Sawhkhawk (August 5, 2018)

Sawhkhawk of the day
Chakmaho hi engtin emaw tih dan ngaihtuah ang u. Mi hi an ngam tual tual mai. Chutih rual chuan thiamna lamah hian kan phak lo tual tual mai em maw ni a tih theih a, kan ram chhungah chuan engtin tin emaw hna sang an thawk tur leh an zir tur hi kan dang thei mai thei a; mahse, UPSC tih ang duang velah hian kan tluk lo ta fo mai a, Mizo thalaite hi tharuma nawr a tul huna nawr thei tura kan tanrual leh intihchak a tul rualin thiamna lamah pawh hian anni tluk leh el tura kan tan chu a ngai hle a ni. Thiamna hi a pawimawh si a, tharum aiin kawng tam takah chuan thil a ti thei zawk tlat bawk si. – Ama

Zekhel intiho kha ngati nge Zoram sualna an khelh zingah ei ruk te an khelh ve loh aw… kan ram chhiatna ber, kan nih tur ang kan nih phak lohna ber ni zawkin kei chuan ka lo hria asin maw le! – Muana

Engati nge India ramah hian politics hi kan buaipui em em mai ni tih hi ka zawhna fo a ni. Mi ramah ka la awm lo va, an chanchinbu pawh hi ka chhiar tam lem lo va; mahse, keini chu khawi state maiah pawh hian thuneihna duh avanga inbeihna hi a lian em em vek mai hlawm hian ka hmu a. Hei hi keini Kristian ramah pawh hian kan chhawm lut ta zel ni hian ka hmu a, India rama awm kan ni si a, inbiakpawhna a tha tawh bawk si a, kan Kristianna aiin thuneih kan chakna hian min hneh awlsam ta zawk ni maiin kei chuan ka hmu a ni. – Puia

Mizorama zaithiam chhuak reng reng, a bikin Pathian fakna hla satute hi engati nge kikawi deuh deuh, style deuh deuh kan ti dawn emaw ni hian an zai kher zel le? Hetia han ngaihtuah hian mawl taka zai, hla thluk tluang zel hi Mizote hi chuan ngaihnawm kan tih hi niin ka hria. Zai kikawi kual chiam chiam hi chu a tehnaa teh ralah chuan an lo thiam (skill) zawk mai thei a; mahse, lar leh mite lawm hlawh hi chu zai dam raih mai zel hi an ni zelin ka hria. Tikual vak vak lovin, Mizo hmaa i zai dawn chuan Mizo rilrem zawngin zai mai mai teh! – @

Pathianah hian innghat phawt mai ila, kan ram buaina, mi mal harsatna leh pawl inlungrual loh thin pawh hi a reh mai ang. Pathian dah hmasak ber hi chuan mi hi a hruai a, a dik lo thei thin lo. Kristian intite hi i inenlet thar ang u. – Papuii

Tunkar khan chanchinbu pakhatah ka lo chhiar a, BPL ni tur si lo, a tehnaa tling phak lo; mahse, BPL chhungkuaa inziak lut an awm thu ka lo hmu a, a tha lo hle mai. Heti hian ka ngaihtuah ta a, tute mai pawh hi kan theihna lai zawnah hi chuan kan hlemhle em em vek ni mai hian a hriat a ni. Officer liante ei ruk hi a len avangin an langsar hma a, chutih rualin keini mi retheite pawh hian kan ei ve theihna lai zawnah hi chuan tih hreh hi kan lo nei bik lo vek mai hian ka hmu. Kan Pathian thu awihnate hi a takin lang chhuak se ka va ti thin em! – MkSiama

Mizoram, Kristian ramah hian Pathian thuawih lo hi kan va tam awm em aw!! Tunkara kan hriat angin mahni awm lohna tur hmun, BPL chhungkuaa awm an lo awm tih han hriatte khan a tichiangin ka hria. Ka mi mal ngaihdanah chuan, he Mizo tlawmngaihna avang ringawt pawh hian chhungkaw pangngai ni ve si, rethei lutuk han nihte pawh a zahthlakah ka ngai a. BPL-a awm lo hram turin ka beih hram hram ka ring a. Chutih lai karin nei em em chunga lo awm ve duh an awm tlat hi chu a mak hi ka ti lo thei lo. A awm ngei turte ka dem lam a ni lo va, a awm ngei tur ang chi hi chu an awm, chutiang ni lo ang chui hi chu a a dik loh vakah a zahthlak a ni tih kan hriat a tulin ka hria. – Remtea

In chanchinbu a ngaihnawm thin e. Sawisel pawh in dawl fu zel a, fak pawh in hlawh viau bawk. Sawhkhawk hi thu ngai chhuah a awm em ka hre lo va, inang deuh erawh chhuah a awm thin. In chanchinbu hmelhmang hi mi thenkhatin an rawn sawisel thin a, kei chuan Mizoram chanchinbuah chuan han en maia chhiar châkawm ber niin ka hmu ve tlat che u. A mawi a, colour inchawih pawh a mawi thei viau mai. Mizotawng lamah erawh an rawn sawi thin angin, tihsual ve deuh deuh chu innei thinin ka lo hmu ve a, a har em a, a awm lohna pawh a awm lem lo, tan lakna tur zel a ni a. Engpawh ni sela, in chanchinbu chhiar a nuam hrim hrim mai, Zalen hi lo vul zel rawh se ka ti a ni. – Mamuana

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?