Ram siamtha turin Nang leh keiRam siamtha turin Nang leh kei- R.Zomawia

Ka ram ka hmangaih lutuk,” ti sia Lalthuthleng hmun luah veleha ram hmasawnna tur rotling hlamchhiah dawn dawna rorelna lo lang thinte hi hriatthiam harsa lai tak chu a ni si a. Inrelbawlnain duhthu a sam lohzia lah mi pangngai mit atang chuan a lang fiah viau lawi a, “Heti em em tur chu a ni lo vang a…,” tia a ngaihtuahna fim tak rilru rawn thlawk chhuak thin hi a zahawm ngawt mai. Khawilai party mi leh sa titi hi chu tute pawhin ngaihdan fel tak kan nei mai zel niin a lang. A chhan chu party rilru hi chu a fim tawk lo nia kan hriat tlat vang a ni awm e. Mi tha leh thahnemngai tak takte chu an lo awm ve mahna; mahse, hetiang dikna kengkawh duh leh thil a nihna anga hnathawk duh mi hi chu a tlangpuiin an tilangsar duh lo riau zel nia.

1. Kalphung thlak danglam ngam nih a ngai : ‘Politics’ kan sawi a, sawi tur tam tak awm; mahse, thu hlawm lian deuh deuhah a khung luh vek theih tho a, politics sawi avanga tute emaw sawi chhiat a, rorel lai an ni emaw, an hnathawh that loh lam ngawr ngawr sawi ber a ni lem lo, ram siam thatna atana eng nge pawimawh a, englai hi nge maw siam that ngai le? tia kawng dik kan zawh theihna atana kan inbuatsaihna tur hi a ni. Khawvel ram ropui tak takte pawh he ram siam thatna (politics khelmual)-ah hian an lo che buai viau tawh thin a, an chet buaina chuan ramin  nasa takin  a tuar a, ram chhunga khawsa a mi chenga te an rethei a, thiltitheite dinhmunin hausak lam a pan tial tial thin a ni. Kristian ram leh ram loah pawh kan buaina hi chu a inang reng em? tih hi rilruin a chhui ve fo mai. Ram tlu chhe mek harh chhuak a, insiam tha pawh hriat tur an awm a ni. Ngaihdan tam tak, pawm dan tam tak, duh dan tam tak karah hian ram hian hma a lo sawn mawh khawp hi a lo ni a, a chhan ni awm bera lang chu ‘kan chapo’ vang ni berin a lang. Hruaitu chak takin ram a lo hruai a, ram tana rotling tur a chhawp a, hma a lak viau dawn laiin politics inkhelhna mual atangin mi tha leh chak tak pawh thlak thut an lo ni a, a leh peka thlan lal ten an kut thlak anih loh avangin an chhunzawm duh ta thin lo va, hetiang hna thawh zeng zungna, hlawhtlinna awm tak tak chuang loah hi chuan ramin hma a sawn ngai lo tih a ni. Chu chu kan ramah pawh hian a awm fo thin a, tunah hian a tlem deuh anih pawhin he kalphung thalo tak hi chuan kan hotute thinlungah a la chiah reng niin a lang. Ram hmasawnna daltu a ni a, ramin a tuar em em a ni. Mipuite kut thlakna avanga lalthuthlenga thu, mipuiten thuneihna kan pekte hi duh aiin an thu leh hla an dah lal thin a, ram hmasawnna rual taka thawh ai chuan mahni party mi leh sate duhsakna hluar lutuk hi a reh hlan a nghahhlelh awm ngawt mai. An tawngkamah chuan a tha a lawm, duhsakna chu a inkhairual a, rorel lai party chauh duhsak an nih lohzia pawh an sawi dup dup a, a tak takah chuan chu chu ‘dawt’ a nihzia hre chiangtute tam tak an lo awm zel bawk si.

