Sawhkhawk (April 29, 2018)

Sawhkhawk of the day
Chhim lama kan Chakma unaute inthlang thawm chu a va ngaihnawm ve aw!! Seat la tlem ber, BJP chu an thu ber ni maiin helai tang hi chuan ka lo hria a, tu takin thawhpui zawk ta ang maw? Tu zawk zawk pawh hian thawhpui ta se, MLA inthlan hun atan chuan a hlauhthawnawm hrim hrim dawnin kei chuan ka lo hmu a, a thawhpui lotu zawk zawk tan chuan Kristian ni lo mai ni lo, Kristian nekcheptu nia puhte thawhpuitu tia beih an remchang dawn khawp hian ka hmu ve a, lehlam tan campaign-na remchang tak an siam dawn ni maiin ka lo hmu ve. Eng pawh chu lo ni se, politics hi chu a ngaihnawm ve hrim hrim. A hma lawka thawk dun tur emaw kan tih kha a hnu lawkah mi dang a lo ni leh daih a, a mak thei em mai! – Hnuna

CADC inthlan atanga ka lo hmuh ve mai mai chu, Congress hi kan ram chhung khawiah pawh hian kan lo ning ta a, a thlakna tur hi kan dap mek zel ni maiin ka hria. MLA inthlanpui lo awm turah pawh hian an tan kawng hi a ping deuh ta em ni tih ngaihdan ka lo nei a, chutih rual chuan kan sawi leh hriat hnu, inthlan dawnah tak tak chuan politics khel thiam hi a pawimawh thin a, sum neih bawk si chuan eng eng maw hi a thleng ang a, an tling veleh nawlh thei bawkin ka hria. – Mamawia

Kan rama inthlanna awm hnuhnung ber leh a result pawh kan hriat tak, CADC inthlan chu a ngaihnawm hle mai. Nimina thawk dun tura ngaih kha vawiinah chuan an lo ni leh miah lo va, politics-ah chuan hmelma kumhlun leh thawhpui kumhlun hi a lo awm thei tak tak lo a nih dawn hi. A ngaihnawm a, a boruak hi a pui ve hrim hrim. Kristianna rilru nghet tlet tlawt atanga thlir phei hi chuan polictics an hmu he deuh pawh hi a mawh lo ve ka ti ta! – Makimi

Kan inthlan result leh a hnu zel chu a ngaihnawm khawpin kei chuan ka hria. Zoram mipuite hian Kristiante min nek ngar ngartu, BJP hi tu zawkin nge thawhpui dawn tih kan ngaichang thup ni maiin kei chuan ka hria. Party lian pahnih rilru pawh hi a buai ve khawpin kei chuan ka hria. Thawhpui loh chuan thuneihna chan loh, thawhpui lahin MLA inthlana hmelmate beihna remchang siamsak ni dawn bawk si. – Ama

Mizo Kristiante hi kan va vannei em! Heti tak maia kan ram chhengchhia hi, lirnghing na pangngai ve deuh takte hian min han sawi zeuh sela, mang deuh phiar thei kan ni a, chutiang reng reng chu kan la tawk lo va. Thlipui ni se mi ram zawng aiin kan tuar nep a, a lawmawm a ni. Hnam tlem te ni mah ila miin Pathian hian ama rawngbawl tura a zawn chhuah ram nia an sawi thin hi ngaihtuah neuh neuh hian a dik tlata hriatna hi ka nei thin. Kohhran chak tak kan nei rengte hi mi ramah a awm lo vang, keini chu sual inti hle thin mah ila Kohhran aw hi chu mi sual tak pawh hian kan la ngai pawimawh zel zawng a nih hi.

Tunlai hian kan thalaite hian infiamna lamah nasa takin hma an sawn niin ka lo hmu a, infiamna chi hrang hrangah hian changkang tak takin kan inlanin kan thiamna pawh a sang tawh hle niin ka hria a, a lawmawm hlein ka hria. Hetianga infiamna lama hma kan sawn theih nana tan latute hi tute nge ka hre chiah chuang lo va; mahse, fak an phuin ka hria. Chanchinbu hi chhiar ila, infiamna chi hrang hrangah Mizo hming hi ram pum huapah a lang mawlh mawlh reng mai a, infiamna pawl hrang hrang hruaitute thawhrim rah vek hi niin ka hria. – Ampuia

Ka Huang’ hi a ngaihnawm thei hle mai. Amah hi a insawi danin, a upa ve tawh hle mai si a, thil a hre rei thei lutuk hi mak ka ti hle mai. Keini thalai zawk pawh hian kan naupang ve laia kan sikul awm dan kimchang hi sawi dawn ila, sawi thei lo hi kan awm nawk mai thei a. Sunday School-a kan awmna department leh kum zawng zawngte pawh, ani hi chu mi danglam tak leh thil chhinchhiah thei tak, chhinchhiah peih tak a nih a rinawm. A hriatreng bakah a chhinchhiah peih tih a chiang reng mai a, a ni leh thla, a kum nen, mi hming nena a sawi chat chat thei zel hi mi danglam tak niin ka hria. – Mazuali, TKK

Kristian rama thleng âwm ang lo tak tak hi kan ramah hian a thleng ta fo mai. Tun hnaiah khawlaia mi sawisak tih thawm a ri a, thihna hial a thleng a. Hei hi a chhan chhui dawn chuan thil tam tak a awm thei ang, a pawimawh ber chu chhungkua hi a ni ngei ang, chhungkaw inenkawlna tha atanga seilian naupang hi chu tleirawl sual kan tih angte hi han neiin han thle ve bak bak thin mah se, Pathian zahna chen hi an nei tlat thin. Kan ram a that zel nan hian Kohhran a tan a ngai a, a pui turin mahni in chhung theuhvah nu leh paten rim taka kan fate tana kan thawh hi a ngai bawk a ni. Kan tan rual chuan zu zawrh tih mai mai hi chuan min tibuai lo tawp ang. – Mamuani

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?