Sakhua (Jan. 21, 2018)

ASC Children Home-in jubilee lawm

Aizawl; North East India UPC enkawl, fahrah chawmna in, Audrene Scism Children Home, Khuangpuilam, Kolasib  chuan Thawhlehni khan a dincham kum 25-na, Silver  Jubilee an lawm.

Silver Jubilee lawmna inkhawm buatsaih hi Home Project Director Rev. R. Lalrinmawia’n a kaihruai a. Rev. Jonathan Downs chuan Jubilee hriatrengna lungphun a hawng a, Silver Jubilee puala Home building sak thar chu Rev. Lalmalsawma Sailo chuan Pathian hnenah hlanin a hawng a. Rev. Zohmingthanzama’n Jubilee Souvenir chu a tlangzarh bawk.

Audrene Scism Children Home Projector Director Rev. R. Lalrinmawi chuan report pein naupang 41 leh thawktu mi 12 an awm mek a, Home Superintendent 6-nain a enkawl mek a.  Home hian a din tirh atangin naupang 173 chuang a enkawl tawh a, eizawnna kawng zawha mi puitlingah naupang thahnem tak a chherchhuak tawh a.  Tun hnaiah pawh hian Steel Fabrication a training chhuak leh BSC Nursing zirchhuakte awmin hna tha tak an hmu tawh hlawm a ni.

Home Compound chhungah hian Home-a awm naupangte kalna tur Susane Downs Boarding School din nghal a ni a, Compassion Center Project Committee hnuaiah Project Director-in a thutchilh a ni.

Jubilee lawmnaah hian North East India UPC, General Headquarters leh District hrang hrang- Chhimtuipui, North Mizoram leh Kolasib chhunga  khawtlang mipui thahnem tak an kalkhawm a. Rev. R. Lalrinsanga, Rev. K. Satinvela, Rev. C. Lalrammuana, Rev. W.L Thanghre, Rev. V.L Dika Sailo, Rev. K. Darsailova ten thu an sawi a, General PYD Choir te zaiin Home naupangten item hrang hrang an entir bawk a. Tlai lamah Jubilee lawmna ruai hlim takin an kil ho a ni.

Audrene Scism Children Home hi North East India UPC General Superintendent  Rev. K. Satinvela hnena Pathian hriattirna ropui danglam tak avangin kum 1993, January 16 khan din tan a ni a. Home din a nih theih nana bul tantu chu Australia rama Pentecost Pastor Rev. JW Downs te nupa an ni. Vawiin ni thleng hian Rev. JW Downs a te enkawl Australia rama Calvary Chapel Kohhrante chu Main Sponsored an la ni reng a ni.

&&&&

 

Season Opening hmanpui

Aizawl; Commissioner Lalzamlova, Territorial Commander leh Commissioner Nu-i, TPWM te chuan  Zirtawpni khan Territorial Staff Band leh Territorial Staff Songsters-ten Prayer Mountain, Hangi Lunglen Tlanga season opening an neih an hmanpui.

Nilengin Pathian thuchah ngaihthlak, sharing leh quiet time neiin hun an hmang a. Major Ramdinthari Varte, Executive Officer chuan hun kaihruaiin Evan. Lalnghakliana, RS chuan thuchah a sawi a, tlai lamah zanriah an kilho nghal a ni.

Final meeting chu Lt. Col. Zothanmawia, Secretary for Programme-in  kaihruaiin Commissioner Nu-i, Territorial President of Women’s Ministries-in fuihna thu a sawi a. Commissioner Lalzamlova, Territorial Commander-in  thuchah sawiin inhlanna hun a buatsaih nghal bawk.

He hunah hian Territorial Staff Band leh Songsters member an kal kim hle.

&&&

 

Synod-in chhawmdawlna pe

Aizawl; Mizoram Synod chuan Synod Relief Fund atangin tun hnai khan chhawmdawlna atan Rs. 60,000/- a pe chhuak.

Synod Relief Fund atang hian tun hnaia hmun hrang hranga harsatna hrang hrang tawkte chu tanpuina pek an ni a. Thenkhat chu damlo kan nan te leh kangmei avanga chhiatna tawkte an ni.

December, 2017 chhung khan Synod Relief Fund atang hian Rs. 98,000/- zet pek chhuah a lo ni tawh bawk.

&&&&&&

 

Apollo School-ah rawngbawlna

Aizawl; Mizoram Presbyterian Kohhran-in kohhran pawl hrang hrang thliar lo va, zirna ina rawng bawl tura a din, Campus Ministry chuan Thawhlehni khan Apollo School of Nursing, Luangmualah hun an hmang a. Tv. Lalhmunzauva Tlau, Counselor-in hun a hmangi a ni.

Tv. Hmunzauva hian thuchah sawiin zirlaite chu tunlai khawvela Krista chhinchhiahna putu (role model) ni turin a chah a, kumtharah rilru thar nen Pathian ropuina tura an nun ngei pawh hlan turin a sawm bawk.

Campus Ministry hi Mizoram Presbyterian Kohhran-in kohhran pawl hrang hrang thliar lo va, zirna ina rawng bawl tura a din a ni a. Ram hmasawnna leh khawtlang nun danglam zelah tleirawl leh thalaite kawng dik kawhhmuhna, moral leh ethical value siam thatna leh thiam dik leh dik lo inkawhhmuhna, ram leh hnam tana an mawhphurhna hriattirna hmanrua a nih beiseia he rawngbawlna hi din a ni. Zirna inah devotion, Bible study, crusade, camping leh zirlaite nun khawih thil pawimawhte zirpuiin hun an hmang thin a ni.

&&&&&&&

 

CKTP hruaituten West Phaileng tlawh

Aizawl; March 1-4, 2018 chhunga KTP General Conference thlengtu tur, West Phaileng chu Zirtawpni leh Inrinni khan Central KTP hruaituten an inbuatsaihnate enpuiin an tlawh.

CKTP hruaituten West Phailengah conference hmanna tur pandalnaah hian Rev. B.Sangthanga, Executive Secretary pawh a tel a. Upa Ngurhmingliana, Central KTP Asst. Leader, T.Upa Ricky Lalrammawia Ralte, Committee Member leh Tv. Robert Lalduhzuala, Committee Member te an kal a. Pandal-a banner tur chungchang leh thil hrang hrang, an inbuatsaihnate an enpui a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?