Sawhkhawk (Dec. 10, 2017)

Sawhkhawk of the day
Kan sorkar hnathawkin 7th Pay lak an
tum tlat hi an tanna laiah chuan a dik hmel khawpin ka hria a; mahse, mipui nawlpui atanga thlir chuan kan ram tan hi chuan tihngaihna a la awm lovin ka hria. Heti khawp hian kan sorkar chu sum nei lovin a buai a tihngamin ka lo hre ve a, mi tam takte sawi dan phei chuan life-time-a lirthei chhiah chawi zawng zawngte pawh hi sum siamna niin an sawi a. Kawng dangah pawh, sum tihchet a ngaihnaah sorkar chet theih lohzia kan hre theuh va, hetih laia hlawh sang lo phut hi a ni thei lovin ka hria. Kan ram economy hian a la phak lo, mi retheiin kan tuar nasa leh ber dawn bawk. Sorkar hi tang tlang ngam sela ka ti hle a ni.. – Sangtea

Zalen hi a chhiar a manhla thin a. Miin an sawisel thin cheu va, sawisel âwm tak tak pawh a awm thin a; mahse, a tlangpui thu hi chuan kei chuan ka fak ve tlat che u a ni. Chawlhkar khata vawi khat chhuak tih avang hian an dem cheu va, a âwm ang viau mai a. Mahse, kartluan hian in khawih hman bik lo mai thei a, tihsual neih hi mihring zia a lo ni bawk nen, a âwm tihpui tam tak hi ka nei che u. Chutih lai chuan, fimkhur loh vang liau liaua tihsual ang erawh hi chu ka pawmzam mai bik lo. Fimkhur loh vanga tihsual hi lo chhiar ringawt hian a hriat ve khawp a nia…, tang zel teh u. – Amawitei pu

Sorkar hnathawkin hlawh tam zawk ngiata an nuar hi mipui min hmangaih lo niin kei chuan ka ngai. An sum lak luh hi keini mi rethei pawhin chhawrna tur tam tak chu kan nei ngei ang; mahse, tun atangin thil man sang tur ringawt pawh hi keini tan chuan ralpui phiara phiar a ngai leh tawh der tawh a nia. Kan in luahna neitute lah chuan in luah man tihtovah min vau nghal ngawt hlawm bawk si. – Mavaltea

Krismas a hnai ta hle a, rilruin Bethlehem lam a ngai ta riau mai. Mizo Kristiante nunah hian Krismas lai hian engati nge kan lung a len tlat le tih hi ka zawhna thin a ni. Min chhandam tura Lal Isua Krista lo pian hun, hun lawmawm niawm zawka ngaih tur a ni a, chutih laia kan lo lungleng daih hi a mak angreng ka ti thin. Lunglengte erawh ka dem hran lo, mak ka ti ve mai a nia…. – Ralte Lindz

Krismas dawna dawrkaihovin thil an tihto chungchang kha ka lo sawi chhunzawm ve loks! Hman ata tawh ka lo vei thin a ni a, Kristian kan nihna anga mite tana kan luan chhuahna hun ni awm ang takah hian mite ei teuh kan tum thin hi a mak ve ngawt mai. Dawrkaite leh sumdawngte hian an thil zawrh hi titlawm sela, an hralh teuh phah zawk ka ring a; man to taka an hralha an hlep zat ang vel hi chu an hlep phak tho ka ring ve ringawt. An lo hlep pha lo deuh a nih pawhin mi dang tana an inpekna leh an insennaah ngai mai sela, Pathianin a thlawnin a kaltir tawp lo vang tih ring ngam sela a tha ngawt mai. – Mi rethei fa

Synod Inkhawmpui an hmang mek a, kan ram Kohhran lian ber a nih miau avangin an rorel hi kan ram kalphung tur a nihna chen a awmin ka hria. Secular college din an tum tih thawm a awm a, tihlawhtling teh se. Kan ram hian zirna tha hi a mamawh niin ka hria a, Synod enkawl leh Kohhran enkawl hrim hrim hi chu a tha zel chuan ka hria, ram dangah pawh. – MkSiama

Ualau taka zu zawrhin a ken tel chu zu in suala ngaih lohna leh ualau taka zu in ngamna a ni a. Naupang leh tleirawl zawkten ualau taka mi zu in lai an hmu a, hei hian an rilruah eng lam hawiin nge a hruai ang? Ngaihtuah tham tak a ni. – 9774354495

Pathian ngaitu tak tak chuan ni tin, darkar tin Pathian a au thin. Aw ka thian, eng anga zingin nge Pathian i lo auh ve thin le? – Angaihte Lungsum

Kan ram hruaitu, ram hmangaih intite hian mipuite hma kan sawna kan changkan hi an duh tak tak lo. Hma kan sawnna tur atana pawimawh em em electric (kawlphetha) hnianghnara kan neih theih an hlau. Eng eng emaw hydel project pamtul tam tawh dan atang hian a lang reng mai. Hei bakah hian inbiakpawhna lamah leh inkalpawhna kawngpui an siam dan leh an enkawl dan atang hian mipuite hi kan changkan an hlau ka ti. – Ralte Boyz

Khawiah pawh awm ila, kan rin Pathian hi han thlahthlam duh miah lo mai ila, rau chiam lo mah ila, han phatsan duh miah lo mai bawk ila, kan tum hi chu kan kai ve mai hi chuan ka ring. – Kimkima

ZPM chuan thawm an nei na hle mai, eng nge an an zel dawn aw? An hruaitu pakhatin vantlang inkhawma thu a sawi ang deuh khan, puitling hi chu kan awmnaah hian kan nghet angreng fu a, ram lak a har chu ka ring. Chutih rual chuan an hruaitu leh puipa thenkhat hi hman ata tawh Mizo mipuiin kan ngaihsan rawn an ni ve a, ram hi chu an la ve nual chuan ka ring a. Chutih rual chuan a hun a thleng ang a, party nghet sa bawk hi kan bawh leh zawk tho chu ka ring. – Aizawl girlz

Ka huphurh lawk thin chu zu kan han zuar ang a, eng emaw chhete accident a han awm ang a, fel em em intihoin, ‘Kha maw, ka tih reng kha, hetiang tur kan hriatlawk avang hian alawm kan duh loh,’ an han ti vel hi alawm ka huphurh lawk. Zu khap bur laia chhiatna rapthlak pui pui kha an hre duh dawn tawh der si lo. – Tluanga

Hringnunah hian harsatna tam tak a lo thleng thin a, tu pawhin, mi hausa, rethei, piangsual leh mi pangngai chen hian harsatna kan tawk thin. Kan harsatna tawh hi keimahni kan inang lo ang bawkin a inang lo va, thenkhat tana harsatna tling mang lo hi ka tan chuan harsatna lianpui a ni thei. Tu pawhin harsatna a tawhin insawinepsak mai lovin, kan tanpui thei a nih chuan puih dan kawng zawn hi a puitling zia a ni. Chutih rualin harsatna inbawhbehtir erawh mi puitling lo zia a ni ve thung a, mite pawhin an paltlang tawh tia vaupung tina chunga tawn ngam hi a huaisen a, kan tih tur pawh a ni tih hi he Zalen chanchinbu kaltlang hian ka rawn sawi ve a ni. – Amah Sangte

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?