Sawhkhawk (Jan 13, 2019)

Sawhkhawk of the day
Kum hlui thlah zana halpuah leh halmawi kan phal lo tlat kha mi tam tak tan chuan thawk huaina tham chu a ni ngei mai a; mahse, kei chu boruak a siam ve riauin ka hria. Chutih rual chuan an khap ang em em chuan khap hneh a harsa chu a ni ang, a ri nasa tawk tawk khawp mai. Hnam dang sakhaw kûtah hian an hal thawm ni awm tak hi a awm leh zauh thinin ka hria a, hetih lai hian sorkar hian a khap ve ngai chiah lo nge, an khap chungin an hal lui zawk ni ang? Mizo Kristiante mai ni lo, khawvel pumin an lawm thin kum tharah hian a lawm nan Mizo zingah khap a ni bik thin mai em ni zawk? Kum thar lawma khap theih tho an nih chuan sorkar hian rualkhai zawkin hnam dangte lakah pawh khap ve mai se, an haltir duh a nih pawhin hmana an tih ang khan hmun khatah haltir ve mai se, a tha zawk lo maw? Heti chuan hnam dang duhsak bik an ang riauin ka hria. – Mizo Nu

Kum a lo thar leh ta a, Zalen chhiartute leh enkawltute pawh Krismas leh kumthar nuam leh hlim taka in hman theuh ka beisei. He kum thar hian in tan malsawmna thlen sela, in tan kum that kum lo ni hlawm sela, mi dangte tana in tangkai leh malsawmna in nih kum lo ni hlawm theuh rawh se. – Zomuanpuia

Ka ZAlen chhiarpui thin zawng zawngte Kum thar chibai tha ber ka buk vek a che u. Kuminah pawh he chanchinbu hmang hian inkawmin inpawh tlang lehzual ang u aw… – Lal Zalen-i

zalen chanchinbu chhiar a nuam thei hle mai. Tun Pathiannia chhuakah khan Dr. Hrekima Titi leh Thukhawchang a awm leh thei tawh dawn hnai turah ka ngai ve ringawt a, in chanchinbu min tinghahhlelhtir zual hle mai. Ka Huang te, in chanchin thar ziah leh thil dang pawh a tha em em vek tho va. In chanchin hi lo thang zel rawh se. – Fakpuia

KUm a thar leh ta a, Zalen chhiartute pawh chibai ule! Kan chanchinbu enkawltute pawh nun thar nen, tha thar nen an tang thar turah ngai ila, thu ngaihnawm zawk leh chhut dik zawk pawh min hlui thei turah ngai ila, theihtawpin lo tang zel teh se. – TERESA

Kan Lal Isuan a ngaih pawimawh em em, pachhiate hnen thleng phak kan rawngbawlna a nih loh chuan ringtu kan intiha rawng kan bawl ve mek hian Lal Isua hnen kan thleng zo dawn chuang si lo va, kan Lal Isua zirtir dan kan en leh chuan, tha famkima kan awm duh chuan, ‘Kal la, i neih chu hralh la, pachhiate hnenah pe rawh,’ tih a ni.A sawi zelnaah chuan mi hausa tan vanrama luh chu harsa tak a ni. ‘Tin, ka hrilh leh a che u, mi hausa Pathian rama luh aiin sanghawngsei hriau benga luh tlang a awl zawk,’ a ti a. – 9402520257

Hla siamtuin thu a tam, hla a tam a lo ti a, pawm dan leh ngaihdan pawh a inang vek lo. Chuvangin, Pathian thu tak sawi thinte hi kan ti leh thin a, tu thu mah hi a dik vek bik lo, Pathian thu hi dik ber leh tha ber chu a ni mai. Pathian thu tak tlangaupuitute hi khawvel chu sawi loh, Kohhran chhungah pawh hian an leng tawh meuh lo chu a ni. – Tha Sal

Ringtu inti, Dawrkaiho rilru chhiatzia hi mak tak a ni. Kan ringtupui, kan Kristianpui, kan hnampui, kan Mizopuite pawh min bum duh a ni a, an rilru hi a chhe takzet a ni. Balaama khan Balaka kha Israela thlahteho milem biakna sa an eina tur leh an inngaihna turin an hmaah tlukna dah a zirtir a nih kha, chuvang tak chuan keini ang rintlem leh ka thalaipui kal ngaihna hre lo tam tak tan hian sual tihzalen theihna hun min siamsak a ni mai lo maw? Kan hmaa Krismas lo thleng tur hmuah kan tum dan hi a dik lo tlat. – Adika

Kan Vengah hian Kohhran rawngbawltu pawimawh ve tak, kawng nek tak mai, an in zawn chu kawng pawh zim tak a ni. In luah an ngah si, an in luahten kawngah lirthei an dah a, an inlengten an dah bawk a, an thenawmte leh mi dang an tihbuaizia hi! Ui an vulh a, an in luahten an vulh bawk a, an bauh reng bawk si a, kan ning khawp mai. Thenawmte tan phurrit an siam reng mai a, an chet danah chuan an Pathian thuawihna reng reng thenawmten kan hmu lo a ni e. Veng dangah he mite chhungkua ang hi an awm ve em aw!! Mi dang tan phurrit siam lo ila, mi dang tan malsawmna nih i tum tlat ang u. – Thaduhi, Khatla

Krismas leh kumthar bawrah khan buaina leh chhiatna thleng a tlem niin a hriat a, a dik khawp mai. Mi tam tak chuan zu zawrh chung pawha Mizoten zu in kan thiam tawhzia sawi nan an hman phah leh mai thei. A dik pawh a dik ang, kan changkang tawh a, zu in hi kan thiam zel tawh a ni. Chutih rual chuan Kohhran mite tawngtaina rah leh tlawmngaia duty thin te, kan police-te thawhrimna te a ni tih pawh a hriat a. Zu fak mawi leh phah nan chuan hmang lo hlawm teh ang u. – Zopuii

Pute u, Kum a thar ta bawk a, tan la zel teh u. Kum thara chanchinbu chhuak hmasa ber han hmuh chuan chawlhkar hnih hmuh loh hnu a ni bawk a, hnuk a ulh lo chauh alawm le!! ZALEN hian ka rilruah hmun a lo chang nghet tawh hle a ni tih a chhuah loh chiah khan ka inhre chiang chiah mai!! Kum thar kan hman mekah hian duhsakna ka hlan che u a, kum hlui aia hmasawnna leh ngaihnawm zawk, chhiar manhla zawk pawh ka lo beisei ang. – Azl. tlak lam nu

Mihring hian kan dam that vervawr lai hi chuan kan dam man tozia hi kan ngaihtuah ngai lo mai thei a. Mahse, kan taksa, khawi lai pawh a’n nat chiah hian kan dam man lo tozia hi a hriat chiah thin. Kal thuah ngaia awm te, oxygen pek ngaia mi an han awm chiah hian, damdawi in lamin a tihman an han chhiar chiah hi chuan, minute 2 lek kan thawkna tura oxygen kan hman man lo tozia te hi a hriat chiah zel mai. Heng zawng zawng hi a thlawna kan dawn a ni si a, Pathian hian a man hi chhiar dawn sela lei zo kan awm lo vang. Lawmthu sawia a rawng bawl mai tur hi kan lo ni. – 8794686442

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.

Login

Lost your password?