Retheite Retheihna

– K.L.Rochama –

March 21 leh 22, 2017-a chanchinbu pakhat chhuakah kan mithiam pahnih, Pu R.K Lianzuala leh Pu Rin Sangaten “Retheite Retheihna” tih thupui hmangin Mizorama miretheite dinhmun ngaihnawm takin an ziak a. Kan mithiamte hian retheihna awmzia leh eng vanga lo awm nge tih duh aiin an ziak chiang lova ka hriat avangin tawitein ka han ziak chhunzawm ve a ni.

Mithiam (Economist) te chuan mi, a awmna veng/khuaa chhungkaw awm zawng zawngin thla khata an pawisa lakluh chawhruala hmun thuma then hmun khat (1/3) la lut velo chu a rethei a ni an ti a. Entirnan kan awmna venga chhungkaw tinin thla khata an lakluh chawhrualinRs 15,000/- (Singkhat sang nga) ni ang sela, Lianate chhung chuan thla khatah Rs 4,000/- (Sangli) chauh an lakluh avangin an rethei tihna a ni.

Retheihna hi kan thil neih tam leh tlemah a innghat hmasa lo. Primitive Society-ah (Mihring mawl zual lai) chuan tumahin kawr an ha lo va, pheikhawk an bun ngai bawk hek lo. He thu ziaktu ngei pawh hian pawl VII a zir thlengin ke ruakin a kal thin a. A thenrualte zingah pheikhawk bun an awm chuan loh avangin “rethei” a inti lova, hrehawm pawh a ti chuang hek lo.

Kan thenawm khawvengah tlakchham reng reng nei lo, duh duh eia,, duh duh lei thei an lo awm hian rual min awhtir a. An ei ang ei leh an inchei anga inchei kan duh a. Rualawhna hian rilruah rethei ni anga inhriatna min siamsak thin a ni. Isua unau Jakoba chuan hei hi a hrechiang a, “In awta, in nei si lo; tual in thah phah a; in ît a, in nei thei bawk si lo, in inhauvin in insual phah thin a ni” (Jak 4:2) a ti a.

Tisa retheihnain rilrua retheihna hi a tizualkai thin. Union Territory kan nih atanga Legislative hran neia sorkar kan neihna kum 54 zet a lo ni ta. Mizoram Annual Budget pawh mihring awm zat atanga chhut chuan India ram state te zingah a sang filawr hle a. Chuti chungin engvangin nge BPL Member nihte kan la inchuh si chu le?

Mizoram sorkarin pawisa hman tur a neih loh vanga retheihna hi zual zel a ni lo. 2017 – 2018 chhunga hman tur sorlar laipuiin cheng vaibelchhe 8,000 chuang min pek hi Mizorama mihring nuai 10 awrh tan a tlem lo. Heti khawpa tam pawisa kan nei a, chuti chungin eng vangin nge retheihnain min bawhbeh tlat si? A chhan bul ber chu, Mizoram pawisa bawm vawngtute hian miretheite ban phakah pawisa bawm hi an theh phal loh vang a ni. Sawi dan dangin, Dikna hmanga rorelna a awm loh vang a ni. Poverty, Planning and Social Transformation tih lehkhabu ziaktu C.T Kurien-a chuan, “India Economy chu Top Ten Percent Economy a ni” a ti a. Chumi awmzia chu India ram hausakna hi mihring za zela 10% in an hui zo vek tihna a ni. Thuneitu tlemtein ram hausakna an Keipui sahauh  tlat avangin hmasawnna a kal thei lo a ni. Kurien-a chuan “Poverty is the carcass left from wealth acquisition” a ti a. “Miretheite chuan ran thi, Sihal leh Mulukawlhten an ei filh vek tawh ang hi an chang ve tawk a ni” a tihna a ni.

