Sakhua (Oct 1, 2017)

Dist. khawpui tinah Synod Bookroom
Aizawl;?Mizoram Synod hnuaia lehkhabu zawrh leh sem chhuah hna thawktu, Synod Bookroom chuan Mizoram chhunga district khawpui tinah branch a nei thei ta a. Hun eng emaw chen distributor centre-a an lo hman tawh, Siaha-ah Nilaini zing khan branch thar hawn leh a ni ta a ni.
Siaha Branch thar hi Rev. P.C. Pachhunga, Executive Secretary i/c PRESCOM chuan a hawng a. Siaha-a Synod Bookroom hawn thar hi Bookroom Branch 14-na niin Synod Bookroom hian Mizorama district khawpui zawng zawngah branch a hawng kim thei ta a ni.
Siaha-a Synod Bookroom hi kum 1992 khan hawn a lo ni tawh a, he bookroom hi January 2006 khan a thlanga thingpui dawr kangin a man tel avangin a kang ral vek a. Branch puitling hawng zui tura senso a tam deuh avangin branch chu khar zui a ni ta a, Distributor Centre anga kalpui a ni.
Distributor anga kalpui a nih chhungin hma a sawn nasa hle a, kum 2017-a Synod Bookroom Distributor tha thlannaah phei 1-na dinhmun a hauh thei hial a ni.
Kum 11 zet Distributor anga kalpui a nih hnuah PRESCOM BEC-in Siaha Branch puitling din leh a rawtna chu PRESCOM Board chuan a pawm a. BEC chuan Siaha Branch puitling nei tura hmalakna kalpuiin July, 2017 khan in luah turte tifelin August, 2017 atangin hmunhma chei hna a thawk tan nghal a. Hmunhma chei hna bul tan a nih atanga ni 48-ah hawn a lo ni ta a ni.
Synod Bookroom Siaha Branch thar hawn inkhawm hi Upa R.Lalmalsawma, PRESCOM General Manager chuan kaihruaiin Pu Lalniliana, Synod Bookroom Manager-in technical report a pe a ni.
Saiha branch hawn a nih takah hian Synod Bookroom chuan branch 14 leh Distribution Centre 33 a nei ta a. Pawisa kum atana an budget Rs. 9,49,50,000 atangin 80% chuang an thawk chhuak tawh a ni.
&&&&&

Missionary Day hmang
Aizawl;?North East India UPC Kohhran chuan Thawhtanni khan Missionary Day an hmang a, he ni hi India hmarchhak pum huapa hman a ni.
Aizawl khawpui chhunga Kohhran tam zawk chuan awmni khamin ruai nen he ni hi an lawm a. Khawpui pawn lam leh thingtlang Kohhran eng emaw zat chuan zan lamah an thung.
He ni hian Kohhran office, Bible College, Bookstall, School leh hmun pawimawhte khar a ni a. General Hqrs Office atanga Tualchhung Kohhran tinah Rev. Lalmalsawma Sailo, General Superintendent ziah ‘Missionary Day Thuchah’ chhiarchhuah a ni.
Kum 2017 Confernce Report bua tarlan danin North East India UPC Kohhranah hian Tualchhung Kohhran 792-ah Kohhran member 1,02,111 an awm mek a ni.
He ni hi General hruaitute chuan Kohhran hrang hrangah hmanpuiin an insem darh hlawm a ni.
&&&&&&

Nagaland-ah rawngbawl dawn
Aizawl: Nagaland Baptist Church Council (NBCC)-in October 13-15, 2017 chhûnga Youth Triennial Conference cum 33rd Annual Session an hman turah Rev. Lianchhûnga Khiangte, Organiser, MTKP & Secretary, BYFI chu Speaker a ni dawn.
Conference cum Annual Session hi Tseminyu Town Baptist Church-in an thleng dawn a, thupui atan “Let your light shine” (Mt 5:16) tih hmang a ni ang.
Nagaland-a thalai inkhâwmpui lian ber a ni a, Speaker tur, Rev. Lianchhûnga Khiangte hi zaithiam Nl. Rosy K. Remsângpuii leh Upa Lalmuanawma Sailo MTKP Executive Committee Member ten an tawiawm ang.
&&&&&&

Training nei dawn
Aizawl;?Salvation Army Territorial Headquarters-a Project Department buatsaihin ni li awh “Workshop/ Training-Implementation of Anti Human Trafficking Programme & Improving Project Management System” chu October 3-6 chhung hian Booth Mansion Conference Hall, THQ-ah thlan mi 23 pualin neih a ni dawn.
He hun hmanpui tur hian Anne Gregora, Technical Advisor-International Anti Human Trafficking Programme leh Clinton Tedja, International Development Project Coordinator te an lo kal.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?