ROHINGYA

Burma sorkarin a ngaih theih loh em avanga an ram atanga raltlan Rohingya te chunga tawrhna thleng mek hi a rapthlak khawp mai. Pi leh pu chena an chenna Burma ramah hian mikhual an ni a, an sorkarin khua leh tuiah a pawm duh loh avangin ram dang mi anga ngaih an ni. Burma sorkarin dem a hlawh phah a, an ram hruaitu Nobel Peace Prize lo dawng tawh Aung San Suu Kyi pawhin ngawi renga a thlir avangin sawiseltu an tam hle a ni. Mahse, dan lo a lo lut rua a, lo inthlahpung ta mikhual cham reite kan kawl ve tho avangin an dinhmun hi hriatthiamna thui tak erawh a awm thei ang.

Rohingya hnam hi Bangladesh atanga pem lut niin burma sorkar chuan a ngai tlat a, British-in Bangladesh leh Burma an awp lai khan (Sorkar pakhat awpna hnuaia awm an ni a, duh duha pem kual theih a ni bawk a) lo nei tur leh hnathawka inhlawh turin Burma ramah hian an pem lut a. Rohingya te thung hi chuan kum zabi 9-na lai vela Arab sumdawng heng lai vela kalte thlah kal zel niin an inngai thung. Rakhine state (Arakan) a tuifinriat (Bay of Bengal) kam hnaiah an cheng a, hnam zia leh nunphungah Kawlho nen an inang lo hle a, sakhuana lamah Muslim an ni bawk a, an ram sorkar hian an tawng pawh hi a la pawm sak duh lo a ni. Kum 1948 a Burma ram a lo indan khan Rohingya-te hi Identity Card siamsak an ni a, an ram rorelna khawl (Parliament)-ah pawh tel an awm ve nghe nghe a.

Mahse, kum 1962 a sipaiin thuneihna an pumhmawm a, sipai sorkar a lo pian khan Rohingya tehamthatna chu an hloh nghal vek a, ram dang mi a ngaih an ni zui ta a. Ram dang mite neih thin ang Foreign Identity Card siam sak an ni bawk a. Kum 1982 khan khua leh tui nihna an dil a ni leh a, Kawl tawng thiam tak nih leh an ram independence hma atanga chengte leh an thlahte nih a ngai thung. Mahse, sipai sorkar chuan khua leh tui nih an dilna chu a hnawlsak deuh vek thung. Ram nei lo hnam (Stateless tribe) anga ngaih an zui leh ta zel a ni.

Rakhine-ho hi (tunhmaa Arakanese an tih thin kha) ram neitu dik tak an ni a, buddhist an ni a, maktaduai hnih vel an ni a. Bangladesh atanga pem lut Bengali (Muslim) Rohingya ho hi maktaduai khat chuang zet an tling a, an tan chuan hnawksak tham an ni tih a chiang. Sawi tawh angin hrawn nuam tak an ni lem lo a. Kum 2012 pawh khan Rakhine (Arakanese) hmeichhe pakhat Rohingya ni a hriatten an pawngsual rawn a, an that a. Buaina a chhuak a, sakhua leh sakhua ang zawngin an buai chho ta a, nunna chan an awm nual a, khaw engemaw zat hal a ni a, raltlan pawh sing kua zet an tling a. Burma sorkara president Thein Sein phei chuan Rohingya-ho hi khawvel ram hrang hranga sem darh a rawt hial a ni kha.

Thla hmasa (August 25) atang khan ni tin Rohingya sang tam takin Burma chhuahsanin Bangladesh-ah an ral tlan a. Hnam insuatna leh inum chhuahna a thleng a ni ber. He thil lo irh chhuah dan chu, August thla khan Rohingya hel pawl Arakan Rohingya Salvation Army (ARSA) in police leh sipai hmun an bei a, mi za chuang an that a. Burma sorkarin ARSA hi firfiak pawl (terrorist organization) ah a puang a. Chuta tang chuan buaina nasa zawk a chhuak ta a. Pawisawi lo nunau tam takin an tuar a, chenna in leh lo chan, nunna chan , pawngsual tawk, tam tak an awm a. Bangladesh a raltlan hi nuai 4 chuang zet an tling tawh.

Rohingya raltlan tam takin Bangladesh an pan a, India ram an lo luh lohna turin sorkar pawhin a ngaihven hle a. Mizoram leh Burma inrina lai vel pawh an thlithlai uluk hle a ni. Tunhnai lawka PTI report danin Mizoram (India) chhungah lo lut an la awm rih lo. India sorkar hi Rohingya te chunga hleilenna thleng leh raltlante chungchangah hian ngaihdan fumfe a nei hleithei lo ni pawhin a lang. Prime Minister Burma zinin an sipaite hmalakna a thlawp thu a sawi a, an sorkar chu tharum thawhna titawp tur leh raltlante buaipui turin a ngen a. A lo haw hnu lawkah Bangladesh sorkar mitmei a veng leh si a, Nilaini atang khan raltlante mamawh hrang hrangte Bangladesh-ah a thawn lut tan bawk.

Mizorama heng raltlante an lo luh palh theih avangin mi tam takin an ngaihven hle a, sorkar hian hmalakna lian tham a neih leh neih loh ngaichangtu pawh an awm nual. Chutihlaiin, India sorkar ber hian a ram chhunga Rohingya te lo luh hi a hlauh a, a zia viau. Muslim an nih vang leh pawikhawih hrat tak hnam an nih vangin lo dawnsawn a duh lo niin a lang. Mizote tan a lawmawm viau mai. India sorkar, BJP kaihhruai hi sakhaw tihbik nei an ni a, hindu leh a peng sakhaw dang (Sikhism, Buddhism, Jainism) zuitute tan kawng an hawn zau viau laiin Muslim-te erawh an lawm lem lo ni te pawhin a lang.

Mi tam takin, a bikin khawthlang lama human rights pawl hrang hrangte leh thuthar thehdarhtuten Burma sorkar an dem rawn a, an hruaitu Aung San Suu Kyi pawh an sel nasa viau a. Mahse, Arakanese-ho tan hian hnam dang, sakhaw dang bia ni bawk, tharum thawh hrat bawk si te hi an hnawksak viauin a rinawm a. Keini pawh hi hnam dang – Chakma, Tuikuk, Bengali ten min chim nasa tial tial a, kan hnam himna a derthawng tial tial a, buaina nasa zawk kan la tawng lo ang tih a sawi theih loh.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?