Sawhkhawk (Feb. 12, 2017)

Sawhkhawk Of the day
Zirna in lem nia sawi, NIAS-a kan thalaite thawn an ni chuan kan ramah nghawng a nei lian hle mai. Mi thenkhat hna chuan a tawrh phah bawk a, a zia lo hle mai. Mi tinin titiah kan neih bawk a, thawm riva pawh a tam hle a ni. Ka lo ngaihtuah ve daih chu, eng pawh hi ti dawn ila, fimkhur a ngai a ni. Hmachhawp kan neih reng reng hian ngun tak leh fimkhur taka thil tih hi Mizote hian kan zir a ngai a ni, miin a hlawkpui hi kan tan a lo tha ve kher lo thei a, chutiang zelin, thil hi zir chian peih a ngai hle a ni. – mapuia virgo

Kar hmasaa in article chhuah chuan beng a tivarin a ngaihnawm hle mai. In chanchinbu hi chu kar khata vawi khat chauh chhuak a nih avang hian a phek tin hian chhiar a hlawh theuh mai a; chuvangin, news mai ni lo, thu dangah pawh hian ngaihnawm tak tak hi han tichhuak zel thin teh u. – Buanga

Kar hmasa sawhkhawka Sylvia intiin a rawn chhuah kha kei pawh ka ngaih dan chiah a ni. Kan ram hruaitute hi Pu Trump-a ang deuhva huai tak leh mawl deuh taka an kal ngam a ngaih chang a awmin ka hria. Mipui tihlawm leh an lungawina tur ngawr ngawr ringawt an zawn hi chuan kan ram hi a tha thei lo vang a; tin, mi zawng zawng an tilawm thei chuang lo vang. Tha turah chuan huai taka an tan ngam ve a ngai a ni.  8794686442

Tunlai chu kan ramah NIAS a lar hle mai a, a dik leh dik lo ber pawh a hriat ta nek lo ve. Sorkar hian a tih tur a ti lo a ni mai thei a, khatianga zirna in chiang mang lova kan thalaite an thawn liam ngawt mai kha chu a zia lo ka lo ti ve khawp mai. Tute emawin sum siam nan leh a tha tur ngaihtuah lova a awlsam sam an lo thlang fel mai a ni lo maw tih zawhna hi ka nei a ni. Khatiang kha chu kan ramah hian thleng nawn tawh suh se. – Rampuia

Tun Pathianni hmang hian Mizoram Presbyterian Kohhran Hmeichhia chuan Inkhawmpui an hmang leh dawn a. Lo ngai reng mah rawh, nuho hi kan nula leh tlangvalte aiin an incheinaah an sang leh daih zawk ang. Inkhawmpui kawr thar pawh an nei leh sup sup mai ang. Thalaite zawk hi chuan conference leh inkhawmpui dawnah kawr thar hi kan ngaihtuah teh vak miah lo asin. Tumah han inhau chiam tur pawh kan awm lo, nuho hian thawmhnaw thar phei hi chu an lawm mah mah zawkin ka hria! – 8974232935

Zirna in lem, NIAS-a kan Mizo thalaite tirh thlak an ni leh zirna in lem mai mai a lo nihzia thu chuan kan ram titi a luah nasa hle mai. Opposition-te lah chuan rorel laite beihna remchang takah an lo la a, chanchin pawh a ngaihnawm a, a ninawm titu tan pawh ninawm khawpin chanchinbu leh chanchin tharah hriat tur a awm a. Keiin ka lo ngaihtuah ve daih chu, ka hriat tlem vang ni maw, ngati nge tlangval pakhatin a sawi chhuah hma khan tumahin kan lo hriat loh le? Opposition lam pawh hian an lo vei zui reng reng lo a ni em maw ni le tihna zawhna ka lo nei ve a. Nge, miin an sawi chhuah miau loh chuan tu han hriat chi a ni lo zawk. A zir ve mi dangte khan ngati nge an sawi chhuah loh le? Kha tlangval ang khan an huaisen lo a ni mai thei bawk e. – Sangpuii

Inhmangaihna Ni (Valentine’s Day) a lo hnai leh ta a. He hun hi nula leh tlangval tam tak chuan kan hmang thiam lo leh dawn tih a chiang reng mai. Kan nula leh tleirawl tam tak chuan an thianghlimna hlohna hun atan an hmang leh mai thei. Eng pawh ni sela, nula tlangval chu inngaihzawn tur a ni a, inhmangaih hi a thiang lo a ni lo; mahse, ka thalaipuite hian thianghlim tak, Pathian thu tak hian a inngaihzawn theih a, a inhmangaih theih a ni tih hi i hre nawn fo ang u. V-Day hmang thiam lo zingah lo tel ve lo lul teh. A nawm hun chhung aiin i inchhir leh hun chhung hian a daih rei daih zawk dawn a nia aw…!! – 9436360899

Mi pawhin an lo sawi fo tawh, Mizoten thihna kan buaipui dan luih luih hi thlak a hun ka lo ti ve zuai teh ang. Vawi leh khata thlak burh chu a har a nih pawhin, invuina hmun bik neihte hi a tha tawh lo maw le ka ti a ni. Tuna kan kal danah hi chuan mitthi an awm hian a tuartute chhung chu sawi loh, an thenawm khawvengte zawng zawng nen hian kan in leh lo zawng zawng kan luahin kan tibuai nasa lutuk a ni. Heti lo hian, invui hunah te hian khawiah emaw, Hall-ah emaw hian ti daih zel ila, chu chuan kan thenawm khawveng kan tihbuai tur tam tak hi chu a tiziaawm theiin ka ring tlat. Veng thenkhatah chuan an hmang tawh nghe nghe mai thei. – Mazualtea

Pathian thu awiha a chanchin tha hriltu hnam kan nih chhung hi chuan kan hnam hi a boral mai mai lo vang. – Sangvala tea

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?