Sawhkhawk (Feb. 19, 2017)

Sawhkhawk of the day
Khua hi a thal chho leh tan dawn ta khawp mai a, mi tinte kan fimkhur tlan a ngai leh tawh e, kan inhrilh hriat thar nawn leh a ngai tawh a ni. Tun ang chho hi kum tina kan rama in kang avanga chhiatna thleng a tam hun lai a ni thin a, tam tak hi chu vanduai vang chu a ni ngei mai a; mahse, thenkhat hi chu kan fimkhur tawk loh vang a ni thin ang. Current kal sual hi kan puh fo thin a, hei hi a ni mai thei a; mahse, kan kalsan dawna current kan off hmak hmak hi chuan leak pawh a tlem a, short pawh a awm loh phah deuh thei ang. Fimkhur nan a tha hle a ni. – Mahruaii

Pathianni hmasaa Kohhran Hmeichhiate chungchang rawn sawitu kha ka tawmpui thlap e. Nuho hian an fate hi min hau va, incheina duh uchuak tak tak ang hian min chhuah a, a ni bik lo. Inkhawmpui kawr thar hi thalai zingah, nulaho ngat pawh hian kan nei ngai meuh lo, anni chu an nei deuh ziah, lo chik ve rawh. Lepler zawnga kan incheina an sawisel a nih chuan ka hre thiam; mahse, kawr thar hi chu keini ai hian an ngaihven zawk daih maiin ka hria a ni. – Mazuali, TKK

Kar hmasaa pakhatin a rawn sawi, mitthi vui chungchang kha ka ngaihdan chiah a ni a, a tha ka ti hle mai. Mitthi vui hi a hautak a, a tuartute lahin engmah kan ngaihtuah hman tawh bawk si lo va, dan angin Hall ang chi hmun remchangah hian invui kalpui mai ila, veng hla leh hmun dang hla tak tak atanga lo kalte tan pawh thutna a remchang thei ber bawk si a. Inhmun rem vak lova awmte tan phei chuan a tha lehzual hlein ka hria a ni. – Buanga

Kan Ram hi Kristian ram ni awm lo taka chet hi kan ching ve ta riauvin ka hria. Eng emaw lungawih lohna deuh han neiha kawng zawh emaw, han au rual leh poster tar han beih vel hi a awm lo pawh ka ti lo; mahse, a tharum zawng leh bomb tipuak ang deuh chi zawnga kan che ve fo ta mai hi chu a mak ka ti thin. Kan nawra te pawh hi kan Kristianpuite tho an ni a, a nawrtute lah Kristian bawk, tharum leh mi rikrapna ang zawng chia kan ti che thin hi chu a tha lo ngawt chuan ka lo hre ve a ni. Kristian kan nih angin a zaidawh zawngin, mi dangte tina lo zawnga tawngkam leh chetziaah pawh kan chet zel hi a inhmehin ka hria. – 8794686442

Tunlai chu NIAS a lar hle mai a, Pu T.Sangkunga’n a bân dawna a sawi ang deuh khan, tu nge dik bera leh dik lo ber pawh a hriat a hrasa ta nek mai. Ka lo ngaih ve danah chuan, sorkar hian mawh a phur lo thei lo niin ka hria. An zirna tur zawng zawng pawisa an lo pe lawk vek ringawt maite pawh kha a awm lo khawpin ka lo hre ve a. Eng angin nge an inremnaah an ziah chu hre lo mah ila, an lo ziak a nih pawhin an ziah dawn khan khatiang lo deuh khan kalpui dan an zawng lo em maw ni le ka ti ve deuh a ni. – Rampuia

Zirna in lem, NIAS-a kan Mizo thalaite tirh thlak an ni leh zirna in lem mai mai a lo nihzia thu chuan kan ram titi a luah nasa hle mai. Zirna in lem a nih leh nih loh fiahna mai maiah kan han buai a, a buaithlak ngawt mai. Khatiang mai mai chu fiah a harsat âwm lo tehreng nen. Engpawh chu ni sela, kei chuan sorkar hi ka dem a ni. – Sangpuii

Inhmangaihna Ni (Valentine’s Day) chu kan lo hmang zo ta reng mai a. Kar hmasaa ka rawn sawi tawh ang khan he hun hi nula leh tlangval tam tak chuan kan hmang thiam lo leh ngei mai tih ka hmu a, a pawi hle a ni. Zalen-ah pawh Pu?Hrekima’n a rawn ziah ang khan, zan khat lek hlim leh nawm duh avanga kan hlutna zawng zawng hralh phal khawpa kan â thin hi chu a tha lo ngawt mai. Hunpui dang pawh kan la thleng leh zel ang, vawi i khat hlim leh nuam i tih chhung ai khan i vawi khat hlim leh nuam i tih avanga hrehawm i tihna hun chhung kha a rei daih zawk tih hre reng tawh ang che. Ka lawm e. – 9436360899

NIAS chung-chang avang chuan kan Minister leh Youth Commission Chairman chuan bân an tum ta phawt chu a ni a, an thiam leh thiam loh chu hre chiah lo mah ila, an bân mai kha chu a tha reng a ni. Hetiang hi ram dangah pawh a thleng fo thin a, sorkar kal dan fuh lo leh tihsual palh hi a thleng ve fo thin a, ram dangah hi chuan miin an sawi fo angin, an tihsual miah lovah pawh hian a mawhphurtute hi chu rang tak hian an bâng mai zel a, a awlsam phian thin. Mizoramah erawh hi chuan nihna hi kan duh lutuk nge ni, kan mawhphurhna hnuaia eng emaw tha lo a thlen hian, nasa taka miin min nawr hnuah pawh hian kan bang hreh em em em a, kan insawi fiah nasa viau zel. Bang mai ngam thin hruaitu hi kan la nei ngai mang lo niin ka hria. – Mazualtea

Kan Pathian thuin a chanchin tha hriltute chu an boral ngai dawn lo tih a sawi a. Mizote hi Pathian chanchin tha hrilhna kawngah kan thawhhlawk ve tawk em em hian ka hria a; chuvangin, kan hnam hi chuti maia a boral hi ka ring lo. Mi tam takin kan hnam hi eng emaw ti taka khawimaw lai atanga min chimna avanga boral mai tur anga min ngaihna hi Pathian thu kan awih chhung hi chuan ka pawm ve thei miah lo mai. – MkSiama

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?