Sawhkhawk (Jan. 15, 2017)

SAWHKHAWK of the week
Zalen chhiartute Krismas leh Kumthar chibai vek ule! Him dam tak leh nuam taka hunpui kan hman theih avangin Pathian hnenah lawmthu i sawi tawh em le? Mihring hian zan kan mua khaw lo var te, tukthuan ei tur kan nei mai te, chhuna hnathawka kan chhuak leh tlaia kan haw te, zanriahin min lo hmuah zawng zawngte hi ngaihtuah chian lo chuan kan thawhrim rah anga chhiar mai hi a awl khawp mai; mahse, ngun taka chhut chuan kan nun hi a holam em mai a, Pathian vang zel a lo ni tih hi ngaihtuah a ngai. Keimahni theihna hi chuan engmah kan ni lo tih hi kumin zirlaiah i hmang teh ang u. – Sangtea

ZALEN chhiartute Kumthar chibai ule! Krismas leh Kumthar lawmna hlim takin kan hmang a, he kum thar hi in tan malsawmna kum lo ni mawlh rawh se!! – J.Kama

He KUm tharah hian Zalen chhiartuten kawng khat takin hmasawn i tum ang u aw.!! Thlarau leh tisa lamah pawh hmasawn i tum ang u. He kum thar hi tute tan pawh kum malsawm lo ni sela, he chanchinbu enkawltute tan pawh lo ni mawlh rawh se! He kum thar kan chuangkai leh ta hi kan vanneihzia hriain lawmthu i sawi mawlh mawlh ang u. – Mazualtei

Pu Hrekima thu ziah chu a tha hle mai. Ni e, halpuah leh halmawite hi a haltute tan chuan a nuam pawh a ni mai thei a; mahse, a tuartu tan hian a hrehawm khawp mai. A bikin thawk lama damlo leh tar chak lo enkawl tan phei chuan hetiang hunpui lo thleng tur hi a huphurhawm phah thin hle a ni. Mahniin nuam ti mah ila, Pu Hrekima sawi ang khan mi dangte vengthawng chunga kan nun thiam hi a pawimawh hle a ni. – Fakpuii nu

Kar hmasaa halpuah leh halmawi chungchang rawn ziaktu ziah dan kha ka ngaihdan chiah a ni. Mizote hi kan mawl lutuk bik lo va, tih harsa tak pawh kan ni lem lo niin ka ngai. Hman kuma an khap chiama sorkarin tan a lak tak tak kha chuan hal kan awm lo tih theih a ni a, a hnu lawkah anmahni vekin phalrai hretin halna hmun an han siam a, kuminah phei chuan khap tih chu awm ve bawk mah se khap lo ang mai kan ni. Khapna an kenkawh kha a ngai rengin, khauh takin keng tlang zel sela chuan kan hal lo mai thei a ni. – 8974232935

Halpuah leh halmawi hi kum tin hian kan thupui lian tak hi a ni ve deuh ziah a, kuminah pawh khap tih puang reng chungin khati zat kha kum thar lawm nan kan hal a. Mi ramah hian an khap ve lem lo niin a lang a, TV leh ilo vela kan hmuhah hian mawi tak tak hian an hal chuah chuah zel a, hei hi engtin nge an tih bik ang aw tih ka lo ngaihtuah daih a ni. An hal hi a bengchheng ve lo va, mi dangte tan harsatna siam khawpin a khu hi a tha lovin a hrisel lo ve lo em ni ang tih ka ngaihtuah ziah a ni. Lo tha lo ve sela chuan khap ve awm tak niah ka ngai deuh reng va, ka hriat tlem vang chu a nih ka ring tho va; mahse, an khap lo ni awm tak hi a ni si a. Mak ka ti hle a ni. – Muana

Kum thar kan chuangkai leh ta a, he kum thar hi mi tin tan malsawmna lo ni sela, kan ram pawhin hma a sawn kum, dik lo taka ti thin politician leh officer lianten an tih thin an sim kum ni hlauh sela ka va ti em! – Thangbawihtea

