Ruihhlo hmansual survey in beiseina thar hring se

Social Welfare Department chuan Baseline Survey on Extent & Pattern of Drug Use In Mizoram tih chu an zo fel tawh a, hemi chungchang hi drug tihrem kawnga mithahnem ngaite sawiho pui an ni a, nakin lawkah Chief Minister in survey chu a tlangzarh dawn bawk a ni. Drug hmansual tam leh nih dan zirchianna hi state bil angin Punjab hmasa ber ni mahse drug zawng zawng hmansual zirchianna hi state pum huapa nei hmasa ber chu Mizoram a ni a, state in a sum senga zirchianna nei hmasa ber kan ni bawk a ni. CM leh Department thahnemngaihna a fakawm hle mai!

‘Stakeholder’ te kohkhawm an nih tum hian anni pawhin an la hriat ngai loh thin thawng tak tak survey atang hian hrilhhriat an ni a, chung zingah chuan ngawl vei zingah HIV/AIDS leh Hepatitis C inkaichhawn hlau lemlo chu a tam zawk an la ni cheu a, sex hmanah pawh invenna ngai pawimawh lem lo a tam zawk an ni a. Hmeichhe ngawlvei te tana enkawlna tha zawk pek an ngaih thu chu mithiamte’n rawtna an siam a ni bawk a ni.

Hmeichhiate hi kawng hrang hrangah chawikan ngai niin ngaihdan a awm sa a, ngawl vei hmeichhia te enkawlna tha zawk pek a tul thu erawh kan la hre tam lo hle a, tam tak tan chuan thil thar a nih pawh a rinawm hial a ni. Awmkhauh lo zawk an nihna piah lamah hmunkilkhawr atang chuan an tan enkawlna dawng tura chet chhuah a lo buaithlak a, naupawm tam tak an awm vangin naupang te chu enkawl pek tel an nih loh avangin hmeichhe ngawlvei zingah enkawlna dawng hlei thei lo tam tak an awm niin baseline survey thar chuan a tarlang a ni.

HIV/AIDS leh Hepatitis C hi natna inkaichhawn theih zinga sawi tlanglawn a nih bakah natna enkawl hautak zing ami an ni a. Mimira a darh hma,kan rama kan hriat tirh atangin ngawlvei leh mahni inzuar te zingah a darh nasa ber a, anni chu ‘target group’ anga ngaih an ni a, awareness beihpui pawh nasa taka thlak a ni a. HIV/AIDS leh Hepatitis C laka inven dan vantlangin an hre bel viau tura ngaih a nih tawh laiin ngawlvei te zinga ngaih pawimawh lohna a la lian niin a lang a, hmabak a la tam hle tih a hriata, thawktute tan chona ni se a tha ang.

Eng pawh nise ruihhlo hmansual ril lam leh zia rang baseline survey kan nei ta hrim hrim hian ruihhlo do kawngah bung thar min luh pui tih erawh phat rual a ni lova. He zirchianna chip chiar tak hi a bu a siama la thehdarh tur a la ni a, survey in a hmuhchhuah rau rau bakah rawtna tha tak tak awm te pawh bawhzui a ni zel turah ngai phawt ila.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?