Sawhkhawk of the day
Zu chungchang hi ka sawi ve châk deuh va, thenkhatin an khap hi an lawm em em laiin thenkhat tan chuan ngeiawm a ni tih hi chu a chiang mai. Zu hi engtin pawhin ti ila, a in hi chuan an in reng dawn a, a in lo hi tan chuan eng ang pawhin zalen sela, an in chuang kher lo mai thei. Ka ngaihtuah ve mai mai takah chu, zu in kha kan thiam ve dawn tan chiah niin ka lo hmu a, chutih lai tak chuan sorkar a inthlak a, kan han khap leh rih a, a vâng a, a duhtute tan chuan insen leh hrep a ngai dawn a ni mai a. Zu hi thlah leh thlah loh pawhin a awm reng tho si a, thiam taka kan in theihna tura dan hnuaia zawrh mai kha thil tha a ni mai lawm ni ka ti ve deuh a ni. – Lalvala

Zu chungchangah hian ngaihdan hi a tam khawp a, kei chu engtik lai mahin zu zawrh hi tha ka ti ngai lo va, tuna an khap pawh hi tha ka ti. In chhungkuaah zuin a tihbuai, nunna hial pawh chân tawh awm ta se, zu hi i fak reng thei lo mai thei. Zu avang hian mi tam tak an hmeithai tawh a, fahrahin an awm phah bawk a. ‘Zu khapin a awm tho,’ an tih hi chu a dik ang; mahse, khap na na na chuan a in mi tan pawh duhtawk in tur awm lo ta chu a in pawh a tlem deuh alawm, thil tha a ni tho tho ka ti. – Mapuipuia

Mizorama Kohhran lian tak pahnih hian chanchin tha kan dawn tan hun thuah hian thu an inhmu chiah lo niin a lang a. Pakhatin kum 125-na pui taka an lawm laiin thenkhat tan chuan chu aia upa daih tawh a ni a, Kohhran taka chu inhnial chiah lo mah se an member-te erawh dik zawk nih tumin an inhnial viau thei bawk ang. Chanchin tha kan dawng hi a lawmawm a, tun kan thlen theih chhan hi Pathian leh a thu vang chauh a ni tih hi phat rual niin ka hre lo, kan dawn tan thuah hian, thil rei lutuk tawh a ni a, tumah hi kan inhnial fithla tak tak dawn chuang lo va, finfiahna tak tak han hmuh pawh a harsa tawh ang. Chuvangin, chanchin tha avanga kan chanah hian lawm ila, min petu Pathian hi fak zawk mai ila a hahdam berin ka ring. – Lalbuaii

Sorkar tharah chuan kawng chhawng kan nei dawn a, a nuam dawn! Kei chu kan khawpui tawt hi ka ning khawp a, a hahthlak lutuk a, hemi tithawl thei tur hi chu ka duh deuh vek mai. Pu Zorama hian a dream hi a takah han chantir hlauh sela ka ti ngawt mai, kawng tawt lutuk hi a ziaawm ngeiin kei chuan ka ring. – Hnemi

ZPM an sorkar ta lo va, MNF an sorkar ta a, an che na hle mai ni hian ka hmu a. An theih chinah zu an han khap hmak a, VIP light chhit vut vut ang chi kha an tibo ta ni awm tak a ni bawk a, a tha zawnga kal an tum ve hle ni chuan ka hria. An SEDP pawh an puitlin thuai turah ngai ila a tha ang. Kan sorkar hi ram dangte sorkar ang a ni thei a, kan ram hi ram dangte ang bawka changkang a ni thei a, chu chu a mawhphur bertu chu sorkar hi a ni tih hi a ni a. Ram mipui hi tha ringawt mah ila kan chunga thuneitute an mumal loh chuan thil awmze awm lo a ni. Tuna kan hruaitu thlan tharte pawh hi hruaitu tha huanga tel tur ni zel teh se. – Numami

Sorkar thar kan han hrawn a, an kal dan tur awm ang chu kan hmu a, zu an han khap a, an manifesto-a chuangte tihhlawhtlin tumin phai lamah kan minister-te an thlawk liam zung zung bawk a, an sorkar hmasak ngawt ai chuan an ti ang ve dawn riau hian ka hria. Mipuite pawh kan pawimawh ta a ni, sorkarin hma a’n la dawn a, mipuiin kan zir lo va, khawi lai kilah emaw, ei theih tur dapin kan lo phi leh sek ang tih hi a hlauhawm, chumi ti lo tur chuan, sorkar hmalakna tha chu uar taka puitu ni turin inbuatsaih teh ang u. Chu chu kan ram pawhin a mamawh a ni a, kan ram hian ram hruaitu tha chauh ni lovin, mipui tha pawh a mamawh em em bawk a ni tih i hria ang u. – 9402520257

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.