Mizote hian infiamna lamah hma hi kan sawn nasa hle mai, ni tin chanchinbu chhiar ila, ram pum huap emaw, khawvel huap emawa kan chet thatna hrang hrang hi chhiar tur a awm deuh reng mai a. Tunah pawh football lamah chuan ram puma league sang berah club kan nei reng tawh bawk a, kan tih lamah hi chuan, kan sum leh hmanrua kan neih tawkah tluk loh hi kan nei vak bik lo niin ka hria. Kan infiam mite tana thawktu pawl leh an chanchin thehdarha chawimawi thintu infiamna chanchin ziak thinte pawh an fakawm hlein ka hre bawk a ni. – Sylvia

Tunlai hian khua a vawt khawp mai a, a vawh thu hi kan inhrilh sup sup a ni deuh ber mai a. Heti hian ka lo ngaihtuah ve mai mai a, a vawh hun laia a vawhzia thu sawi tam leh nin thu tiri sekho hi nakinah, khua a lum hunah te, ruahtui a tlak hunahte pawh a sawi uar leh a ning an ni leh tho vang. Mihring hi thil reng reng, mahni tawn anga lungawi thei lo chi hi awm ve ni ngaiin ka hria. Hetiang mite hi chu an duhthusam thin thil pawh neiin tawng ta thut mah sela, ‘rin aiin a ho’ ti leh tho tur chi niin ka lo hre ve mai mai thin. Eng nge in ngaih ve dan? Tlai laklawk tlai reng ang deuh hi an ni maiah ka ngai hmiah mai. -Rammoia

Kumin Krismas leh kum thar vuakvet chu kum dang ang lo takin kawn chei kan uar lo hle mai a, eng vang nge ni ang aw? Mizote hi intihhmuh zung zung, peih rei lem lo thin kan nihna a lang leh maiah kei chuan ka ngai deuh va. Pastor pakhatin, “Mizote chu broiler ar vulh tawk,” a tih ang deuhvin awlsam taka lang thei hi kan phurpui tawk a ni a, rei nghah ngai chi ang hi kan ti thei lo niin ka hre ve mai mai. Hei hi a hnam anga kan thanmawhbawk pawh niin ka hria. – 9436360899

Hmanni lawk khan kan ramah lir a nghing lehpek a, a nghin zawh chiaha mi tam berin kan ban nghal chu kan phone a ni ngeiin ka ring a. Khati khawpa min tihthaih chung pawha a hmasa bera Pathian au lova thil dang kan ngaihtuah hmasa zawk khan kan Kristianna dahlau tawhzia a tichiangin ka hria. A tak takah chuan Pathian bak hi min chhanhimtu, min thlamuantu leh kan hahdamna tur dang a awm lo tih hi he chanchinbu chhiartute hnenah hian ka hrilh duh cheu a ni. – Mahruaii

Krismas leh Kumthar lawmna hunah buaina leh lirtheia chetsualna a tlem nia sawi chungchanga kar hmasaa ngaihdan thawhtu thawh kha ka ngaih ve dan chiah a ni. Mi thenkhatin zu zawrh kumah pawh chetsualna a tam phah lo ang deuhva titina vela an sawi ve sek hi a dikna chen awm mah se a ni ber lovah ka ngai. Hetianga boruak muanawm tak a awm theih nana thawktute leh in lum atanga tawngtaia hun hmangte vangah ka puh lo thei lo. Zu chu kan lo inthiam a nih pawhin a lirtheia chetsualna thlen tlem chhan lian berah chuan ka puh ngam ngawt lo a ni. – Sylvia

Pathian leh a mi enkawlna hlutzia hi i ngaihtuah ve tawh ngai em? Pathian tel lo hian eng ang nge i nih ang tih tal i ngaihtuah tawh em? Fakhla siamtuten tuk chhuak ni eng an hmuh avanga lawm thu an sawi mai ang hian Pathian min enkawlna avanga lawm thu sawi tur hi kan va ni em! Kan theih vang a ni lo a nia aw… – 8729805358

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?