Sawhkhawk (August 27, 2017)

Sawhkhawk of the Day
Presbyterian Kohhranin eng emaw hlek an tih apianga beih vak nana kan hmang thin hi chu a tha lo ngawt mai. Keia ngaihdanah chuan, a Kohhrana lawi ka nih vang lam ni lovin, Presbyetrian aia kalphung fel nei hi kan ramah an awm lo va; chuvangin, Pathian rawn chunga an tih hi chu a dik tlangpui niin ka hria. Sawisel phah chiam nan hmang tawh lo vang u. Tin, eng Kohhran pawh ni se, sawisel chiam emaw, beih chiam emaw hi a fuh lo hrim hrim niin kei chuan ka ngai a ni. Pathian zah lohthlakah ka ngai ve hmiah mai a ni. – Mazuali

Kar hmasaa sap zu leh local rawn khaikhintu kha ka thlawp ve deuh titih tlat mai. Finfiahna chiang tak phei chu ka nei ve lo va; mahse, hman deuhva local kha chu a chhe tehchiam lo a nih ka ring. Kan pa/pute rual kha upa tak an nih thleng khan an in a, an thihpui har thin khawpin ka hria. Tunlaiah chuan a lo chhe tawh deuh a nih pawhin, local zu tha tak hi siam chhuah dan hi zawng zawk ila, kan rama sum che vel a tam phah dawn bawk si a, a tha zek lo maw ka ti a ni. Pumin a ngeih zawk bawkin ka ring. – Sylvia

IN chanchinthar ziah a ngaihnawm thin hle mai. Pathianniah chanchinthar ngaihnawm leh bengvarthlak tak tak hlir min chhawpsak avangin ka lawm hle a ni. Tun Pathianni chhuaka Vangchhia chungchangte khan ka beng a verh hle mai a, kumtlinglo pawngsual chungchang in ziaha thil sawiho intar lante khan awmzia han nei hlauh bawk teh se. Mite sawi fo angin chhut sual zeuh emaw hi chu a awm thin ang; mahse, hetiang zat thu chhutah chuan a awm ve turah kei chuan ka ngai. – SangteaCT

Thawkkhat lai khan dawrkaiten online-a thil lei an helh thu kha a ri nasa khawp a, tumah phei chuan anmahni avangin an sim phah lem lo niin ka hria a. Online-a thil lei hi a tlawh chu thuhran ni se, sum nei vak lo tan chuan a lo tha em a, duhthlan tur ni se a tam hlei hlei a lo ni a, kei chu ka thlawo vel khawp mai a. Chutih lai chuan dawrkaite pawh online avang hian buaiin mangang mai lo se ka lo ti ve a, keini aia ching hmasa fe, sap kan tihho khuan online-a thil lei chu an uar em em a, dawrkai an tlem phah chuang lo. Chuvangin, online avangin sumdawnna hi a tlakchhiat buai theih ka lo ring lo deuh va, Mizote phei chu thil uar hluai chi kan ni a, tunah pawh tlem chuan a thawm chu a reh leh tawh deuh der ni chuan ka hria a, lo helh vak lovin nghak peih sela a tha leh maiin ka ring. Tlai khawhnuah ngaihdan ka rawn thawh ve mai mai. – Ama Pachuau

Tunlai chu Mizo tawnga hnam dang tawng film lettute chungchang a ri zing hle mai a, kei chu tawng chungchang hi ka hriat ve vak lem loh avangin ka sawi lo vang a. Mahse, heti tak maia Korean film an let tam hi chu a tul em em em maw ni le ka ti a ni. An hmel hmuh a nuam tih lovah chuan engmah an film atang hian zir tur a awm lo, vai film tha tak tak hi let sela a tawk chauhvin ka hre mai. – Hmar Sangtea

kan ram hian lirnghingte hi a tawng ve ta zeuh zeuh mai a, chhiatna lian tham em thlen lo mah se hun hi chu a hmawr tawh takzet chuan kei hian ka hria a ni. – Malawma

