Sawhkhawk (April 23, 2017)

Sawhkhawk of the day
Zalen chanchinbu hi a chhiar a manhla thin hle mai. News in ziah pawh a bengvarthlak a, chanchinbu danga kan hmuh ngai meuh loh tam tak hi in ziak thin niin ka hria a, a lawmawm takzet a, min tibengvarin ngaihdan tha tak pawh kan neih phah thei thin niin ka hria a ni. Chutih rual chuan in chanchinbu hi chanchinbu dang aiin a hawrawp hi in tite deuh em ni aw ka ti thin a, keini upa lam tan chuan chhiar a harsa lek lek zel mai. A thu tam in duh bawk si vang cu a ni mai thei bawk e. Chhut sual hi an sawi thin a, a awm ta mang lovin ka hria a, chutih rual chuan fimkhur loh vang liau liau tih hriat tak maia tihsual erawh a awm thin, nangni pawhin in hmuh ve thin ka ring. Tan han la thar deuh deuh ula a lawmawm hle ang. – 8794686442

In chanchinbua hnam dang sumdawng chungchang leh Vishal kaihhnawih vel article in rawn chhuah kha a tha hle mai. Vishal a rawn luh dawn khan mi tam tak tan chuan an thil zawrh an tihtlawmna kha a itawm a, mi nawlpui pawhin kan duh chhan kha niin ka hria a. Chutih laiin kan ram sum an lak hek nasat dan tur te, nakin lawka ram mipuiin kan tawrh dan tur leh ILP chungchang vel, kan ram him loh theih dan fiah taka ziah han chhiar chuan an rawn luh hi a lo tha em em lo. Chutih laiin kan sumdawngten thil an tito uchuak deuh hi chu sim se ka ti tak taka ni. – Thangtea

Kar Hmasaa Vishal dawr hawn chungchang rawn sawitu pakhat ngaihdan kha ka ngaihdan chiah a ni e. A sawi ang khan kan ram sumdawng tam zawk hian thil hi an tito mah mah deuh chuan ka lo hre ve a, phaia la bazar ngai ve tehchiam lo ni mah ila a bazar tawh te, phaia kal thiante zar atangin helaia an thil man leh khu lama thil man inthlauhzia hi kan lo hre ve phak lo thei lo va. Vishal pawh hi mi nawlpui kan lo welcome chhan pawh a tlawm hi niin ka hria. Sumdawngte hian an thil zawrh hi phai rate-in zuar se pawh ka ti lo, hlep chu nei rawh se; mahse, hlep uchuak vak kher an tum nia hriatna hi a awm ve lo thei si lo a ni. – Rsa

Vishal chungchang in rawn chhuah thar leh a, ka ngaihdan ka lo thawh ve teh ang. Kar hmasaah khan pakhat khan ka ngaihdan ang deuh a rawn sawi a, mi nawlpui, keini ang mi rethei tan hi chuan an thil zawrh a tlawm tih thawm a awm rual khan lo lut se tih mai a awl a ni. Mipui hi chuan thil thui tak kan thlir thiam ve lo va, kan ram leh hnam chimral lam pawh kan thlir thiam lo, ni tin ei khawp pawh thawk chhuak mang lo tan hi chuan a awhawm ve bawk em a ni. Sumdawngte khan min lo hre thiam teh u. – MkSiama

Zalen chanchinbu hi ka chhiarna a rei ve tawh khawp mai a, a ngaihnawm ka ti a. Regular-a thu rawn ziak thinte pawh hian an ziak ngaihnawmin kan nun atana tha tur tak tak hlir an rawn ziak hlawm niin ka hria a, a tha ka ti hle a ni. In tihsualah miin an sawisel thin cheu va, hma pawh in sawn nasa tih keini a chhiartu lam hi chuan kan lo hre ve thei khawp mai a; mahse, tun hnaiah hian tihsual in nei leh tan niin ka hria, han tang thar leh deuh teh u. In tan chuan in thei ang tih ka ring. – Malbawihi

