Sawhkhawk (April 8, 2018)

Sawhkhawk of the day
Sorkar kum tawp a ni a, pawisa kum tawp a ni bawk a. Mizorama Kohhran hrang hrangte chuan kum khat chhunga an pawisa hmuh an tarlang hlawm a, Kohhran leh Pathian tan hian kan lo thawh hnem hlawm hle mai. Heti hian ka ngaihtuah thin a, a thua a rawngbawl duh lo ram leh hnam an boral dawn tia a sawi kha chu kan la hlat viau ni hian kei chuan ka hre thin. Kan ramah hian han tal nain sual pawh kan inti ve thin viau a; mahse, thahnem kan ngaih luatah hian sual hi kan inti hma deuh thin mai niin ka hria a. KTP leh Kohhran dang dang thalai intawhkhawm te, Kohhran thil tih hrang hrangte han thlir hian, Pathian rawngbawltu, rinawm taka ama hnungzui tlatte hi kan ramah hian an la tam em mai a, thla a muang suau suau thin. Chutih rual chuan sum ngawt buaipui Kohhran leh ringtu ni lo tura kan inbuatsaih erawh a ngai hle a ni. – MkSiama

Tunlai chu Lunglei lam boruak a va tang ve aw… A dik lo hi chu na deuh hian kan nawr ngam a ngai ve zel tawh reng a ni. Lunglei thalai intelkhawmte hian an huam chhunga dik tawk lova tite hi chu na takin bei zel teh se, kan ram hian fing leh remhre takin, mawi taka mi dawrtu aiin na taka siam that tuma nawrtu hi kan mamawh ve tawhin ka hria. Sorkar pawh a buai map a, thil dik lo ti ve thei dinhmuna dingte pawhin an tih zui ngam loh nan chet a ngai a ni. – Mazuali, TKK

Budget session a zo va, tumah hian kan sawi zui lem lo va. An neih lai pawhin kan ngaihven lem lo, hei hian kan sorkar leh ram hruaitute laka kan hnual leh beidawn tawhzia a tilangin ka hria. Engmah tak tak an sum pass hian min tihsak leh dawn lo niah kan ngai ni maiah kei chuan ka ngai a ni. – Makimi

Kar hmasa khan MST bus sum thawh chhuah chungchang kha ka lo hmu ve a, an sawi tak ang khan a thawh chhuah kha ka hriat hmasak ber chuan a ziaktu chanchinbu khan an chhu sual a nih ka ring hial a. Two-wheeler taxi mai mai pawhin khatiang zat kha chu an thawk chhuak thei hial lo maw? Session-ah khan an sawi a; mahse, awih chu a harsa angreng. – Sylvia

Pathianah hian innghat phawt mai ila, kan ram pawh hi a kal dik mai ang. Kan ram hruaitute leh pawl hrang hrang hruaitute pawh hian chu chu hria se, Pathian hming lam satliah mai lo hian a takin i ring ngam ang u. – Mawia

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?