Tun hnaiah hian in chanchinbu phekah hian a phek lai mawng lam vel fiah lo deuh ang kha a awm ta ngai lo va, ka lo ngaimawh thin leh ka chhiar duh lai thin a ni si a, ka lawm hle a ni. – Fakpuii pi

Tunlai hian Naupang Sunday School Inkhawmpui tura inbuatsaih hun lai a ni a, kawr thar tih thawm a ri leh ta sup sup mai. Krismas lai ang deuh bawkin tun lai chu keini ang rethei deuh tan chuan mangan thla a ni leh ta der mai a, a hrehawm thin hle mai. – Asangtei

Naupang inkhawmpui turah zirtirtute hian naupangte hnenah kawr thar neih loh tur tih an sawi ve ziah a; mahse, anmahni ber ber (a bikin hmeichhiate) hian kawr thar hi an nei deuh ziah zawk niin an sawi. Tak tak ni maw? Thil reng rengah hian a hmalatu turte entawntlak loh an nih chuan an zirtirte tan hi chuan tih ve mai a awl khawp. Hman deuhvah pawh Kohhran hmeichhe lam emawin inneih inkhawma kawr inang hak ang chite kha an duh loh thu leh ti lo tura mite an ngenna an chhuah a, Kohhran Hmeichhe hruaitute vek khan an fate an han hralh dawn leh mo an neih dawnah an fate an dang leh thei tak tak si lo va, engmah a an phah lo ta niin ka hria. – 8794686442

Hman zanah kan venga thu rawn sawitu pakhat chuan, “Tun laiah chuan kan nuihzat, drugs addict, inchiu thinte hian AIDS hi an pu darh vak tawh lo, sorkar leh tlawmngai pawlin tan an la nasa a, hriau pawh an inhman tawm ngai lovin an supply vek a, condom ni se sem a tam si a. Tun ang laiah chuan hetia kan en maia mi smart tak tak, fimkhur si lo, bawlhhlawh lo nia ngaih mai turte hi an hlauhawm tawh zawk,” a ti a. A dik vek lo mai thei a; mahse, kawng tam takah hian a dik ka ring tlat. Mi titi leh a hre deuh sawi atang, nu leh pa ni reng sia mi kawp ching an tam em em danah leh Kohhrana inhmang tak, mi hriat lohva tal herh hreh miah loh an tam dan han en mai hian… – Matetei

Kar hmasaa Online-a bazar chungchang kha ka lo chhiar a, a tanna kha a dik khawp mai. Dawrkaite hian han do hle thin mah se a rehin ka ring lo. Chu ai chuan anmahni hi an inenlet sela, vawi khata hlawkna um chiam hi tum lo sela, zawi zawia hlawk hi tum mai sela, chu chu a tha berin ka ring. Keini aia changkang, sap ramah pawh online hi a lar hmasa fe a; mahse, tun thlengin dawr siam tumah an thulh tak tak chuang lo. Chuvangin, online hi dawrkaite sum tichhe pha tak tak ni se sap ramah hian engtin emaw an ti daih tawhin kei mi mawl hian ka lo ring ve ringawt mai a ni. – SangteaCT

Aizawl Veng pakhata KTP chuan khawpui chhunga riahna tur nei lo, zana khawlaia riak mai mai thin, ruihhlovin a tihbuaite tan zanah hun an hmang tih thawm ka lo hria a, an ti tha hle a ni. Kan Kohhran thalai pawl tam tak hi chu an huam chhungah, anmahni nuam tih danin rawng an bawl ni mai hian ka hmu thin a, he mite veng tih dan hi veng dang pawh hian entawn zel sela, mi sualte thleng phakin rawng han bawl zel sela tih hi ka tawngtaina a ni ve tlat mai. – 8794686442

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?