Sawhkhawk (Jan 27, 2019)

Sawhkhawk of the day
Kan NGO-te chuan Republic Day an boycott dan chu a va holam leh angreng si ve aw… tih chuan tih deuh law law tur a nia. Kan thenawm state-a Assam-in Citizenship Amendment Bill an duh lohzia an lantir dante hi a pui mep meo em mai, saruakin an awm a, flag dum nen minister an hmuak a, tharum pawh an hmang nasa bawk. Anni chu an che na khawp mai a, an duh lohzia hi na tak maiin an lantir mai. Keini chu kan han ri hluai a, engtin tin emaw kan indawr a, kan duh vak loh thil pawh hi kan duh leh mai zel a, kan ram hruaitute hian kan zia hi an hre tawh khawp ni hian ka hre thin. Min bawl mai mai, an duh duhin min tithei ni maiin ka hria. Engtin tak hian nge an indawr thin ni dawn ni? – Lalbuaii

Zu chungchangah hian ngaihdan hi a tam khawp a, kei chu engtik lai mahin zu zawrh hi tha ka ti ngai lo va, tuna an khap pawh hi tha ka ti. In chhungkuaah zuin a tihbuai, nunna hial pawh chân tawh awm ta se, zu hi i fak reng thei lo mai thei. Zu avang hian mi tam tak an hmeithai tawh a, fahrahin an awm phah bawk a. ‘Zu khapin a awm tho,’ an tih hi chu a dik ang; mahse, khap na na na chuan a in mi tan pawh duhtawk in tur awm lo ta chu a in pawh a tlem deuh alawm, thil tha a ni tho tho ka ti. Heti tak maia zu khap duh lo ang chite hi khawiah pawh an awm ang a, an tan chhan pawh a tha viau ang a, an thawm pawh a ring a; mahse, Mizo nawlpui (a tam ber) hi chuan zu khap hi kan support tlat zawk niin ka hmu a, anni angin ring tak takin kan aupui ve lem lo mai mai a ni. – Mapuipuia

ZPM an sorkar ta lo va, MNF an sorkar ta a, an che na hle mai ni hian ka hmu a. An theih chinah zu an han khap hmak a, VIP light chhit vut vut ang chi kha an tibo ta ni awm tak a ni bawk a, a tha zawnga kal an tum ve hle ni chuan ka hria. An SEDP pawh an puitlin thuai turah ngai ila a tha ang. Kan sorkar hi ram dangte sorkar ang a ni thei a, kan ram hi ram dangte ang bawka changkang a ni thei a, chu chu a mawhphur bertu chu sorkar hi a ni tih hi a ni a. Ram mipui hi tha ringawt mah ila kan chunga thuneitute an mumal loh chuan thil awmze awm lo a ni. Tuna kan hruaitu thlan tharte pawh hi hruaitu tha huanga tel tur ni zel teh se. – Numami

Hmanni lawka vaiho zinga Pu Duhoma thu sawi kha ka lo ngaithlain ka lo hre ve a, a huaisen hle mai. Khatiang zat mipui zingah hmarchhak state chu India sorkarin a duh loh dana thil an tih chuan khawchhak lam hawi mai an hreh loh thu a sawi a, a huaisenin Prime Minister meuh pawh lo hre tura a duh thu a sawi a, fak tlak a ni. Ni e, kan ram leh hnam chhan nan hian huaisen a ngai a, tawngkaa insawi pawr satliah lovin, a hun leh a hmunah tak hian tih ngam a tha a, a vau tur dik pawh vau ngam a tha hle a ni. – Duhom

Kan ramah hian zawlnei ang deuh deuh hi an lo chhuak fo tawh thin a; mahse, an sawi tam tak hi a dik lo thin. Kan sual tak em avanga tlu chhe mai tur angte hian min sawi thin a, chhiatna lo thleng tur leh khawchhak lam ral lo lian tur ang deuhva sawi thaihna hi kan tawk zing tawh. Sorkar hmalakna pawh lo hlau pawh kan awm thin. Eng pawh ni sela, kan ram hi Pathian hian chuti maia min hrem hi ka ring lo va, sual vanga hrem tur chu ni ila kan ram aia hrem phu khawpa sual hi an tamin ka ring. Kan tha e ka tihna chu a ni lo va, kan ramah hian Pathian thuawih hi kan la tam hian kei chu ka hre tlat a ni. – Naui

