Ro khawm danRo khawm dan : Lalbiakdika Sailo

Mizote hi kan ngaihsam hlawm viau; inhmakhua thlip thlep te, life insurance leh savings tih te, medical emergency atana sum dah te, thih palh hlauha kan ro neih ve chhun ang ang kan duh dana a kan chhungten an chan theihna tura ‘Thurochhiah’ dah te a tul tih hre tho mah ila, kan ngaihthah duh viau. Pen khat leka kan chatuan hmun pan thut thei kan ni tih inhre reng mah ila, tisa leh thlarau lama inbuatsaih kan tum chuang lo fo. Kum za dam tura thawk a, naktuka thi tura inpeih tur tih thufing hi Mizo zingah chuan zawmtu kan la tlem deuh a ni ang e.

Thurochhiah siam loh avangin unau leh chhungkhat hnai inkhingte hi Savdhan India-ah hmuhnawm thlira kan thlir thin leh phai vai ho tih dan chauhah kan lo ngai palh ang e. Ni tinin mitthite kalsan ro inchuhin Mizoram chhunga Court hrang hrangah, unau chhulkhat kual ngei te, nu leh fa, pa leh fa leh chhungkhat hnai tak takte nasa takin an inkhing mek a ni tih hi kan hriat a tha awm e. Chuvangin, i that lai ngei khan, engtik hunah pawh i nunna chu chhum ang maia liam thut thei a ni tih hriain leh i ruang chungah hah taka i thawhchhuahsa inchuha i thlah te’n chem sen an in lek khum loh nan, nangmah ngeiin tha i tih dan ang berin ‘Thurochhiah’ han siam teh le. Danin a phut angin i thurochhiah siamah khan thuhretu mi puitling pahnih aia tlem lo nei bawk la, chung thuhretute chu i thurochhiah chhung thu an hriatpui chian ngei hnu chein an hming sign turin i ti nghe nghe dawn nia.

Thurochhiah hi a siamtu boral hnuah amahin a hman nghal ngawt theih loh a, thurochhiah anga taka hman theih turin Court nemnghehna a tul ve leh a. Thurochhiah siamtu thih atanga kum 5 chhungin thuhretute hruaiin thurochhiaha ro changtu-(te) khan Court-ah thurochhiah nemnghehna dil tur a ni. Tin, Bank Account-ah hian Nomination siam ngei ngei tur a ni. Nomination fel tak a awm chuan Court thuchhuak kher lovin Bank lamin nominee hnenah kha bank account-a pawisa la awm ang ang te kha an pe chhuak thei mai dawn a ni.

Thurochhiah siam a ni lo a nih chuan rokhawm tumtu chuan Court-ah Heirship Certificate/Succession Certificate te a dil a ngai thin a, ro chuh ve thei tura ngaihten an rawn sawi buai a nih phei chuan hun rei tak tunge ro changtu ni ang tih Court-in a ngaihtuah a ngai thin a. Tun hnaiah chuan nitin chanchinbu chhuakah rokhawm dilna Court-in a chhuah thin a, chanchinbu a chhuah a nih atanga ni 45 chhungte nghah phawt a ngai ta a. Hei hi ro chungchanga sawi tur nei ve dangte tan sawi ve na hun siamsakna a ni. Sawi buai tur an awmlo anih chuan Heirship Certificate/Succession Certificate diltu hnenah khan a dil angin Court-in a pe thin a ni.

Tin, miin kan chungchang a chhe zawng pawhin lo sawi ta se, thudik/thil nihna tak an sawi a nih miau chuan thubuai hla buaia lak kha awmzia awm lem lo tih tepawh hi hriat ve mai mai a tha ang e.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?