Sawhkhawk (April 9, 2017)

SAWHKHAWK of the day
Zalen chanchinbu ka lo chhiar ve ziah a, a ngaihnawm thin khawp mai. Chutih rualin in chanchinbu hi in rem chep thei lutuk emaw ni, a khat hmuk zel hian a hriat a, a chhiar a hahdam lo riau hian ka hre thin. A bikin phek hma hi a rang bei buai deuh em maw ni ka lo ti ve deuh thin. Miin an sawisel nasat em em thinna che u, chhutsual leh thupui vuah sual palhah erawh hma in sawn nasa niin ka lo hmu ve a, a tihzia a, chanchinbu pawh a tihlu sawt niin ka hria. Han tan zel ula, hei aia ngaihnawm leh en nuam, chhiar hahdam bawk siin in chhuah thei em em ang tih ka ring tlat a ni. Ka lawm em em e. – Zalen tantu

Pu Lalthlamuana Ralte thuziak hi SAWHKHAWK-ah hian fakna thawm a ri khat khawpin ka hria a, kei chu ka chhiar hmasak ber a ni ve tlat mai. A thu ziah hian mi a tibengvar a, thlirna zau tak min neihtir niin ka hria a. Mi thiam a ni a, tawngkam a thiam bawk a, thluaithlum kual duah si lovin chiang deuhvin, keini mi mawl pawhin kan hriat thiam theih tur hian a ziak mai zel niin ka hria a, kei chuan in chanchinbua thu ziaktute zingah ka fak ber a ni ve tlat mai. – Mamawitea

Zalen chanchinbu hi ka lo chhiar nasa ve thin a, a ngaihnawm thin khawp mai. In columnist-te hi, a khawi pawh hi an tha khawpin ka hria. Pathianniah chanchinbu dang a chhuak thin si lo va, kan hmuh har deuh pawh hian kan lo hawi kan lo hawi hman ziah mai. Hei aia ngaihnawma chhuah tur pawh hian han tang zel teh u. – Angaihi

Pu Chhuanliana hian Mizo tawnga kan hman dik loh leh a dik loh dan te, lam dan thlengin a rawn sawi a, a nih duh hmel ka ti khawp mai thin. Chutih rual chuan kei chu ‘v’ chungchang a sawi kha a sawi fiahna kha ka pawm em em tho va, ka lo dik lo zawk pawh a ni mai thei a; mahse, keimah chuan ‘v’ hi chu la hman/ziah zel hi ka thiam laklawh tlat a, ka hmang zel dawn tih ka rawn sawi ve hrim hrim. A thu ziah hrim hrim erawh chu tha ka ti a, a zawm thei an awm chuan a tha khawp ang. A thu ziak dang pawh hi chhiar hahdam leh awlsam a nia, a ngaihnawm ve hrim hrim a ni. – 8794686442

Doctor zawhna hi a tha ka va ti thei em!! Ka natna leh ka harsatna ni lem lo pawh hi ka lo chhiar ziah a, ka natna ang deuh a nih phei hi chuan ka tangkaipui thei khawp mai. Ka natna ang lo deuhvah pawh nakin atan, mi dangte tan pawha ka tangkai ve theihna tur niin ka hria a, ka chhiar hmaih ngai lo a ni. – 8256908695

Kar hmasa khan fur lo thleng tur chungchang kha Puipuia khan a rawn sawi a, kei pawh ka ngaihdan chiah a ni. Mizote hi chu kan ngaih hi a sam khawp a, kan tuichhe paihte hian kan ramri a pelh hi chuan kan duhtawk mai a, a kal zelna hi kan umzui vak lo; mahse, a rei chuan mi dangte tan emaw, keimahni ngei tan pawh chhiatna thlentu a ni thei tlat. Chutiang zelin, kan dithlifarfem pawh hi kan en uluk a ngaiin ka hria a ni. Kan ran vulhte pawh hi an thli leh an ek vel hi sazuten an duh a, kua an hreuh phah vak vak a, hei hian ram a tinghet lo va, furin a nan hian a min phah fo niin a lang bawk. Kan buaina tur tho a thlen hmaa kan fimkhur thin hi a tha hle a ni. – Puipuia

Kawng engkimah hian Pathian hi hre phawt mai ila, nun hi a hahdam mai a ni. Pathian tel lo nun chu hla pakhatin a sawi angin, hlim angin lang thin mah se, a tawp chu lungngaihna mai a ni leh thin. He kan dam chhung tawiteah hian khawvel lama tlan thinte hian khawvel an chen emaw an inti fo va; mahse, a tak takah chuan hlim taka Pathian nena khawvela chengte hian khawvel hi chu kan chen fe zawk niin ka ngai tlat a ni. – Rka

Kan ram hi a chang chuan sualna khurpuiah tlu lutin Pathian hremna hial tuar tur ang hiala sawina pawh a awm thin a; mahse, ka ngaihtuah vang vang hian, inkhawmpui lian hrang hrang kan han hmang a, thalai a ni emaw, puitling a ni emaw, pitar, putar, patling thlengin Pathian faka zak miah lo leh phur em ema lam thei la tamzia ka ngaihtuah hian, kan ramah hian sual chu lo an awm ngei a; mahse, ram tana Pathian au tang tang hi an la tam em em a ni. Ka lawm e. – 8794686442

Zu hi in vengah a zalen ve em? Zalen tur chu a ni, dan anga an leia an zawrh miau chuan…. Chutih rual chuan zu hi duh ai chuan an in ualau mah mah thin em maw ni chu ka ti ve deuh thin. Danin a phal a, a lei thei chin chuan lei sela, khawlaia khawpui tizahawm lo lutuk zawnga an in hi chu a nalh lo ka lo ti ve deuh a ni. In mite hi han fimkhur leh deuh ula, zan lama khawlai len pawh a nuam deuh ang, min tibuai lo mah ula in lo awm hian a nuam lo ve tlat! – Mizo nula

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?