Royal Stag Aizawl Rock Fest 2017-ah Sound tower tluin tawpna siam; Zo Events insawifiah nghal

Zirtawp zana neih, Royal Stag Aizawl Rock Fest 2017-ah — Guns 2 Roses — in hla pathum vel an play chauh tihin chanchin duhawm lo tak a thleng a, heivang hian show pawh tihtawp zui nghal a ni a. Organiser Zo Events chuan thuchhuah siamin an insawifiah zui nghal. Zirtawp zana neih, Royal Stag Aizawl Rock Fest 2017-ah — Guns 2 Roses — in hla pathum vel an play chauh tihin chanchin duhawm lo tak a thleng a, heivang hian show pawh tihtawp zui nghal a ni a. Organiser Zo Events chuan thuchhuah siamin an insawifiah zui nghal.”

Zo Events in thuchhuah an siam dan chu hetiang hi a ni —
Royal Stag Aizawl Rock Fest 2017 December ni 8 zan, Bawngkawn Field-a neihah ruah a sur avangin a hun tak tlai dar 5:30 tan theih a ni lo a, tlai dar 7 atangin tan a ni. Mizo Band 3, BEE 31, Scavenger Project, Tribal Power te’n tha taka mipui an awih hnuin Guns n Roses Official Tribute band — Guns 2 Roses — te’n hun an hmang ve nghal a, mipui hla thiam an sa chho zel a, Mizote’n kan hriat lar em em — Knocking on Heavens Door — an sak lai phei chuan mipuiin an zawm dual dual a, field-ah mipuite an lam dual dual a Rock Fest boruak a nung hle mai. 

Hetihlai hian beisei loh tak maiin Sound tower dinglama mi chu a tlu ta ruai ruai mai a, mipui an lam nasat em avangin mi tam zawk chuan hei pawh hi an hre lo a, amaherawhchu, stage atangin Band Vocalist Gavin chuan music titawp nghalin thil fello awm tih a hriat ta a, sound tower tlu hian a bula mi 3 a delh a ni. 

Organiser leh sound lam an inrawn khawm hnu-ah G2R band te pawh hriattirin sound a that leh theih chuan zai chhunzawm an hreh loh thu an hrilh a, amaherawhchu, inhliam buaipui ngai awm bawk leh sound darkar eng emaw zat siam that a ngaih dawn avangin organiser programme kalpui zel chi-ah an ngai ta lo a, mipuite zah tak chungin program tihtawp a ni nghal a ni. 
G2R te hian hla pali an sa hman a, band member-te hian pawi an ti em em a, organizer te nen inhmukhawmin mipuite lungawilohna thawi dam turin remchang hmasa berah Mizoramah an rawn kir leh ngei tur thu an sawi a ni. 

Rock fest main organizer Zo Events pawhin hetianga hriatlawk loh vanduaina thleng hi pawi a ti tak zet a, hliam tuarte buaipui nghalin na lutuk awm loin inlamah hawtir leh an ni vek a, an senso pawh tum sak nghalin an inenkawlna ngai a awm chuan tumsak leh zel an tum thu an sawi bawk. Mizo thalaiten rimawi hmanga intihhlimna lian tham a awm theih loh avangin Zo Events & Management chuan theihtawp chhuahin program hrang hrang a lo siam tawh a, program hman zawh a ni lo hi pawi an ti tak zet a, mipuite hnenah hriatthiamna an ngen tak zet zet a ni. 

Hun remchang hmasa berah hei aia felfai zawka mizo mipuite tana rawn pen chhuah leh vat an tum thu an sawi bawk.
— tiin thuchhuah an siam a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?