Sawhkhawk (Feb. 26, 2017)

Sawhkhawk of the Week
Zalen hi a ngaihnawm hle zel thin e. In article chhuah thinte hian ka beng an tivar thei khawp mai. Tun hmaa chhut sual tam tia an complaint-na thin cheu pawh kha tunah chuan a awm ta mang lo, han tang zel phawt teh u. Chutih rual chuan tihsual neih loh tawp hi chu a harsa a, tute pawh tisual thei kan ni tih inhriain tihsual neih palh hlauh lutuk avanga tih loh ang chi hi chu i nei lo vang u. – Zuala

Pathianni hmasaa lungawi lohna lantir dan chungchanga pakhat rawn sawi kha ka ngaihdan chiah a ni. Mizoram hi Kristian ram inti chung reng si hian kum eng emaw zat liam ta atang khan kan lungawi loh te, kan nawrh te, eng emaw kan nawrte hian kan tihlan hi a Kristian lo mah mah ve ta fo mai. Bomb han tihpuah mai chu thuhran ni ta sela, kan au dante hi a mawi lo thin. Kristian kan nih vang chiah lo pawhin, kan ram hruaitute hming mawi lo tak taka lam chhuah ang chi hi chu kan sim a tha khawpin ka lo hre ve a ni. – Mazuali, TKK

Miss Mizoram thlanna chu kalpui mek a ni a, kan Mizo nulate pawh an lo nalh ta hle mai. Hmana Tribal pian, chawnping leh mawng fual ang chi pawh kha kan hmel a lo that ang zelin a lo reh ta em maw ni? Kan nulate an lo tha thei ta hle mai. A endiktu leh a buaipuite velah pawh thui tak tak modelling lama thleng an ni tih han hriat tel phei hi chuan a nuam hle mai. Kan ti ta sa sa bawk a, thui tak kan nula nalh rualte hian an thlen theih nan han bei zel teh se. – 8794686442

Mizo zinga nula nalh kan han thlang dawn a, khawvel hmun danga an tih thin angin lui kam velah lang thui tak takin an han in-post kual vel ta a, ei lo fe fe chu kan tam hle mai. Social media lamah pawh beihna an tawk nasa a; a awm ve reng mai. Chutih rualin khawvela leh India ramah ngei pawh langsar phak, ei hmuhna tur khawpin modelling lam hi kan ti dan a nih chuan, hetiang deuhva kan chet hi a ngai ve a ni. Tlema kan thlir zau ve deuh a ngaiin ka hria a ni. – Rampuia

Kan Mizo nulatechu hnam dang tih dan angin Miss thlannaah an inphelh ruak ve ta a ni a, a mak angreng ngawt mai. Mizoten kan tih ngam loh tura ka ngaih hi kan ti ve ta fo mai. Taksa inphelhruah (ruak tak tak chu ni lo mah se) hi chu a Kristian lo tihna hi thui tak ka nei a. Kei chu Miss Mizoram a nih ang ngeiin Mizo tak hian thleng mai sela ka lo duh mai a, khatianga kekawrte leh hnute dawmna nen ringawta inlan ngam ang chu kha chu kan nula dangte entawn tura Miss atana thlan chhuah kha chu a fuh hian ka hre lo a ni. Kristian rama tih atan phei chuan a mawi lo lehzual ka ti. – Mazualtea

Kan inkhel thiam chhuanvawr chu a khelh thatna leh a goal thun aiin a saptawng thiam lohna kan sawi zui nasa zawk a maw? A va han hahthlak em! Saptawng thiam lo nuihzattute hi an khaw hawi a la zau tawk lo em maw ni ka ti ve deuh. Khawthlang inkhel thiam tam tak, kan star tak takte khu saptawnga tawng mumal thei lo an tam asin. Saptawng thiam lo chu hlawhtlin loh tur ni sela chuan kan hre lo vang, mi nuih pawh an tiza ngawt ang. Mahse, a ni lo, tunah chuan kan star ber berte an ni tlat. Danmawia pawh tang zel rawh, an sawiselna che hi nangmah fuihtuah hmang hlauh ang che. – Sangpuii

Saptawng thiam lo lo nuihzat ve ringawt hi a zia lo ngawt mai. Kan ram atanga India ram huapa football inelna sanga kan club tirhchhuah chhun timawitu chu fak zui tak aruangin a saptawng thiam mumal loh chu kan titi zui duhzawng a ni ta tlat mai a, a zia lo khawp mai. Football avanga a hlawh chhuah tawh sum chu sawi loh, a hmingthanna ringawt pawh hi a nuihzattu tam tak kha chuan kan la hlawh chhuak pha lo vang maw le!! – 9436360899

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?