Ramin hma a sawnna tur chuan hnathawh dan kalphung thlak hi a lo pawimawh khawp nia. Ka hresual em aw? Ka hre lo va, hman deuh lai kha chuan sawrkar building ang reng reng hi departmental work emaw contractor te hian an thawk deuh ber thin a, finance department khan PWD kaltlangin hna pe tur zawng khan thu chhuah a nei thin niin ka hria. Kha kalphung kha hna lamah a tha tawk lo a ni mai thei a ni. Building sak that loh kha hmuh tur leh hriat tur a awm nual thin a ni. Kha kalphung hlui tih dan thin kha tunah chuan thlak a lo ni ta a, firms changtlung leh rintlak tak takte an lo awm ve ta zel a, heng construction firm te hnenah hian building construction hna hi an pe tlangpui tawh niin a lang a, a tha zawk a nih chuan kalpui zel atan kan hotute pawh hian chhunzawm zel se a lawmawm khawp ang. He kalphung hi thatna tam tak a awm thei awm e, Private firm te hi chuan a tlangpuiin hna tha taka thawh tumna leh hna thawh that lama inelna tha a piang ngeiin a rinawm. Sawrkar lama harsatna an sawi fo thin Detailed Project Report ( DPR ) te pawh an thawh mil zela tikhawtlai lovin rang takin an siam zung zung thei tawh ang a, anmahni ngei pawhin an bawhzui chak zawk thei tawhin a rinawm. Hnathawhna lama kan kalphung thalo hmutu chu kan roreltute tho tho an ni a, thlak danglam theihna ‘Thuneihna’  mipuiin kan pe tawh a, ram tana tha tur anih dawn phawt chuan an thlak danglam ngam mai tur a ni ang. Ram tana hna thawh tura kalphung tha lo tak lo lan chhuah fona hi chu kan duham vang a ni thin. Hna thawhna tur siamtute chuan a tha thei ang bera ding chhuak turin engkim an ruahman vek a, sum ngai zawng zawng, mihring tha ngai zawng zawng chenin siam vek a ni. “Heti zat hi sum hman a ngai ang,” an tih chat tawhah chuan hnathawhna tur building pawh a phu tawka tha tur leh ngaihtuahawm loh tur, chhe mai mai lo tur a ni thin. Building tha lo taka a chhuahna chhan fo pakhat chu ‘Sum ei hnem’ tumna lutuk vang a ni. Hei hi a bul ber chu a ni. Sawrkarin vaiblechhe 20 senna tur building sakna a pe a, vaiblechhe 10 bawr vela hnathawktuin zawh a tum ngar ngar chuan engti kawng mahin kha building sak kha a tha ngai lo vang. Hei tak hi kan ram chhiatna zel chu a ni. Entirna pakhat kan han sawi mai mai atang pawh hian thil tam taka hmasawn lohna lo lang chhuak thin hi chu kan duham lutuk vang a ni a,a bul zawk chu kan rilru dik loh vang a ni.

2. Kawng chhe lutuk hi a kalphung a dik lo chuan ‘Change’  ngam mai se:  Hmasawnna tur hrang hrangah sum a awm reng si a; mahse, kan kawngpui lah thatlai hun a awm si lo, mipui kan chiar nuaih nuiah reng a, hnathawktu tura kan thlan lal ho lam atangin ‘Insawifiahna’ a rawn chhuak reng bawk a, kawng an han siamte lah nitina kawng zawh thin, ni tina hmu thin atang ngeiin duhthusam lohna a rawn ri chhuak chuah chuah zel mai si hi enge maw lai chu dik lo a awm a ni tih hi a chiang reng mai. Kawng siam ni ve siin rei lo tea chhe leh mai tur tih hriat takin an siam a, rin ang ngei ngeiin a chhe hma viau zel bawk a. Pangai taka an han siam ve dawn emaw tih laiin laklawh taka an tawp mai te hi hmuh tur a tam em em a ni. Kawng chhuat chung ber ni awma lang, a dip hmanga an zawhna tur ngei ngei turah tih si loa hna tawp san daih a awm thin bawk a, hetia nih chuan mam ang pulin a lang a, kawng chhuatah a kaw chek chek a awm thin a, fur khua a lo ni ang a, tui a lut thei dawn tihna a ni. Tlo chi a ni lo hrim hrim a ni. Kawng chhuat kaw sep sep tiphui tura a dip hmanga a zawh nana an hman thin an hman loh vang a ni mai thei. Eng pawh nise, kan sawi thiam ve dan a ni a, technical-in kan hre thuk ve lem lo. Ka sawi chhuah duh zawk erawh chu heng kawng siam nan hian heng zawng zawng hi chu a daih tur mithiam-in an chhut vek ngei ang tih hi a ni. Kawng siamna tur kal kawng hi a thui deuh em ni? A kawng zawhna lamah sum hi a peng kawi nual anih chuan kawng siam hnain that ngaihna a awm ngai lo vang.

