Sawhkhawk (August 13, 2017)

Sawhkhawk of the weekChakma chungchang kha Pu Muantea khan chiang deuhvin a rawn ziak tawh a, kar hmasa khan mi dangin an rawn ziak leh bawk a. A chiang ta khawpin ka hria a. Ni e, Chakma hi Central YMA pawhin ram mi nia an pawm loh ang hian, hetia sawi sawi lo hian kan tanrual a ngai khawp mai. Political party-te pawh hian inthlanah vawrh chhuak lo ngam sela a tha ngawtin ka ring. Thuneih kan duh em avang hian kan tihuangtau thar ta riau niin kei chuan ka lo hmu ve a ni. – Pu Sanga

Chawnpui Bethel Camping Centre chuan sawi a hlawh hle mai. Kar hmasa khan in chanchinbuah hian anmahni tan zawngin mi pakhat khan a rawn ziak vak mai a, a ziak kha tam tak chu a dik mai thei. Chutih rual chuan mi nawlpui leh a awm tawhte sawi hmang atang hian tih dik tawk lo hi chu an ngah tho tho niin kei chuan ka hmu. Heti zawng hian ka lo ngaihtuah a, insiam that nan an hman theih chuan a lawmawm khawpin ka ring. Kan ram hian khutiang centre khu eng emaw kawng zawng tak chuan a mamawh ve tlat bawk si a; chuvang chuan khuti khuan awm sela, dik leh dan hnuaiah, inenkawlna mumal leh tha zawkin chhuah phah se ka lo ti ve khawp mai. – Mapuii

Engati nge India ramah hian politics hi kan buaipui em em mai ni tih hi ka zawhna fo a ni. Mi ramah ka la awm lo va, an chanchinbu pawh hi ka chhiar tam lem lo va; mahse, keini chu khawi state maiah pawh hian thuneihna duh avanga inbeihna hi a lian em em vek mai hlawm hian ka hmu a. Hei hi keini Kristian ramah pawh hian kan chhawm lut ta zel ni hian ka hmu a, India rama awm kan ni si a, inbiakpawhna a tha tawh bawk si a, kan Kristianna aiin thuneih kan chakna hian min hneh awlsam ta zawk ni maiin kei chuan ka hmu a ni. – Puia

Mizorama zaithiam chhuak reng reng, a bikin Pathian fakna hla satute hi engati nge kikawi deuh deuh, style deuh deuh kan ti dawn emaw ni hian an zai kher zel le? Hetia han ngaihtuah hian mawl taka zai, hla thluk tluang zel hi Mizote hi chuan ngaihnawm kan tih hi niin ka hria. Zai kikawi kual chiam chiam hi chu a tehnaa teh ralah chuan an lo thiam (skill) zawk mai thei a; mahse, lar leh mite lawm hlawh hi chu zai dam raih mai zel hi an ni zelin ka hria. Tikual vak vak lovin, Mizo hmaa i zai dawn chuan Mizo rilrem zawngin zai mai mai teh! – @

Kan rama tun hnaia titi lian ber, Bethel Camping Centre hi an sawi nasa khawp mai a, mi hrang hrangin an tlawh a, tunge dik ber pawh a hriat ta meuh lo. Keia lo thlir vena atang chuan a enkawltute khuan tih dik tawk loh tam tak an nei niin ka ngai a, khuti zat mihring, nunphung inang lo, sual dan kawng hrang hranga sual ni theuh bawk si chu enkawl thiam an har chuan ka ring. Mahse, miin an sawina tam tak hi chu a dik thawkhat ang tih hi ka pawm dan a ni. Enkawl harsa rau rauvah dik tawk lo hi chu a awm tih hi ka lo ralkhat rin ve dan a ni. – Muana

Pathianah hian innghat phawt mai ila, kan ram buaina, mi mal harsatna leh pawl inlungrual loh thin pawh hi a reh mai ang. Pathian dah hmasak ber hi chuan mi hi a hruai a, a dik lo thei thin lo. Kristian intite hi i inenlet thar ang u. – Papuii

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?