Sawhkhawk (Feb, 25, 2018)

Sawhkhawk of the Week

Mizoten kut kan neih zinga kan ngaihhlut leh tun thlenga kan la lawm awm chhun, Chapchar Kut kan lo thleng leh dawn ta a. Ka lo hriat danin kuminah hian a hmanna tur hmun lai vel chu kawngpui dan a ni leh dawn niin ka lo hria a, a lawmawm ngawt mai. Chutih rual chuan venhimna lamah tan la tel sela ka ti a ni. Kum danga kan hman tawhah, thlalak leh video vela kan hmuh thin angin hmeichhia, zu han in mai leh rui chhe lutuk thlengin an awm thin a, kan Mizo zia a ni lo. Kan incheina chu a Mizo pawh a ni mai thei a; mahse, kan chet dan erawh a Mizo lo thin a. Kan Mizo pi pute kha hmeichhia an rui ngai lo va, mipa pawh an rui buai lo bawk, hlim takin an hmang mai thin. Hei hi hemi ni bikah chauh tal hi chuan vawng thei ila a lawmawm ngawt ang. – Mamawitei

 

Zalen hi a ngaihnawm viau zel mai a, chhut sual pawh hi a awm ta mang lo va. A hmuh a nuam a, chutih rual chuan hmanah pawh an lo sawi tawh, a hawrawp dik lo hi nge maw ni, en mai hian hmuh a nuam lo riau hian ka hre thin a. A tawt lutuk emaw ni? – 8794686442

Hmanni khan he hmunah hian tu emaw khan a rawn sawi tawh a, kei pawh ka lo vei ve khawp mai. Social media, a bikin WhatsApp-ah hian thu maksak tak tak hi kan theh darh leh chiam a, kan nu leh pa, kan pi leh pu, a mawlmang ve zawkte hi kan tichiai leh chiam thin. ‘Chumi kha miah Kristian chuti zat an khaihlum dawn, tawngtaipui ang u,’ tih ang chi te, ‘PM-in Good Friday a titawp dawn,’ tih ang chi, thu awihawm loh deuh deuh hi kan vawrh darh chiam a. Kan thu dawn hi a dik nge dik lo tih hi kan vawrh darh hmain kan phone atang vek hian a check theih tih hriain, thu rintlak loh, mite tichiai thei vawrh darhtu hi i ni ve lo ang u ka rawn ti ve leh a ni. – Hruaitea

Kan lei dawh lai chu a chim leh ta ringawt mai a, a zia lo ngawt mai. Eptu lamin an sawi dan khan tun hnaiah khatiang kha a thleng zingin nunna chân pawh an awm nual thin mai a. Kan sorkar hian eng emaw chu a tih a ngai a ni. Tin, tun laiah hian hmun dangah chuan bailey bridge ang hi an hmang tawh lo khawp mai a, hetiang tho dawh an tum tlat hi inen fiah leh intuai thara tun laia ram dangte pawhin an hman ang hmang ve turin an in-update a ngai a ni. Bailey bridge hi chu vanduai palh a hlauhawm, a rinawm tawk tlat lo. A dang pawh a chim leh palh ang tih a hlauhawm alawm. – Mamawitea

Chapchar Kut kan lo thleng leh dawn ta a, hlim tak leh nuam takin, Zo tak siin kan hmang thei turah ngai ila. Tun hnaiah hian kan hlut ta telh telh niin a lang a, chutih rual chuan hman deuhva Krismas leh Kum thar hman chiam kan tum ang deuh khan, he hlimna kut hi nun hloh phah nan leh thil sual tih phah nan kan tleirawl leh nula leh tlangval tam takin an hmang niin ka hmu ve thin a, a pawi ngawt mai. Kumin chu kut hmangtu zawng zawngten thianghlim leh uar tak, hlim taka hman tum ila, hlimna kut a nih ang ngeia mi dangte tana hnawksak leh buaipui ngaia awm loh tum theuh ila a tha ngawt mai. – Ruata

Inthlan kan hnaih leh ta khawp mai a, chutih mek laiin kan sorkar hrawn lai sawisel leh dem theihna tur thil a thleng ta fo mai a, an khawngaihthlak angreng hlein ka hria. Ka lo ngaihdan mai maiah chuan tlak hmahruai a ni thei ang em? Heti tak maia tun hnaia an han che chhia hi. Chief Minister vengtute chet dan te, lei a’n chim leh ringawt te kha a mak angrengin ka hria. – Rema dp

Lei chim leh ta chu rilruah a awm reng mai. Congress sorkar hian lei an tichim thei riau mai. Thi an awm fo lehnghal a, engtia han tih chi nge maw ni? Kan insawi fiah zung zung thei zel lehnghal a, a buaithlak a ni. – Sylvia

Engati nge thangtharho hian ‘Thang leh Cham’ hi an hriat hran loh mai le aw..? US?President chu India ramah lo zinin Chawlhniah a lo thleng a, Thawhlehniah a haw leh a. Doordarshan, Aizawl pawhin ni thum chamin a sawi tlat mai. Ni thum thangin emaw, ni khat chamin emaw a lo zin a ni si a. Ni khat, Thawhtanni chauh a cham a ni. Khawiah pawh zin ila, kan thlen ni leh kan haw ni hi kan cham hun chhunga chhiar tel a ni ngai lo. – Matea pu

Congress sorkar ka ninna ber chu mipui vantlang mamawh chungchangah hian a ni. Gas, ration buhfai leh chini, kalkawng ang chi-ah hian an hlawhchham thakin ka hria. MNF kha thil dangah chuan ka fak tehchiam lo; mahse, anni kha chu keini sorkar chhawrna tur dang nei vak lo tan khan an tha ve riau, hetiang kan mamawh neuh neuh kha min supply hneh ve tlat a ni. – 9862597997

Mizoramin kum 100 chuang chanchin tha thlen nia kan lo hman tawh, January 11, 1894 chu Presbyterian Kohhran din ni a ni zawk tih Synod-in a pawm thu Kristian Tlangau buah tar lan a ni hi a va mak em! Hetia Kohhran ni pawimawh, chhim leh hmar Kohhran hruaitu hmasaten lungrual taka an lo pawm tawh avanga monument tam tak siam a nih tawh hnuah, Mizo Synod-in Presbyterian Kohhran din ni a han ti ta mai hi a va mak em! He thil hi Baptist Kohhran nen an inngeih lohna rah, an inkar tizautu, Setana thang a ni ngei ang. Kohhran hruaitu hmasa boral tawhte an zahawm hle a, Kohhran mipui an tiluhai hle zawng a nih hi. – Omoma pu

Zu Inho hi ram tithuanawmptute ni lovin, sum ngaina leh duham thang huamho, hmasawnna tur sum mahni tana paipawn chingte hi an nih zawk ka ring ve tlat. Zu hi tha ka tihna erawh a ni lo. – 9612221332

Hla siamtuin thu a tam, hla a tam a lo ti a, pawm dan leh ngaihdan pawh a inang vek lo. Chuvangin, Pathian thu tak sawi thinte hi kan ti leh thin a, tu thu mah hi a dik vek bik lo, Pathian thu hi dik ber leh tha ber chu a ni mai. Pathian thu tak tlangaupuitute hi khawvel chu sawi loh, Kohhran chhungah pawh hian an leng tawh meuh lo chu a ni. – Tha Sal

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?