A hriaten an sawi dan angin kan han sawi thuak thuak a, a dik emaw dik lo deuh hlekte pawh lo awm se, hnathawhna tur a nihna taka lo lang chhuak lo thin hi a chhan chu a awm chiang a ni.Tuna tih dan phung hi a thalo anih chuan thuneitute hian thlak danglam ngam rawh se tih hi a ni. Private firms hna thawk thei leh chak tak tak an awm ve fir fer tawh a, building construction hna kalphung thlak danglam anih ang deuh hian sawrkar hian kawng siam dan kalphung pawh hi ram tana a that zawk nan thlak danglam ngam ve se a va tha dawn em!!

3. Hnathawktu chu rin ngam a ni tur a ni: Thlakthleng tih kan sawi a, thlakna private firm te pawh rin ngamin an thawk tur a ni. Ram hmasawnna tur atana mahni chanvo theuh thuneituten an pekah hian rin ngamin hna an thawh a pawimawh. A viltu leh a petu thuneitute pawhin heng private firm kan tih ho-ah hian tunge hnathawk tha tih hi chian fak zel a pawimawh a ni. Miin rilru dik lo a put chuan a hnathawh kha a tha lo thei bawk a ni. A bulpui berah chuan hnathawh tha lo kan tih lo chhuahna ber chu sum hlep hnem tum vang a ni thin. Hei hi a pawi thin hle a ni. Sum duham luatah hnain a tawrh phahna hi mualphona chu a ni. Hna hmuh duh luat avanga pe theitu tlawn huam huamna hi thil dik lo tawp a ni. Pek loh hlauh luat avanga hnathawhna tur sumin a tuar pawh a awm thei bawk. “Min pek chuan chu mi percent chu i chang ve ang”. Hetiang hi thil tha lo ber a ni. Hei pawh hi rilru dik loh vang bawk a ni. Rilru dik lo chuan thil kalphung a tichhe thin a, a tawpah a tuartu chu mipui tho tho kan ni thin. Chuvangin, rintlakin tute pawhin hna thawk tha ila, keimahni tan a ni a, kan hnathawh lo lanna kha kan ram tan a ni a, dik taka hna kan thawh chuan Pathian lawmzawng a ni. Hna tha taka hnathawktuin thawk sela, a ei khawp chu a awm em em a ni. Contractor nih vanga hausa tura kan ngaih ngawt te, private firm din avanga hausa viau tura kan ngaih ngawt te hi thil dik ber chu a ni lo mai thei a ni. Rilru dik kan neih rah chhuah sawi tur tam tak a awm a, rilru dik lo thiltih rah chhuah duhawm loh sawi tur a tam em em a ni. Tuna kan sawi hi chu hnathawh dan kalphung tlemte a ni mai a, kalphung tha lo atanga kalphung tha thlak danglam ngam nih a tul thu te, rinawm taka hna thawh chu ram tan anih thu leh diklo taka intlawnna atana sum theh chhuah, thamna lak avanga hnain nasa taka a tawrh thu a ni. Politics tlang atanga dar vuak ri ring lutukin mipui min tihbuai zia leh kan ram politics ril zawk, tha si lo, kan thlan tlinte ze inthlak ziah mai, ram hmangaih tak tak si loho chet dan hi mipuiten kan huat a ngai a, hetiang mi hi thlang tling tawh lo ila,  mitha ngawt pawh a ni chuang lo, mi tha leh chak si, a ngaihna hria, Pathian tih mi hi kan thlan chhuah theihna turin mipui hi kan pawimawh hle a ni. Sum eiruknain kan rin tak takte pawh a kaih nghehzia te pawh sawi tur a tam a ni. “Rin phak bak, a va mak ve!!” kan ti mai ang.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?