Kan sorkar tharah chuan thil kalphung thar liantham la hmu lutuk lo mah ila, tuna an kal chinah hi chuan an la chak vut vut rih hle mai. Hetih rual hian an chet dan hi anmahni bawk hian an zo lo vang tih hi a hlauhawm, an che chak a, an thawk chak bawk a ni mai thei a; mahse, an tawng chak tel lutuk chuan, inthlan hmaa an tiam kha a tam ve laklawh tawh bawk si a, sum hnar pakhat lah chu an titawp dawn bawk si a, thil a buai ang tih a hlauhawm. – Hnemi

Kumin Krismas leh kum thar vuakvet chu veng leh kawn chei a lar ta vak lo kha kan ti liam liam a, kei chu kan la chei nasa khawp tho maiin ka lo hria a. Nia, veng leh kawn chei hi a tiKrismastu pakhat a ni ve a, kei chuan khawlai chei ang chi hi chu a tipeih an awm phawt hi chuan tih zel hi a tha a. Khawlaia sualna ti thin pawh a engah chuan an tawmim phah deuh ngeiin a rinawm a, hei ringawt pawh hi a thlakhlelhawmin kei chuan ka hria a ni. – 9436360899

Khua hi a thal chho leh tan dawn ta khawp mai a, mi tinte kan fimkhur tlan a ngai leh tawh e, kan inhrilh hriat thar nawn leh a ngai tawh a ni. Tun ang chho hi kum tina kan rama in kang avanga chhiatna thleng a tam hun lai a ni thin a, tam tak hi chu vanduai vang chu a ni ngei mai a; mahse, thenkhat hi chu kan fimkhur tawk loh vang a ni thin ang. Current kal sual hi kan puh fo thin a, hei hi a ni mai thei a; mahse, kan kalsan dawna current kan off hmak hmak hi chuan leak pawh a tlem a, short pawh a awm loh phah deuh thei ang. Fimkhur nan a tha hle a ni. – Mahruaii

Mizote hi kan vannei hi ka ti thin. Tun ang thlasikah te hian kan vanneihzia hi ka hre chhuak ziah. Mi ramah chuan a vawh leh a vawt leh lutuk a, a lum leh a lum over a, khawsak ngaihna awm lo, thih phah hial an awm thin a ni a. Kan ramah erawh a vawt kan tih pawhin thih phah kan la awm lo va, khawlum lah a lum tak tak dawn a, ruahin min nan nghal zel bawk si. Phun phun thei hi kan ni lo, Lalpa zawn chhuah ram tia mi tam takten an insawina ang hi a nih duh hmel riau hian ka hria a. Chung lamin kan chenna tur liau liauva a lo ruatlawk hi a ang riau hian ka hre thin a ni. – 8974232935

Kar hmasaa an rawn tar lan tawh ang khan Mizote hi infiamna huangah hian tun lai hian kan hming a tha ta khawp mai a, heng kan infiam mi neihte hian fak an phu takzetin ka hria. Ni tin chanchinbua an chanchin kan chhiar bakah TV channel lian tak takah an inkhel lai kan hmu deuh zut ta mai a, kan hnam tlem leh naupan ngaihtuahin a ropui thlawt a ni. Heng kan infiam mi neihte hi i tawngtaipui thin ang u. Kan ram aiawhtute an ni a, an kawmnaa an sawi fo angin tawngtaipui reng hi an ngaiin ka hria a ni. – Thangbawihtea

Facebooktwittergoogle_plusredditpinterestlinkedinmail

Comments

Leave a Reply

This site uses Akismet to reduce spam. Learn how your comment data is processed.

Login

Lost your password?