Sawhkhawk (April 22, 2018)

Sawhkhawk of the day
Zophai boruak a reh ta deuh va, kan ram ngei a nih beisei ila, sorkar leh a nawrtu dangte hian an nawr chhuah ngei pawh ka beisei tlat a ni. Tun hnaia Zophai ram endik chungchangah khan mi pakhat titi ka lo hre thawi a, Mizote hi chu kan fimkhur peih lo va, rei hi kan thlir thiam lo tih a lang niin ka hria. Hnam dangte kha chuan khu lai ramah khan an ta a ni tih lantirna kha an lo nei thlap mai a, Mizote erawh kha chuan lehkha pawimawh pawh nei lem lo khan an lo ta neih mai niin a sawi a, hei hian fiah a dawl zo ta thin lo niin a lang. Thil dangah pawh, Mizote hi thil hi kan chik lovin kan ngaizam mai zel a, a hun laia tha ve mai hi a rei hi chuan a lo rintlak loh fo mai a; chuvangin, kan inzir deuh deuh hi a ngai a. Keini aia mawl zawk nia kan ngaihte pawh hi an hnam a upat tawh avangin hetiang lamah hi chuan kan lo tluk lo leh thin a, an hnen atanga zir tur pawh kan ngah hle a ni. – Hnuna

Pu Lalthlamuana’n thil man to chak lutuk chungchang a rawn ziah kha ka lo chhiar a, a tha hle mai. Ni e, mi rethei tan hi chuan sorkar hnathawk hlawh pung tur thawm han hriat ringawt pawh hian tah a chhuak lo chauh zel mai. Mi mal hnuaia thawkte tan hi chuan hlawh pun hi a harsa ropui mai si a, sumdawngte lah chuan an thil lakna aiin, sorkar hnathawkte hlawh mil zelin an thil zawrh man bi an thliah ni mai hian a lang bawk si a, a manganthlak khawp mai. Sorkar chak tak hnuaiah hi chuan Pu Muantea ziah ang khan thil man tam tak hi chu a thunun theihin a rinawm a, chumi ti thei chu kan rama mi rethei tam tak hian kan mamawh hle a ni. – 8794686442

Ka Huang’ hi a ngaihnawm thei hle mai. Amah hi a insawi danin, a upa ve tawh hle mai si a, thil a hre rei thei lutuk hi mak ka ti hle mai. Keini thalai zawk pawh hian kan naupang ve laia kan sikul awm dan kimchang hi sawi dawn ila, sawi thei lo hi kan awm nawk mai thei a. Sunday School-a kan awmna department leh kum zawng zawngte pawh, ani hi chu mi danglam tak leh thil chhinchhiah thei tak, chhinchhiah peih tak a nih a rinawm. A hriatreng bakah a chhinchhiah peih tih a chiang reng mai a, a ni leh thla, a kum nen, mi hming nena a sawi chat chat thei zel hi mi danglam tak niin ka hria. – Mazuali, TKK

Kan ramah Congress chuan kum 10 dawn lai ro an rel ta a, engtik lai mai pawh hian mipui mimir mamawh hi min phuhruk zo lo ni maiin ka hria. MNF pawh ka ni lo va, Congress emaw, ZMP lam emaw pawh ka tan teh run lo; mahse, ka hriat ve phak chinah mipui mimir mamawh ngaihtuak chak kawngah kha chuan kan sorkar hrawn mek hian MNF kha chu a tluk lo deuhvin ka hria. Anni hnuaiah kha chuan gas pawh kha duh duh huna lak tur khan kan kawtah an rawn phur zut zut reng a, a lak dan kalphung chu lo dang deuh tawh pawh ni se, tun ang em ema harsa hi chuan tunah ro rel pawh ni se min siam ka ring lo. Thil dangah ni se thil man a sang chak si, mi rethei tan chuan kan sorkar hi min tirethei zualtu ni mai hian kei chuan ka hmu. – Sylvia

Budget session a zo va, tumah hian kan sawi zui lem lo va. An neih lai pawhin kan ngaihven lem lo, hei hian kan sorkar leh ram hruaitute laka kan hnual leh beidawn tawhzia a tilangin ka hria. Engmah tak tak an sum pass hian min tihsak leh dawn lo niah kan ngai ni maiah kei chuan ka ngai a ni. – Makimi

Kristian rama thleng âwm ang lo tak tak hi kan ramah hian a thleng ta fo mai. Tun hnaiah khawlaia mi sawisak tih thawm a ri a, thihna hial a thleng a. Hei hi a chhan chhui dawn chuan thil tam tak a awm thei ang, a pawimawh ber chu chhungkua hi a ni ngei ang, chhungkaw inenkawlna tha atanga seilian naupang hi chu tleirawl sual kan tih angte hi han neiin han thle ve bak bak thin mah se, Pathian zahna chen hi an nei tlat thin. Kan ram a that zel nan hian Kohhran a tan a ngai a, a pui turin mahni in chhung theuhvah nu leh paten rim taka kan fate tana kan thawh hi a ngai bawk a ni. Kan tan rual chuan zu zawrh tih mai mai hi chuan min tibuai lo tawp ang. – Mamuani

Mi tam tak chuan Kohhran hi an han sel thin a, zu zawrh chungchangah te pawh mahni kuang lo nawrah te pawh kan chhuah a. Mahse, kan rinpui ber Bible kan chhiar chuan sakhaw hruaitu, Puithiamte kha an Lalten an rawn ber zel a ni a. Ram rorelna hi Pathian hian a kut ken tur a ni a, a rawngbawltute chuan an thawk thei kher lo vang; mahse, Kohhran thurawn hi chu a ngaichang thiam turah ka ngai. Tin, kan ramin hetiang dinhmun a thlen theih chhan hi hi Kohhran leh Kohhran mite tawngtaina rah a tih loh theih loh, Kohhran hi awm lo ta se, sorkar kan hrawn tawh tam tak hian tun hi min thlen ka ring lo. – Sampuia

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?