooting range mumal siam ni sela.?Sorkar pawhin silai license hi, tul bik lovah chuan khap hmak thei bawk sela. Hei lo liama ram (environment & ecology) humhalhna tha a awm tam lo vang. ASEP-in sairawkherh khap nana hma an la thinte hi an fakawm thlawt.

Kangmei lo luhchilh dawn ila. Fire Prevention Week hi kum 2000 atanga hman tan a ni a; tun kum atan pawh kan CM-in February 6 khan a hawng a. Ka hriat sual loh chuan 2007 Mautam kum atang khan lo hal denchhena ram kang hi kum tin a zualkai ta emaw tih tur a ni. Lo vah chin bak tikang lo tura inzirtirna, Fire Prevention Week chhunga kan tih ziah thin hian kawngro a su meuh em, tih hi ngaihtuah tham tak a ni. Entir nan, kum 2010 khan State Level Fire Prevention Committee dinglai tichakin, kan Home Minister kaihhruaina hnuaiah E&F Department te, I&PR Department te leh NGO hrang hrangten Zoram dung leh vangah awareness campaign an nei a. E&F Department chuan Mobile Phone hmangin SMS-ah zirtirna lo nei leh nei lo pawh sawi lovin mi zawng zawng hnenah a thawn chhuak chamchi a. Chu mai chu ni lovin, Home Minister meuh pawhin ram tikang lo tura ngenna, recorded voice mail a thawn chhuak thin a nih kha. Mahse, 2010 May thla tira Forest Department report dan chuan hmun 1036-ah kangmei a chhuak a, a kan chhiat zau zawng pawh 189 sq.km (18,976 hectares) zet niin Forest Division 15 zingah Division 3 chiahah ram kangchhia a awm lo, tih a ni. Kum 16 zet ral hnuah pawh nikum (2016) khan hmun 1,328-ah lo hal niin, hmun 298-ah ramkang a awm a. Forest Survey of India report-a a lan danin, kangmei chhuahna zau zawng chu 44.47 sq km. a ni a, chung zinga 4 sq km. chu ramkang niin a dang zawng chu lo hal a ni. Lo hal hun bituk zawm lo khua 98 an awm tih report a ni bawk.

Awareness campaign hi tih makmawh a nih rualin, a takah chuan kan sawtpui tak tak lo hle tih hi phat rual a ni lo. Kan thanmawh bawk nia ka hriat tak chu, ram kang ven nana Dan kan neih sa rengte hi hman nachang hre lovin, a tlachawp inkaihhruaina kan hmang hlauh thin hi a ni.

‘Ngaihtuah’ chawp ngai lova kan Dan neih sa rengte i han thlir teh ang: ‘The Lushai Hills District (Village Councils) Act, 1953 hnuaia Section 23 (1) leh (2) (a) & (d) tlawhchhana siam, ‘The Mizoram (Prevention & Control of Fire in the Village Ram) Rules, 2001 kan nei a. He dan hi LAD-in kum 2001 daih tawh khan Gazette Notification a chhuah tawh niin a hriat. He Dan hnuaia Rule 4-ah chuan V/C ten, kum tin lo vah hun leh thlawhhma lak dan programme kimchang an siam ang a, chu chu a khaw mipuiten an zawm ngei tur a ni. V/C ten lo hal bituk ni atanga ni 3 hma lamah khaw mipuite an hriattir ngei tur a ni a, chu ni ruatah chuan lo hal ngei bawk tur a ni. Vahchap bak a kan loh nan, V/C ten hnatlang kovin meilam an siamtir ngei tur a ni bawk. Leipui, huan leh lobing neiten an hal tum ni atanga ni 7 hmain V/C an hrilh tur a ni a; V/C te ruat niah an hal ang a, a tul dan angin meilam an siam bawk tur a ni. Rule 5, 6 leh 7-in a sawi angin V/C ten ram kang venna lama ruahmanna an siam chu mi zawng zawngin an zawm tur a ni. Dan bawhchhiate chungthu an rel thei ang a, an thuneihna piah lama hrem ngai case-te chu Subordinate District Court-ah an thlen thei ang. Rule 8-in a phut dan chuan, lo vah bak ram tikangtu, khuaa miten an man chhuak duh lovin, an zeppui a nih chuan District Magistrate-in Order siamin a khaw pum a chawitir thei ang. Hei bakah ‘The Mizoram (Forest) Act, 1955’ hnuaia Section 39(3) chuan sorkar kawngpui sir tuak feet 100 chin chhungah lo neih phal a ni lo, a ti. V/C-ten dan bawhchhiate an chawitir theih zat hi Rs 40/- vel chauh a ni a; a beitham hle, siam that vat a va tul em!

Heng kan sawi tak ang hian, ‘The Lushai Hills District (Jhumming) Regulation, 1954’ pawhin a sawi ve tho. Village Safety Reserve te, Village Supply Reserve te leh Unclassed Government Forest te hi lo neih (jhumming) nana kan hmante an ni tlangpui awm e; heng ramte hi V/C-te thuhnuaia awm an ni. Lo neih nana ram sem te, a venhim leh ram kang a awm apianga thelh tura hma latu tur chu V/C-te hi an ni; kum 1953 hma lam chuan he mawhphurhna hi Lal leh Upate chan a ni, anni khan tlin takin kan ram hi an an enkawl thin a nih ngai kha! A bawhchhetute lah hrem lohvin an chhuah ngai lo. A chunga kan tarlan Dante hi a famkim tawk lo ang ang hian hmang thin ni ila vahchap bak ram kang hi a awm lo vang tih a rin theih. Nikuma khaw 98 lai lo hal bituk huna hal ve lote kha hrem ngei an phu a ni lo’m ni? Mahse, tun thlengin hrem an nih thu kan hre lo. A kum hmasa lama Dan bawhchheho V/C-te pawh chu? Forest Department ram tih loh chu, ram kang ven kawnga mawhphurhtu chu V/C-te an ni. Anmahniho control-tu leh Dan kan tarlan tak duangtu, LAD hi a kaikuang lian tak chu an ni bawk. ‘Ram leh Hnam Humhalh’ thupuia neitu YMA-te hi kan Dan neih sa zulzuia hma la turin sorkar hian a pun leh mai dawn em ni ang?

Tun thleng thlenga District Council hun lai Dan awmte tlawhchhana hmang fo lo hian tuna kan ram, thing leh mau chereu mek dinhmun mila Dan tha zawk leh khauh zawk, “ram tikangte hi an tih leh tawh ngai lohna tura hrem dan” chu kan dan siamtu MLA-te hian mutmawh hnarmawha an neih a va hun tawh em! Ram kang tur veng tha duh lo V/C te hi, chawi tir mai bakah, Development Scheme leh Welfare Scheme dangte hi pek ve loh dan te hi awm thei se, kan ziaawm hma mai lo’ng maw chu! Phengphelepa khua kan tlai lua dawn e!

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?