Kan ram rorelna in sangah zu sawi mawina a ri nasa khawp mai a, tawngkam lah kan duhtui lo, Kristian ram hruaitute hi Kristian an ni ta lo mai em maw ni tih palh mai a awl dawn alawm mawle! Kan rorel lai MLA-te hi zu a tak takah chuan zu thatna hi sawi tur an hre tam bikin ka ring lo va, an policy an tan luatah an tawng sual palh ve mai maiah ka ngaihsak tawp mai. Chutih rual chuan Pathian thu nena hmehbel talh emaw, a hming lam talh emaw ang chi zawng hi chuan sawi tawh lo hram se ka lo ti ve a ni. – 8974232935

Kar hmasa khan in rawn chhuah a, a dik ka ti viau mai. Mi thenkhatin kan rama chhiatna thleng, khuarel chhiatna kan tih tam tak hi mihringin a siamchawp a nih thu an sawi thin a, a dik thui viau mai. Thalah kan intikang nasa a, furah kan min nasa em em bawk a, hetiang thil chhiatna hi a vanduaithlak a, a tuartu tan phei chuan a na khawpin ka ring a; mahse, tam tak hi chu a hmaa kan lo inven lawk theih, kan lo inrin theih, kan lo inven peih loh leh ngaihsak loh vang hi a tam ve maiin ka hria a, hei hi kan than harh vena tur pawimawh tak niin ka hria a ni. – Kimkima

Kan ramah hian ngati nge doctor leh zirtirtu indaih lo tih thawm hi a awm reng mai ni aw? A ram pum huap pawhin ziak leh chhiar thiam tamna kan ni a, doctor leh zirtirtu pawh ngah awm tak hi kan niin ka hre ve si a, a mak ngawtin ka hria a ni. – 8729805358

Kan rama pawl lian tak leh thawmna tak chu MZP hi an niin ka hria a, thalai thaza rual, tha thawh tur leh ngaihtuahna seng tur pawha tuan tha rual an ni bawk a, an bawh lam chu a eng duak duak zel mai. Chutih rual chuan ka lo thlir ve reng thin a, an chet chhuahna tam tak hi an pawl hming nena inkaihhnawih lo deuh deuh hi niin ka lo hre ve thin a. Zirlai pawl an nih ang hian zirna kaihhnawiha inhmang mai tur, sorkar pawh kar tura ka lo ngaih lai hian chutiang nena inhlat tak tak nia ka ngaihah hian an hming hi a langsar pawlah a awm ve ziah maiin ka hria, an pawl inkaihhruaina ka hriat loh vang ni maw?! – Muanpuii

Tunkar tawp hian Mizorama Kohhran lian ber, Presbyterian chuan Bial Inkhawmpui an nei dan a, zu chungchangah hian eng tak nge an rawn rel chhuah leh ang aw?! Eng emaw tak chu an rawn tihchhuah leh ka ring deuh tlat mai. – Vala

Mi ram hruaitute hi ka awt ve thin ngawt mai. Tunah hian Britain ramah chuan an Prime Minister, hmeichhia lehnghal, Theresa May chuan inthlanpui neih a nih tur thu a puang a, a tlin dawn leh dawn loh a hre lawk bikin ka hring lo va. Mahse, mipui hnena a lo intiam tawh leh ram tana tha turah chuan thutlukna a siam mai a, a lalna dinhmun chu chân a hlau vak lo a ni mai thei. Kan ramah chuan thuneihna chan loh hi kan hlau vet vet hlein ka lo hmu ve thin a, ramin a tuar a, mipui pawhin chawl tura a duh ngawih ngawihte hi an chawl duh miah lo mai zel a, a hahthlak ngawtin ka hre thin. – Siammawia

Pathian hian kan tan a tawk chauh zelin ro a rel tih hi ka pawm dan a ni a, Bible-a kan hmuh angin roreltute pawh Pathian min pek a nih ka ring. Kan rama roreltute hi keimahniin kan thlan an ni a, kan phu tawk niah pawh ka ngai mai. An lal hmasak atang rengin an nihna leh zia kan hre sa a, kan thlang lal leh tho va, kan duh hle ni maiah kei chuan ka ngai a ni. – 9436360899

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?