Sawhkhawk (Dec. 3, 2017)

Sawhkhawk of the day
Zuk leh hmuam, a bikin meizial zuk lama
kan ramin hma kan sawn chu a lawmawm hle mai. Tih tak taka beitu an awm hi chuan Mizote hi chu tih hi kan nuam khawpin ka hria a, thu hi kan la awih tlang viau zel a ni. Zial zuk sim leh nghei lamah pawh a tan la pawl an tan tak tak chuan kan kâng deuh zawt zawt mai alawm. Meizial hi Mizote rilruah hi chuan a bei nghet viau hian ka hria a, hma sawn duak duak erawh a harsa khawpin ka ring a; kan culture nen a inzawm tlat mai a. Tan la deuh deuh turin a hma latute hi duhsakna ka hlan a, mipui pawhin kan zawm tlat a tha khawp mai. – Sangtea

Thisen sang chungchang in rawn ziah kha a dik ka ring khawp mai. Thisen sang leh stroke bakah khan tun laia kum naupang tete veleh chhawngten tha na kan nei sek pawh hi zu in leh kuhva kan ei tam bakah kan exercise la tlem lutuk hi a nih ka ring ve ringawt. Dik tak chuan thalaite hi kein kan kal mang tawh lo va, lirthei kan nei deuh vek tawh a, hnai te kal nan pawh kan hawl chhuak zel a, kan thlan a tla lo va, kan taksa hi a che tlem em a ni. Hei hi kan taksain a tuar hlawm niin ka hria. – Muanpuii

Pathianni in thil rawn chhuah chu keini ang tan chuan chhiar a nuam hle mai. Keia lo ngaih ve dan mai mai chuan, zuk leh hmuam hi mawl takin ka ngaihtuah a, kan hriselna a nghawng dan tih vel hi ka ngaihtuah ve vak lo, kan thih hun hi chu a la thleng dawnah hian ka ngai mai a. Mahse, sum a heh lutuk hi ka sim phahna a ni a, mi dang tana hnawksak kan lo ni bawk si a, mi zingah kan chep tlat zel mai a, mi hi a thunun tlat zel mai a, tih loh hi a lo tha a, hriselna atan a tha a, sum a hek lo bawk. – Muanpuia Pu

Tunlaia legal Metrology-in motor parts leh electric bungraw zuarte an check hi a tha khawpin ka hria. Mipuite hi sumdawngte hian min bum nasa lutuk thin ni hian ka hria a, mipui lah kan mawl si a, a bikin driver-te phei hi chu kan mawl lehzual a, hetianga an ti hi keini tan hian a hlawkna a awm ve dawn tlatin ka hria a ni. – 8794696442

BJP chu an va tiho angreng ve aw..!! Central lamah an ngialngheh tehreng nen, kan ramah lah chuan an President duh lovin an inhawrkhawm ta vel mai mai si a. PM Narendra Modi ang rilru pua ram an tana tha tur tak tak chu an ngaihtuah thlen hmel lem loh ka lo ti ve khawp mai. – Keimah Renthleia

Inthlan nan kum khat emaw chauh hun kan nei ta a, party hrang hrangin tha ber nih an inchuh lai hun kan thleng leh ta a, a nuam chho leh dawn mup mup khawp mai. Keia lo hmuh ve dan mai mai chuan, kan party lian pahnih hian sem lampang an zuar ta tlat mai hi a Kristian lo riau hian ka lo hria a. Rim taka thawka ei tur hlawh chhuak tura tih kan nih laia awlsam leh a thlawna neih theih lam an zuar leh thin hi Mizo mipui, thatchhe sate rilru zawng zawng a ni zawngin min hruai nasa lutuk ang in ka lo hlau ve mai mai a ni. Tangrual pawl lah hi eng nge an thlen chin ni dawn a hriat loh va, an thawm hrim hrim hi chu a lian rih khawp mai a, kan han inthlang ang a, engmah an ni lo vang tih a hlauhawm angreng ka lo ti ve mai mai. – Thaa