Hei hi Philistinism tiin an sawi thin . A awmzia chu, Juda Lal Saula hun thleng khan Israelte chuan “Iron Technology” an la hre lo va. Philistian ho chuan thir tawlailirte, fei leh ngunhnamte an lo nei tawh a. Philistian hian an thilthiam (Technology) hi Israel hnenah hrilh phal lovin an kawmpui tlat a. Hei vang hian Israel hian indonaah Philistian hi an ngam thei lo a ni. C.T Kurien-a sawi ang hian Mizoramah pawh hian sorkar pawisa bawm vawngtu “Lalchhungkua” an tih mai mi tlemte 5 Percent emaw lekin sorkar pawisa hi midang pe phal lovin an pumbilh tlat a. Hei vang hian sorkar laipui atangin pawisa kan dawng tam tawlh tawlh a, mi tlemte an hausa thur thur a. miretheite chuan “mulukawlh ei bang” kan inchuh a tul ta a ni. Rorelna dik a awm loh chuan pawisa tam hi miretheite tan anchhia a ni thei.

Pu R.K.Lianzuala leh Pu Rin Sangate khan Mizorama retheite retheihzia an rawn tarlang nual tawh a. Rilrua rethei, tisaa rethei bawk site hian Kelkangah leh Camp-ah te inhnangfakna zawngin an tlan kual thin a. A huhova zai a, lam luih luihna hmunah chuan an retheihnate pawh theihnghilhin an han lam ve lawp lawp thin a. Inah an lo hawng a. An fairel bel a lo la ruak tho si. “Vawiinah khawiah  nge rawra ka chhut ang? Naktukah tu huanah nge ka inhlawhfak ang?.. Mami khawsik damdawi leina… Quota lakna, Electric Bill, Tui Bill… a va manganthlak em! Inthlan laia Campaign pui tura sawmtu, Minister lahin a mit sir pawhin a lo melh duh tawh si lo.

Heng mi rethei, hmelhriat tha neilote hian sorkar leh NGO Rorelna Courtah thiam an chang thei ngai lo. Engnge an tihsual ? An retheihna hi an sualna a ni tlat a tin a ni. Heng retheihna bawia tangte hi “Tawngkam tha” mai ni lovin “Thil tiha” chhanchhuak turin Isuan min tir a ni. (Luka 4:18,19 hi chhiar ngei ang che).

Retheihna hi thatchhiat vang a ni vek lo. Dik lo taka rorelna avanga lo awm a ni ber zawk. Andre Maurois-an “The Menace of Things Unpaid” a tih hian i titawp mai teh ang. “Rorelna dik lo leh thil tha lo dang hmuha, ngawih bopui mai chu hripui angin a darhzau thin” a tihna a ni awm e. Entirnan, Adolf Hitleran huatna leh phuba lak duhnarilru kha tak neiin German mipui a fuihpawrh a. Hitlera hian tum dan anga thuneihna a chan chuan indona lian a thleng ang a, tawrhna rapthlak a thleng dawn tih ram hruaitute leh kohhran hote pawhin an hre vek a. Mahse, tumahinaw an chhuah duh lo va.

Rin lawk angin Indopui pahnihna chu a lothleng ta a. He indonaah hian in leh lo, thlawhtheihna, motor leh hmanraw dang, a man chhiar sen loh tihchhiat a nih bakah mi maktaduai  40 zetin nunna an chan a. Chung zingah chuan Juda mi maktaduai ruk 60,00,000 an tel a ni.

German Theologian ropui Dietrich Bonhoffer-a chuan Hitlera ngaihdan hi nasa takin a hnial a, a thiltih dan pawh nasa takin a sawisel a. A nunna a chan phah hial a ni. Ram leh khawtlanga thil tha lo lothleng tur vennaah hian ram hruaitute leh Kohhran hruaitute hi an harh vang tawk lo fo thin a. Thil a chhiat vek hnuah Samari mitha ni turin kan infuih hnuhnawh a. Jeriko kawngah  suamhmang an tam tih hretu  Pilata leh Juda Puithiam Lalte khan he kawngah hian Highway Patrol -Sipai leh Police-te lo dah sela chuan Samari mitha hian a pawisa leh wine-te hi miretheite chhawmdawl nan a hmang thei tur a nia le!. Mahse “Phengphehlepa khuain” a thim hnan ta a ni. Pathian hi ral khat atanga biak theih a ni lo angin hnehchhiah tuar miretheite hi Congress Bhavan leh Hnam Run leh Pulpit atanga chhanchhuah theih a ni lo. Mi felho hi miretheia kan chan,(incarnate) a ngai a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?