Sawhkhawk of the Day
CAB chungchang hi kan buaipui a, a awm khawp mai. Kan sorkar pawh hian state danga an tih ang hian, “Kan chhuahsan ang,” ti satliah lovin, NEDA hi huaisen takin chhuahsan a hun tawh hle a ni. Mi state-ah chuan an lo tal na rep rep khawp mai a, an hruaitute pawh an hnam him nan chuan an zahpah reng reng lo. Thenkhat phei chu saruakin an inlan tihte pawh a awm, kan sorkar leh Mizo tu pawh hian hnam te hi kan himna tur kan ngaihtuah a ngei em em reng a ni tih hre nawn leh ang u. – Arema

Kan rama zirlai pawl lian pahnih chu sikul tan hma chungchangah an ngaihdan a inang chiah lo ni awmin ka hria a, an tanna pawh a dik ve ve mai thei. Mihring chuan ngaihdan hran theuh nei kan ni a, a awm viau mai. Keima ngaihdanah tak hi chuan tan hma hi tha ka ti khawp mai a; mahse, nu ber buaina erawh a tam phah deuh chuan ka lo hre ve a. Kan mitthla ber pakhat, kawngpui lah chu a thawl phah em em chuang lo bawk a. A enga pawh chu ni ta sela, tuna mi ang hi eng nge maw a pawina le? Zirlaite pawhin an hmang thiam dawn tan chiah a, han thlak leh kher hi a tul pawhin ka hre lo. Chutih rual chuan kan sorkarin an campaign laiin an lo intiam tawhna kha a ni a, tihhlawhtlin tuma hma an la hrim hrim hi chu a lawmawm. – Zara

Citizenship Amendment Bill chungchangah hian ka duh aiin kan ram hi kan la che na lo. State dang, Assam leh Tripura vela an nawrh dan hi ka lo hre ve thin a, keini ai hi chuan an bei na deuh chu a ni. Anni chu an hnam himna tur a nih chuan lal pawh hi an lo châk vak lo a ni ang, sorkar an thlawpna tih angreng te, MLA leh minister an nihna te pawh an bansan nawl nawl mai, hnam huaisenah kan inchhal rual hian kan hman tan hian tun aia kan huai lehzual hi chu a ngai a ni.

Sikul tan tlai leh hi kei chuan ka thlawp e. Mipa tam tak chuan an hre thiam pha lo vang a, nu tan chuan buaina a thuah hnih duh khawp mai. Fate engmah eitir lova kaltir kan ngam si lo, kan siamsak a, kan hruai a. Hawah kan che lehnghal a, kan inpeih leh meuh chuan a te lam phei chu an lo bâng leh titih hman a, lam an ngai leh a, kan haw chuan chhun lai a lo ni tawh a, hun rei vak lo hnuah zanriah buatsaih a ngai zui a, thil dang a tih hman loh. Zing thawh hreh angah min ngai hi a dik lo, Mizo nu, a bikin naupang tenau deuh la kawlte hi mut duh mah ila kan tho tlai tak tak thei lo, peih loh pawhin thawh tho tho a ngai. – Numami

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.