Kan hma lawkah Kristiante hunpui a lo thleng leh dawn ta a, nasa takin kan inbuatsaih leh ta mek e. Thlarau lam leh tisa lamah nasa takin kan inbuatsaih leh hlawm dawn a, sumdanwgte tan lah buh lu chuh lai a ni a, khawvel taka hman tumte tan pawh inkhawl hun lai a ni bawk. Engpawh ni sela, he hunpui hian hlim leh lawm taka hman a phu a, Mizote tan phei chuan a nghahhlelhawm zual ni hian ka hria. Hlim takin, nuam takin, dam taka hmang turin Zalen chhiar ve thintute ka duhsakna ka hlan e. – Sam

kan Ram kawng chhia hi mi hian an sawi an sawi peih hi ka tia, kei chu kan sorkar kalphung leh sum chevel thlir hian a nih tur ang vel niin ka hria. Chuvangin, ka phun ka phun vel peih loh, mipui chuan kawngchhia hi kan phu lo pawh a ni mai thei; mahse, kan sorkar kal dan erawh hi chuan hetiang kawng chhia neih hi kan phu tawk niin ka hria. A aia sang hi ka beisei lo hrim hrim tawp mai a ni. Mi dang pawh hi sorkar se, kawngpui hi kan nei tha tehchiam chuangin ka ring lo bawk. – 9436360899

Lirthei neituten a hunna tur in neih vek tur tia sorkar thupek chu kan hmang tan ta a, kan ram hian a mamawh tawh hle reng a ni. Sorkar hian a kih hnawk tifel leh tur hian huaisen deuh hleka thutlukna a siam loh chuan kan kawngpui hian min so tawh thlawt lo a ni e. He thupek hi lirthei nei zawng zawngten zawm vek sela, kan ziaawm phah deuh chuan ka ring a ni. – Kristiana

Tunlai chu Pu Hawla leh a in a lar hle mai a. A insawi fiah dan hi thil ni thei a ni chiah mai a, a dik loh bi lo mai thei a; mahse, khu lama ram petu nia an sawite khan a thlawnin, a phute hnenah an pe thin ni ang deuh khan an sawiin ka lo hria a, ani lah kha neitu nihna nei turin a lo inseng teuh mai bawk si a, khawi emaw zawk zawk chu dik lo an awm a ni ang. TV-a an lo kawmnaa a sawi ang khan, khati zat let in ziak tel duh lo kha a nih a rinawm chiah lo ve tho bawk. Thutlukna siam a harsa hle mai. – LRA

CM Hawla in an rawn tihlanna vel kha TV-ah ka lo thlir ve a, a sak pum hunah chuan, khu lai vela in luah man to dan ngaihtuahin, sum hnar tha tak a ni dawn chiang hle mai. A neih dan a sawi te pawh kha a dikin ka ring a, sum a sen zat erawh khati zat zat kha a tul em ka hre thiam ve lo thung a. Mawl takin heti hian ngaihtuah ta ila, mai hausa chhungkua an ni sa a, state khat Chief Minister pawh hei chen lo ni tawh a ni a, khatiang in sakna sum leh tihfelna tur sum kha chu a nei ang tih a rin theih chuan ka hria. Chutih rualin, puh a nih anga dik lo taka thil a lo ti a nih tak tak vaih chuan, mi tam tak rilruah chuan a thil tha tih tawh zawng zawng hi thaichhiat a ni thung tawh dawn a ni. – tawti

ram Kawng chhiat chungchang hi, “UT hun laia Zawhte Dum kha tunah chuan a upa deuh tawh a, Var tawh tak a ni; chuvang chuan, Zawhte dum kha a hma aiin a Var tawh ti zawngin a Var tawh ti ula, a Var lo tiin A Var lo ti rawh u le,” tih ang vel a ni. – A.Mawia, Tkv

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?