Sawhkhawk (Feb 11, 2018)

Sawhkhawk of the day
Good Governance hi kan sawi thin a, a tak tak hian kan thuneitute hian kalpui dawn ta se, Mizo mipui zingah hian ngam lo tak tak hi kan tam ngawtin ka ring thin. Ram hruaitu leh sorkar hnathawk liante hi kan han mawhpuh ngawt zel tak na a, mipuite pawh hian tisual lui tur hian kan nawr ve chawk thin ni hian ka hria. Contract hna kan zawn danah te, hna hmun kan tum dan zawng zawngte han ngaihtuah hian, tute emaw zar buai lo hi chuan mipui pawh hi kan awm thiam tawh meuh lo zawk ni mai hian kei chuan ka hmu a ni. A tak takin sorkar tha hi nei dawn ta ila, tuna thiltithei tam tak hi engmah lo an ni tawh dawn si a, kan ngam lo fur mai hian kei chuan ka lo ring deuh a ni.. – Mamawitei

Thawkkhat lai khan kan sawiin kan ti chamchi thin a. Mi tam tak hian social media hi kan la hmang thiam lo cheu zel hian ka hria. Kan phone hman hi smart phone a ni a, internet nen kan thlunzawm vek tawh a, thu maksak deuh deuh eg. chumi khamiah Kristian chuti kha ti tih ang chi an han thehdarh vak a. BJP-in Kristiante min beih dan tur ang chi te leh tun hnaiah pawh Good Friday tihtawp tum ang chite pawh an thehdarh a. A mak hi ka lo ti ve mai mai thin a, smartphone hmang chin hi chuan thil awm ang deuh hi ngaihtuah chhuah thiam ve awm hi ka tia, thalai zawk tan phei hi chuan kan phone atang vekin thu dik a nih leh nih loh en vek theih a ni tawh a, thehdarh hma hian chian hmasak thin hi a tha khawpin ka hria. – 8794686442

Hmeichhia chuan thu awih tlatin ngawi rengin zir rawh se. Amaherawhchu, hmeichhiain zirtir zawng ka phal lo, mipa chunga thuneih ka phal hek lo, nawi rengin awm zawk rawh se. Bible, Pathian thu a ni. Hriatna tura beng nei chuan hre rawh se, mihring thu a ni lo tih hi. Eng mi pawh nise mipate zah thiam nih hi ringtute awm dan tur dik tak chu a ni. Tlawma lak chi a ni lo, mipa kan nih avanga a nawm a maka hmeichhiate chunga inlulin erawh kan tih loh tawp tur a ni, hmangaiha lungruala cheng za tur kan ni zawk e. – Hruaitea

Kan sorkar hian chu mi rethei a va rawk nasa ve aw, tax a sang em em a, bill lah a sang uchuak em em a, ram hmangaihtute hian mi harsa zawk min lo rawk reng alawm mawle! Kan sorkar hotute hian hria se ka duh chu anmahni anga sum leh pai awlsam taka lak luhna nei kan ni lo e. – 8014357478

Central lama kan hrawn sorkar hi mi tam tak hian Kristian tan an tha lo ti zawnga sawi hi an awm thin a. Keini ang thil thui tak hre lem lo tan hi chuan hriat vek a har a, kawng thenkhatah chuan kan tana hlauhawmna pawh an awm mahna; mahse, keia ngaihah chuan kan sorkar lo hrawn tawhte ai kha chuan mipui mimir hamthatna tur hi chu an ngaihtuah thiam zawk ni hian kei chuan ka hmu a, Hindu pawl daih mah ni se ka rilru hian a tan ru ve deuh tlat mai. Mizoramah erawh an tha ve kher ang ka tihna phei chu a ni lo. – Ruata

Engati nge thangtharho hian ‘Thang leh Cham’ hi an hriat hran loh mai le aw..? US President chu India ramah lo zinin Chawlhniah a lo thleng a, Thawhlehniah a haw leh a. Doordarshan, Aizawl pawhin ni thum chamin a sawi tlat mai. Ni thum thangin emaw, ni khat chamin emaw a lo zin a ni si a. Ni khat, Thawhtanni chauh a cham a ni. Khawiah pawh zin ila, kan thlen ni leh kan haw ni hi kan cham hun chhunga chhiar tel a ni ngai lo. – Matea pu

Kan sorkar hmalak dan hi lu chauh thang (NLUP sem) a, taksa bung hrang dang thang lo (department sum nei awm lo, neih ahneka leibaa khat) nen a inang berin ka hria! – 9774354495

Kan sorkarin sum a enkawl thiam loh avanga lei a bat tamzia han hriat hi chuan current neih loh tihte chu a lo nep hle mai! Kan la thim dawn chauh a nih hmel e! – 9862597997

Mizoramin kum 100 chuang chanchin tha thlen nia kan lo hman tawh, January 11, 1894 chu Presbyterian Kohhran din ni a ni zawk tih Synod-in a pawm thu Kristian Tlangau buah tar lan a ni hi a va mak em! Hetia Kohhran ni pawimawh, chhim leh hmar Kohhran hruaitu hmasaten lungrual taka an lo pawm tawh avanga monument tam tak siam a nih tawh hnuah, Mizo Synod-in Presbyterian Kohhran din ni a han ti ta mai hi a va mak em! He thil hi Baptist Kohhran nen an inngeih lohna rah, an inkar tizautu, Setana thang a ni ngei ang. Kohhran hruaitu hmasa boral tawhte an zahawm hle a, Kohhran mipui an tiluhai hle zawng a nih hi. – Omoma pu

Sumdawng politician, belh leh paih specialist-ho an han chet chuan AMC (Aizawl Mahni tanghma hai Council?)-ah pawh sorkar dang a piang leh ta. Councillor-te tumah indem thei an awm lo, kung khata rahho vek an lo ni e. A thlangtu mipuite leh chung lam duh dan nen a inmil ang em le? – Rema dp

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?