‘Rod’ zuarte bukna hman (September 3, 2017)

Kar kalta khan Central YMA Kumpuan Sub- Committee chuan Aizawl khawpuia insak bungraw pawimawh tak iron rod buk a nih dan chu a zawrhna hmunah an enfiaha, a taka buk tir nghal zel an ni a, an kalna chinah chuan bukna dik tak hmang an awm lova. Rod zuartute hian mipui an bum nasa hle tih hmuhchhuah a ni a. Hetih lai hian hetiang lam enkawltu Legal Metrology lam chuan thukhaw chang an la nei chuang lo bawk a ni.

CYMA kumpuan Committee te’n rod zuar dawr an tlawh hi hnamdang ta Mizo hminga awm nia sawi a ni a, an patla liana a kamna a ruka vuahin tum khatah kg 500 vel an buk tlangpuia, a kamna vang hian vawi khat khaiah kg 30 te’n buk a tlinglo tih hmuhchhuah a ni a. An chhut zel danin hei hian nghawng thui tak a nei a, quintal-ah kg 10-15 vel zelin buk a tling lova hetiang a nih chuan Aizawl a rod zuar dawrte hian nitin Rs Nuai 10 chu diklo takin an lalut tihna ni a, hnamdang mistiri te nen pawh an inthurual nia sawi a la ni lehzel bawk.

Mizo an ni emaw hnamdang an ni emaw hetiang ang em ema sumdawng ualau taka an che hi ngaihthah mai mai chi a ni lova ngaih thutak viau tur a ni a, huat tur a ni bawk a ni. Chutih rualin mipui lam pawh kan in enfiah a tul khawpin a lang. Thil kan chik lo deuh thin em? kan ngaihsam deuh thin em ni? mipui hi zuamawmin kan awm thin reng em ni? ti tein inzawt let hial ila a tha awm e. Eng pawh nise hetianga suah sualna a huaisar hi a pawi hle mai a, kan theihtawpin kan dolet tur a ni a, a tihrem dan tur kan ngaihtuah tur a ni bawk ang.

CYMA Kumpuan Committee te’n hetianga hma an la hi a fak loh theih loha, mipui tam tak vum an ni tawh tih an hailan rualin mi nawlpui an fimkhur phah theih beisei bawk ilaa tha awm e. Iron rod hi ‘issue’ lian tak a ni a, ‘danin a khawih theih silova a ruka hnamdang sumdawnna’ a ni a, kan ram pawnah a lo thlawnin sum tam tak a luang chhuak tawh a, chumi a chhapah buktling lova hralh thin a ni tih finfiah a ni leh phei hi chuan ngaihtuahna a ti kal thui thei hle mai.

He hmalakna hi Department mawhphurtu lamin an umzui zo lo deuhin a lang hrih a, hapta khat a liam hnuah pawh hmalakna mumal a la awm lova sawi a ni. Ngaihtuah ngai ta chu rod zuartute hian a sarhu lai chuan bukna dik an hmang mai thei a, ven reng theih an nih loh avang hian bukna dang tihchingpen mai mai theih loh hman luih tir chi a ni em? tih te a ni a. Hemi lo pawh hi mithiam leh remhre zawk te’n a tha zawk an hriat em em a rinawm tlat a ni.

Iron rod bukna dik hman a nih theih na turin a mawhphurtu Department hian theihtawp han chhuah se mipui lam chuan an thlawp em em ang tih ring bawk sela.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?