RUKRU LEH THIL RUK LEI THINTE HREMNARUKRU LEH THIL RUK LEI THINTE HREMNA

 

Tun hnaiah ruihhlo a bik takin Heroin man thu hi chanchinthar lamah ni tin hriattur a awm a. Mi pangngai tak nia langte pawh Heroin zawrh leh kawl avanga man tak nawlh nawlh pawh an awm a, lei duh an tam avangin a zuar pawh an tam a ni. Hman deuha Heroin Addict ka zawhnaah chuan ani chuan a hmaa damdawi dang khawih thinho pawhin Heroin an tih tak deuh vek thu leh Heroin tam thu te a sawi a. Amah pawhin a tirah ni khatah Rs. 100-200 man vela a tih tan hnuah a dose a lo san belh zel avangin Rs. 500-1000 man vel chu a nitin ruihna a nih tak thu a sawi.

Heng Drug Addict kan tih maite hian an tum ber chu ruihna tur neih a ni a, chu an ruihna tur chu kawng hrang hrangin dap a lo ngai ta a. Pakhatnaah chuan pawisa an neih laia anmahni tih tur aia tam laka a ti ve thin dang hnena zawrh chhawn a ni a. Pahnihnaah chuan sum chang thei tur remchang apiang ruk a, an ruihna tur leina tur atana suma chantir a ni. Kutkem nei hrim hrim an awm a, mahni mamawh leh ruihhlo ngawlvei vang pawh ni lem loa remchang hmuh avanga thil ruk ching hi an awm a, chhungkaw chawmna atana ruk ruk hmang pawh an awm a ni awm e. Chungho tih lovah chuan ruihhlo hi rukrukna tam zawk thlen chhan a ni. Ni tinin Aizawla Court-ah hian mi 20 tha zet chu rukruk thubuai avangin an inlan thin a ni tih kan hriat a tha awm e.

Rukru thiam loh changte hi kum 7 thleng Jail tantir theih leh fine (chawitir) theih an ni. Court hian hremna sang ber kan tih, a thubuai ziahluh dan azira kum 3 emaw, kum 7 thleng emaw tih hi a pe kher lo a. Thil rutu chu a thil ruk dan khawlai a hremna pawh a danglam thei a; pawn leh khawlaia mi thil ruk aiin mi inchhunga luta an thil ruksak hremna hi a na zawk a. Tin, thil ru thang (habitual) te leh vawi khat rukna (first time offender) te hremna hi a inang lo thin bawk. Thil ruk hlut zawng hian thui tak a hremna a nghawng thei a; tin, thil ruk (stolen article) a neituten an hmuh let leh let loh  hian a hremnaah nghawng thui tak a nei thei bawk.

Thil ruk lei hi thil ruk a ni tih hre loa lei palh a awm theih rualin thil ruk a ni tih hre reng chungin a man a tlawm avanga lei an ni thin.

Sumdawng pangai ni loin thil an rawn zawrhin,  tlawm uchuak tak emaw, a tira an chhiar to ve deuh pawh tlawm duai duai thei a nih chuan ruk ruk thil zawrh a ni duh chawk. Chutianga thil ruk zawrh leite chu kum thum (3) thleng tantir emaw, pawisa chawitir emaw, tantir leh pawisa chawi kawpa hrem theih a ni. Tin, an thil ruk leisak kha police lamin an chhuhsakin a neitu dik tak hnenah an pe let thin bawk. Chuvangin, thil ruk i lei a nih chuan i hriat reng tur chu i thil lei kha a tirah tlawm viauin lang mah se police lamin an rawn chhuhsak daih che ang a, a man kha thil ruk lo zuartu hnenah i seng thlawn ang a, Jail bang zutin sum tak tang i sen belh thei reng a ni. Thilruk leitu hi awm lo se thil rutu tam takin sumah an chantir thei dawn lo a, hralhna an hmuh loh phawt chuan rukrukna tam tak hi a thleng dawn lo a ni. A leitu tur an hmuh zel si avangin thil ruk leite pawh hi Police lam hian hian an thil lei man/laksak ringawt lovin anmahni hi case siamsak ve zel sela a thain ka ring.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?